Read berom Ɛsta 6 Bible Online

Ɛsta 6 - berom bible

Ɛsta 6

¹E turuk hane, nevwa na kyɛ́ ɛn bayîs Da Vwel. Yaga ano, a hwo tɛ̀, be vey na bwok-basa de ba jɛkɛs ɛ pyɛ̂ bare de yé tē e negwɔm mɛ, ko ba basa a yɛ gwɛ.

²E ji mo, ba sɛ̀ kwɔn hak de ba jɛk ɛ reha de Mɔrdɛkai a kulu Biktana tanga Tɛrɛsh, berɛmɛt beba e ji vemo de be gyeng rwi lɔ Da Vwel, de ba kana yong ɛn na be mɔrɔ Da Vwel Ahasɛrus.

³Ano kwong, Da Vwel a rangal, a ye, “E yɛ̌ pyɛ kɛ rê nuyel de ba ga nɔ̂ng Mɔrdɛkai yaga pyɛ yane de a ra arɛt?” Bemât fwom mɛ ba ye, “Vit a pyɛ cak de ba ga ra a yɛ.”

⁴Da Vwel a rangal, a ye, “Mwât badu hwak a sé e lala a?” Tyɛng e jeng yane, Haman á sè yeles e rwi ruhûp majey, na a vey sey retô Da Vwel wɔgɔ, be luga Mɔrdɛkai e ra swesêk cɔgɔt de yɛ a ga yong yaga yɛ.

⁵Ko bemât fwom ba ye, “E Haman de a sé gyeng e ruhûp majey.” Da Vwel a ye, “Yɛ̀ a yel.”

⁶Jeng de Haman a yel, ko Da Vwel a hwo yang ɛ, “E sɛ́ de bê ra a mwat de me simo me nɔng ɛ nerey ɛ?” Haman a hwo ye e yey mɛ, “E wa de Da Vwel ê nɔng ɛ nerey de a to dal me ɛ?”

⁷Yaga ano, a yang ɛ, “À Da Vwel, mwat de hwó simo nɔng ɛ nerey,

⁸tik na be vey na berugû negwɔm vemo de hwà ga tɛ̀sɛ, ko be vey na dwa de hwà ga lagsa arɔng, womo de ba tɔrɔ wɛ na yɔ̀m dyam shinang e ratô wɛ.

⁹Tik na be nɔ̂ng hwak e ji bemât badu berey o berugu na dwa mo, na a tɛ̀ a mwat de hwó simo hwo nɔng ɛ nerey yɔ̀m o, na a tɛ̀ ɛ e ra dwa mo arɔng. Tik na a gwɔrɔ na yɛ e tê repomo, a kyě mok e nuyel mɛ, a tē, ‘Di in, pyɛ de be ra a mwat de Da Vwel e simo, na a nɔng ɛ nerey!’ ”

¹⁰Da Vwel a yang ɛ, “Ci ziri, jut berugu mó na dwa mó, na hwo wɔ̀ ra a Mɔrdɛkai, WoYuda, tyɛng pyɛ de hwà ha! Hwo kwon tɛt ɛ pyɛ cak e ji pyɛ̂ mwa de hwà ha wɛt! Hwô sɛ̀ ɛ e sangal e rwi majêy lɔ hom.”

¹¹Haman kwong a jut yɔ̀m, na dwa mo. A wɔ̀ tɛ̀ a Mɔrdɛkai yɔ̀m o, ko a kyè na yɛ e ra dwa mo, a gwɔrɔ mɛ e tê repomo. A kyè e nuyel mɛ, ko a mok, “Di in, pyɛ de be ra a mwat de Da Vwel e simo, na a nɔng ɛ nerey!”

¹²E bama mo, Mɔrdɛkai a toyo vɔk e rwi majêy lɔ Da Vwel, ko Haman a toyo hɛ ziri vɔk e lɔ mɛ, a kyiri rato mɛ yaga rekyen.

¹³Ko a ha a hwā mɛ Zɛrɛsh na besa mɛ mwa pyɛ́ de ya ga té na yɛ. Bemât vos a yɛ badu tanga hwā mɛ yɛn a yang ɛ, “Remo de Mɔrdɛkai de hwà ga hwo gaba e nuyel mɛ, a sé WoYuda, hwà rɔda di wɛng e ra yɛ wɛt. Gbing-gbing hwô di gawey!”

¹⁴Jeng de yɛn a sé rɔɔ ha na yɛ, berɛmɛ̂t Da Vwel ba pom, ba kyè na Haman ziri vɔk e de nzem rê pyɛ́ de Ɛsta a ga yong.