Read berom Ɛsta 4 Bible Online

Ɛsta 4 - berom bible

Ɛsta 4

¹Jeng de Mɔrdɛkai a wok pyɛ̂ mwa de ba ga ra, a vɛ̌ hama berugu mɛ, ko a tɛ̀ rugû sesin, a tɛ̀ fongôl kya e rato mɛ, a gwɔrɔ mɛ repomo, a kyě tosho, e dak bèkun sedesi yaga lashê yey.

²A pere vey wul mɛ rwi majêy lɔ Da Vwel, ko a yel wɛt, yaga mwat e tɔk yel e lɔ mo na rugû sesin wɛt.

³E kahɛ vwêl gbɔng gwɔ̀m de redu Da Vwel o ra wul ɛ, BeYuda ba pere hwo tosho, ba ra lɛlɛ sesin, ba dɛrɛ na gbɔng tɔ̀, ba tik rê pyɛ́, ko ba tɛ̀sɛ berugû sesin, ba sangsal e ji fongôl kya arɔng.

⁴Jeng de behwông fwôm Ɛsta tanga berɛmɛt de be ra a yɛ fwom ba wɔ̀ ha a yɛ pyɛ de Mɔrdɛkai a sé ɛ, ko pyɛ mo ya lashe a yɛ yey bagat wɛt. A tomo na berugu, na be wɔ̀ nɔ̂ng Mɔrdɛkai, na a tɛ̀, na a pat mɛ rugû sesin gwane, ko Mɔrdɛkai a kyɛ́ ɛ vɛ.

⁵Ɛsta kwong a tɛ̀, be yila Hatak, gwining e ji berɛmɛt de Da Vwel a tɛ̀ be ra a yɛ fwom. A tomo hɛ na Mɔrdɛkai, na a rangal hɛ pyɛ de ya té, de ya tɛ̀, a sé ra ano.

⁶Hatak a wɔ̀ sɛ̀ Mɔrdɛkai e tê repomo e nuyêl rwi majêy lɔ Da Vwel.

⁷Mɔrdɛkai kwong a ha a yɛ mwa pyɛ́ de ya té na yɛ tanga nepyak dyām de Haman a ga ye, ê nɔng na be tik e ji gban dyâm Da Vwel, yaga na be wey mɛ na BeYuda mwa.

⁸A to nɔ̂ng Hatak bwǒk gwomo de ba jɛk ɛ redu mo e Shushan, remo de ra tɛ̀, be wey na yerê BeYuda mwa. A yâng Hatak, a wɔ̀ nɔ̂ng Ɛsta, na a to misang a yɛ gwɛ yɛɛlɛl, na a ha a yɛ, a wɔ́ e nuyêl Da Vwel, na a tosho a yɛ gabɔk, na a to shonong e ra yɛ yaga bemat mɛ arɔng.

⁹Hatak a wɔ̀ ha a Ɛsta pyɛ̂ mwa de Mɔrdɛkai a ha a yɛ.

¹⁰Ko Ɛsta a to tomo hɛ wɔ̀ ha a Mɔrdɛkai ngan:

¹¹“Mwa bemât fwôm Da Vwel tanga mwa bemat e bebak vwel mɛ ba tɔk, ka sede mwat, rwas kɛ hwā, a wɔ́ na yɛ e lalâ duk ji mo sana yila hɛ, bê mɔrɔ hɛ. Hemo ha sé redu. Pyɛ de yê dul nà mɔrɔ hɛ, sɛ̌ Da Vwel a nára a yɛ gwelê negwɔm gwo dyam shinang. Ko di, nepɔlɔ kuru batat nà ga kwey yimo de ba kana yila me, na me wɔ na yɛ.”

¹²Jeng de ba ha a Mɔrdɛkai pyɛ de Ɛsta a ha,

¹³a tɛ̀ be toyo a Ɛsta na ha ngan: “Hwo kwon bare, sede ba wey na BeYuda mwa, ko hwô sangal kwen hwo nju mō wɛt, yaga hwà sé e lɔ Da Vwel!

¹⁴Ka sede hwà sangal yuu e yerê jeng yemo, di BeYuda ba rɔda sɛ̀ sɛlɛ yi e gwong hwak, na be sey neken mɛn. Ko hwo tanga câng beda mō yin a rɔda wey. Wa a tɔk, kɛ gyeng hwà sɛ̀ sangal e lɔ Da Vwel yaga jeng yerê yemo ɛ?”

¹⁵Ɛsta a to tomo hɛ, a wɔ̀ toyo a Mɔrdɛkai ngan:

¹⁶“Ci, tula BeYuda mwa de ba sé e Shushan, na yin tik rê pyɛ́ yaga me. Yin kwon re na sɔ wɛt pɔlɔ tat nagwi na naturuk. Me arɔng tanga behwông fwom hom wot a rɔda ra tyɛng ano. E bama mo, ma rɔda wɔ na Da Vwel, mwa ano de redu ra simo ano wɛt. Sede gwà sé gwo wey, ko tala mo zɔng.”

¹⁷Mɔrdɛkai kwong a kyè, a wɔ̀ ra tyɛng na pyɛ de Ɛsta a nɔng ɛ nu.