Read berom Ɛsta 5 Bible Online

Ɛsta 5 - berom bible

Ɛsta 5

¹Tuk hê tat Ɛsta a tɔrɔ hɛ na yɔ̀m negwɔm mɛ, a kyè a wɔ̀ tumal mɛ e lalâ ji mo hê lɔ Da Vwel de he bɛrɛng duk gwofwa sangâl negwɔm. Da Vwel kwong á sè sangal e ra gwofwa negwɔm mɛ e bɛrɛng mɛ rwi duk o.

²Jeng de a di Hwārwey Ɛsta e tumal e lala, yey mɛ ya pɛngɛ na yɛ, ko a vɛ̌ nára a yɛ gwele mɛ gwo dyam shinang. Ɛsta kwong a wɔ́ bagat, a ra ratô gwele mo.

³Da Vwel a rangal hɛ, a ye, “E sɛ́ a Hwārwey Ɛsta ɛ? Hwà sé simo sɛ́ ɛ? Ha a me, ko ba rɔda nɔng o. Ka a ka sé rebit vwel hemo mwa, ba rɔda nɔng o!”

⁴Ɛsta a ye, “À darwey, ka sede a jam a hwo, ko tik na hwo vey tanga Haman e de nzem rê pyɛ́ de ma ga yong yaga hwo yunung.”

⁵Da Vwel a tomo, be vey na Haman ziri, na yɛn a ra pyɛ́ de Ɛsta a ha. Ano kwong, Da Vwel tanga Haman ba wɔ́ e de nzem de Ɛsta a ga kana yong.

⁶Jeng de yɛn a sé e de sɔ̂ nshî anap o, Da Vwel a to hwo yâng Ɛsta, “Di, a remo, e sɛ́ de hwó simo ɛ? Ha a me pyɛ de ba rɔda nɔng o. Ka a ka sé rebit vwel hemo mwa, ko bê nɔng o!”

⁷Ɛsta a toyo a yɛ, a ye, “Ma vɔk gbɔng won vey na hwo, à darwey.

⁸Ka sede yey mō ya pɛngɛ na mɛ, na hwà di a jam a hwo, na hwo nɔng me pyɛ de me simo, ko tik na hwo, à darwey, tanga Haman yin to ba vey e de nzem rê pyɛ́ de mê ba yong a yin nahwol. E jeng o kwong mê de ba ha a hwo pyɛ de me simo.”

⁹Tuk hane Haman a nusu yi e dem nzem, yey mɛ ya pɛngɛ sizɔng. Ko jeng de a di Mɔrdɛkai e sangal e rwi majêy lɔ Da Vwel, ko Mɔrdɛkai a ka sogo kɛ a ka ye sede a nɔng ɛ nerey nehak wɛt, a hwo wok shom mɛ sizɔng.

¹⁰Mwa ano, a niri, a kyè vɔk e lɔ. A tomo be yishi a yɛ besa mɛ tanga hwā mɛ Zɛrɛsh,

¹¹ko a hwo dak kaa e ra nerêy yas mɛ, na nepyak nèy bewen mɛ, na nerey de Da Vwel a to gwɛ̌ a yɛ, de a tɛ̀ ɛ wò nuyêl bemât badu mɛ tanga begbɔng begwɔ̀m mwa.

¹²A to gwɛ̌ ye, “A kat mɛ mwa, Hwārwey Ɛsta a yong nzem pyɛ̂ re, ko e me nju hom zɔng de a rini na me sè tanga Da Vwel. Ko a ga to rini hot na Da Vwel nzem o nehak nahwol.

¹³Ko di, mwa pyɛ́ yemo ye pɛngɛ a me yey wɛt sede me bɛrɛng WoYuda wane, Mɔrdɛkai e sangal e rwi majêy lɔ Da Vwel!”

¹⁴Hwā mɛ tanga mwa besa mɛ ba yang ɛ, “Tɛ̀ be yong swesêk cɔgɔt lyis de nelîs gwɛ na wul mita kuru baba na vɛ betat (23). Ko nagasi hwol, hwo ba sey reto na Da Vwel, na be ba luga Mɔrdɛkai e ra rak o gyam. E bama mo, yin de kyè tanga Da Vwel vɔk e de nzem rê pyɛ́ na yey mō pyɛng.” Haman kwong a wok netâ ha mo, ko a tɛ̀ be yong cɔgɔt o.