Read berom Ɛsta 2 Bible Online

Ɛsta 2 - berom bible

Ɛsta 2

¹Bama de shôm Da Vwel Ahasɛrus ya ga ye rɔ̀s, a hwo bare na pyɛ de Vashti a ga ra, na redu de ba ga tɛ̀ e ra yɛ.

²Bemât fwom mɛ de ba sé tanga yɛ ba yang ɛ, “À Da Vwel, tik na be jāma beyorom-behwong bebot o bezɛrɛ mo yaga hwo.

³Tik na hwo tɛ̀ bemât nuyel e ji bavwêl begbɔng begwɔ̀m mwa, na be tula beyorom-behwong bebot o bezɛrɛ mo, na be vey mɛ e bâk sangâl beha e lɔ mō e Shushan. Bē tik vɛ e vwɔ̂ Hɛgai, rɛmɛt womo de e gyeng beha mō. Tik na be nɔngɔs hɛn něy mɔmɔ ne nesang hyɔɔlɔl tanga něy yông rebek na re sè hyul-hyul.

⁴E bama mo, hwo de kasa ɛ̀ yorom-hwong bwot de a jam a hwo, na hwo tɛ̀ ɛ, a tɛ́ ɛ Hwārwey e tô Vashti.” Vô du mo ha pɛngɛ a Da Vwel yey, ko a raa hɛ.

⁵WoYuda hwak á sè sangal e majêy lɔ Da Vwel e Shushan, reza mɛ à Mɔrdɛkai Yayir Shimai Kish wò yerê Bɛnyamin.

⁶Jeng de Nɛbukadnɛzar, gbɔng gwɔ̀m Babilɔn, a kana jut Yɛkɔniya, gbɔng gwɔ̀m BeYuda, tanga bemat behak vɔk e sangâl sesam, Mɔrdɛkai a kana sè e ji mɛn.

⁷A vɔk hwey hwông gwà da mɛ, reza mɛ a Hadasa, ko ba to tang ɛ à Ɛsta. Dâ Ɛsta tanga de mɛ ba ga kana kushu, ko Mɔrdɛkai a de ras ɛ. Ɛsta mo a sè zɛrɛ mo, a nɛp e bayis.

⁸Jeng de redû Da Vwel ra wul e betong bemat, ko ba hwo tula beyorom-behwong bebot o pyak e majêy lɔ Da Vwel e Shushan, ba tik vɛ e vwɔ̂ Hɛgai wò gyêng beha. Ba jut Ɛsta arɔng, ba wɔ́ mɛ e lɔ Da Vwel, ba tik ɛ e vwɔ̂ Hɛgai.

⁹Hwong o a jam a yɛ, ko nemi mɛ na man na yɛ. Yaga ano, a pere wɔ̀ nɔng ɛ pyɛ̂ mɔmɔ tanga pyɛ̂ re mɛ ryat o arɔng. A to kasa a yɛ behwong betaama yi e lɔ Da Vwel na be sè vê fwom mɛ, ko a wɔ̀ tik ɛ tanga behwong mɛ mo e bàk de wa dal na nerat e bâk beha.

¹⁰Ɛsta a ka dura yere de a yi ɛ wɛt, yaga Mɔrdɛkai a ro ɛ nà ra ano.

¹¹Yɛ Mɔrdɛkai e kyě gwɔsɔ e rwi lalâ bâk beha mo kahɛ tuk, yaga na a bin wok, na a tɔk pyɛ de ya sé té na Ɛsta.

¹²Kawɛ hwong o e ka tanga ra shey hining e de yong ɛ yaga wɔ́ na Da Vwel. Be ra pɛl tyiimin e de mɔmsɔl hɛ na něy mir de ne yong bek, ko be to ra pɛl tyiimin e de tɛ́sɛ něy nesang hyɔɔlɔl tanga tyǐ yông bayis. E bamâ hane, be tɛ̀ a kawɛ hwong tûk wɔ́ na Da Vwel Ahasɛrus.

¹³Jeng de a rɔda wɔ, ba rɔda tɔrɔ hɛ na yɔ̀m de a simo, a kyè mɛ yi e bâk beha wɔ e duk mɛ.

¹⁴A rɔda wɔ nahywegelek, ko a nusu nagasi, a kyè vɔk e bák o hak de wa sé e vwɔ̂ Shaashgas, rɛmɛt de e gyeng bejɛn Da Vwel. A rɔda to wɔ́ na Da Vwel o wɛt, sɛ̌ a wok neta mɛ, na a de tɛ̀, be yila za mɛ.

¹⁵Tuk ha vey de Ɛsta, hwông Abihail, gwà dâ Mɔrdɛkai, de a jut ɛ sede hwêy tɔ mɛ, a rɔda wɔ na Da Vwel. A ka kasa yɔ̀m pyɛ mɛ wɛt, sɛ̌ pyɛ de Hɛgai, wò gyêng beha mo, a vo a yɛ redu na a tɔrɔ hɛ mɛ. Ɛsta mo a sé rwat e bɛrɛng kawɛ mwat de a di ɛ.

¹⁶Ba wɔ́ na yɛ na Da Vwel Ahasɛrus e duk mɛ. A sè e pwɛl gwô kuru (10), gwɛ à pwɛ̂l Tɛbɛt, e shêy rê negwɔm mɛ hê netaama.

¹⁷Da Vwel o kwong a tɛ̀ yey na Ɛsta a dal mwa bwang behwong o. Nemi mɛ na man na yɛ, ko a yel a Da Vwel e yey a dal bwang behwong o mwa. Yaga ano, a tɛ̀ a Ɛsta kpîn negwɔm e rato mɛ, ko a tɛ̀ ɛ, a tɛ́ ɛ Hwārwey e tô Vashti.

¹⁸E bama mo, a yong a begbɔng begwɔ̀m na bemât badu mɛ gbɔng nzem rê pyɛ́, yaga na a nɔ̂ng Ɛsta mɛ nerey. A nɔng pɔngɔ[1] e ji bebak vwel o mwa, ko a gas nenɔrɔ shɛrɛk yerê ne negwɔm.

¹⁹Ba to tula a Da Vwel beyorom-behwong o behak. Ɛsta kwong a ga ka dura yere de a yi ɛ wɛt, tyɛng na nu de Mɔrdɛkai a kana nɔng ɛ. A re nuyel na raà há de Mɔrdɛkai a misang hɛ na a ra, vey e jeng yane sede remo de á rɔngɔl e vwɔ mɛ. Ba ga tɛ̀ Mɔrdɛkai a sè hwak e ji bemât fwôm Da Vwel, ko a sè sangal e rwi majêy lɔ Da Vwel o.

²¹E jeng yane, berɛmɛt de be gyeng rwi jî lɔ Da Vwel de baza mɛn à Biktan tanga Tɛrɛsh ba vɔk shom na Da Vwel o, ko ba hwo yong begwong de bê mɔrɔ hɛ.

²²Ha mo ha gaba e fwông Mɔrdɛkai, yɛ kwong a ha a Hwārwey Ɛsta, yɛ arɔng a ha a Da Vwel, a ye, e Mɔrdɛkai de a ha a yɛ.

²³Jeng de ba ngyɛgɛt ha mo, ba sɛ̀, ha sé tyɛng ano, ba vɛ̌ tá a yɛn ngyɔt ba kushu, ko ba ló ɛn e ra sesêk cɔ́gɔt. Ba jɛk ha mo e bayîs Da Vwel e ji bwok-basâ pyɛ̂ bare de yé té e segwɔm mɛ.