Read berom Ɛsta 3 Bible Online

Ɛsta 3 - berom bible

Ɛsta 3

¹E bamâ pyɛ́ yane, Da Vwel Ahasɛrus a gwɛ̌ a Haman Hamedata wo cang Agak[2] nerey, a nɔng ɛ gwofwa sangal de gwa dal gwo bwang besâ fwom mɛ mwa na nerey.

²Mwa bemât badu de ba sé e rwi majêy lɔ Da Vwel o ba tē ngyuk, ba tē guduruk e vwel, na be nɔ̂ng Haman nerey, sede remo de Da Vwel a nɔng nu. Ko Mɔrdɛkai a ka ye a yɛ ngyuk kɛ a ye guduruk wɛt.

³Bemât badu ba hwo rangal hɛ pyɛ de ya tɛ̀ yɛ e kyɛgɛs hɛ nà gyeng redu de Da Vwel a tɛ̀.

⁴Yɛn a dopse ha na yɛ jojot e ra ha mo, ko Mɔrdɛkai a ka tɛ̀ tong, na a raa ha mo wɛt. A yang ɛn, “Ma sé WoYuda, ko mê tɔk ye a Haman ngyuk wɛt.”[3] Yaga ano, yɛn a wɔ̀ tɛ̀ sekun mɛ na Haman, na be bin di, kɛ gyeng a rɔda tumal gak e ra ha mɛ arɛt?

⁵Jeng de Haman a di de Mɔrdɛkai a kyɛ́ ɛ nà ye ngyuk, na a ye guduruk, na a nɔng ɛ nerey, ko a hwo wok shom sizɔng.

⁶Ko jeng de a wok, Mɔrdɛkai a sé WoYuda, ko a di, mɔ́rɔ Mɔrdɛkai nju mɛ ha vey wɛt. Yaga ano, a yong ɛ̀, na a bin wey na BeYuda mwa e yɛnɛ̂ vwêl Da Vwel Ahasɛrus.

⁷E ji pwɛl gwô susu mo, gwɛ a pwɛ̂l Nisan, e shey hê kuru na hɛ ba (12) hê negwɔm Da Vwel Ahasɛrus, Haman a tɛ̀, be masa sesek, de ba tang vɛ a purim, na be bin sɛ̀ tuk na pwɛl de ê wey na BeYuda mo. Ko swesek o gwa gaba e pwɛl gwô kuru na vɛ ba, gwɛ a pwɛ̂l Adar.

⁸Ano kwong, Haman a yâng Da Vwel Ahasɛrus, “À darwey, yerê bemat behak ya sé de ya bere hɛ e ji bemât bebak vwel mō, ya shara hɛ e ji bebak vwel mō mwa. Badu mɛn na negwɔn mɛn ba sé detu na vê bwang yére. Yɛn arɔng be ka gyeng badu mō wɛt. Ê sè a hwo pyɛ ryat, na hwo niri na yɛn wɛt.

⁹Ka sede hwà di a jam a hwo, ko tik na hwo tɛ̀ redu, be wey na yɛn mwa. Me ma rɔda nɔ̂ng bemât fwom mō dyam pyɛng de ya dal kilo gu naga batat na gu kuru banaas (340,000), na be tɛ̀ e ji gban dyām mō.”

¹⁰Da Vwel a hwo pat yɔbɔ̂ to-gwɔ̀m yi e kwɛn vwɔ mɛ, yemo de be ra mɛ fwom e de nɔ̂ng badu, a nɔ̂ng Haman Hamedata wo yerê Agak, mwât repugû BeYuda, yɛ.

¹¹A yang ɛ, “Vɔk dyām o, bemat arɔng ba sé e vwɔ mō! Ra pyɛ de hwà di na yɛn!”

¹²Ano kwong, e pwɛl gwô susu mo e pɔlɔ hê kuru na hɛ tat, ba yishi bemat-jɛ̂k Da Vwel, ko Haman a basa a yɛn redu, ko yɛn a raa be jɛk tyɛng. Ba jɛk vɔk na begwɔmna na bemât nuyel tanga begbɔng begwɔ̀m bavwel, ba jɛk a kavɛ bemât bavwel na yerê gwông jɛk mɛn tanga yerê lem mɛn. Ba jɛk redu mo e ji rezâ Da Vwel Ahasɛrus, ko ba rusu ɛ reto-gwɔ̀m na yɔbɔ mɛ.

¹³Ba tomo betom de ba kyè mɛ ziri na bebok-berang de ba jɛk o vɔk e kawɛ bak vwêl Da Vwel. Redu de ba jɛk a ret ngan: “Bē mɔbɔs BeYuda mwa, beras na beha, berey na besɛl mwa tanga nèy necereng, bē wey na yɛn, na be tala hɛn mwa hywiri e tuk hining zɔng, na be to hashe pyɛ́ mɛn arɔng. Tuk o hɛ à pɔlɔ kuru na hɛ tat e pwɛl gwô kuru na vɛ̀ ba, gwɛ a pwɛ̂l Adar.”

¹⁴Ba tɛ̀ bemât nuyel e kawɛ bak vwel, be tɛ̀ be mok a bemat mwa redu mo, na be yong ɛn yaga tuk hane mo.

¹⁵Bemât tomo mo ba kyè na bebok-berang o vane ziri tyɛng na redu Da Vwel, ko ba mok redu rane mo e majêy lɔ Da Vwel e Shushan arɔng. E bama mo, Da Vwel tanga Haman ba sangal, ba sè e de sɔ, ko bemât gbɔng repomô Shushan ba sè e ji bɔ́rɔk ding-ding.