Read berom Ɛsta 7 Bible Online

Ɛsta 7 - berom bible

Ɛsta 7

¹Ano kwong, Da Vwel na Haman ba wɔ̀ wul e dem nzem Hwārwey Ɛsta.

²Tuk hê neba mo de yɛn á sè sɔ nshî anap, Da Vwel a to rangâl Ɛsta a ye, “À Hwārwey Ɛsta, e sɛ́ de hwó simo ɛ? Ha a me, ko ba rɔda nɔng o. E wôn sɛ́ de hwô ra ɛ? Ka a ka sé rebit vwel hemo mwa, ko bê nɔng o!”

³Hwārwey Ɛsta a toyo na ha, a ye, “Ka sede yey mō ya pɛngɛ na me, à darwey, na hwà di a jam a hwo, me simo, be tik me kwen, na be to tik bemat hom beken arɔng.

⁴Yaga ba ga rɛsɛl hot, me tanga bemat hom, na be mɔbɔs hot, be wey na wot, na be tala yere mot mwa hywiri! Ka a ye a sé wɔgɔ, ba rɛsɛl hot, beras na beha, na wot tɛ́ ot besam zɔng, ka ma yang sǎ yuu. Ko sede remo de bê wey na wot, vit a mwât repugu de ê tɔk tala pyɛ de hwà rɔda bidɛ, à da.”[4]

⁵Da Vwel Ahasɛrus a rangâl Hwārwey Ɛsta, a ye, “E wa a wane de a tɛ̀ to mɛ, na a ra pyɛ yane ano ɛ? Mwat o a sé e gwa ɛ?”

⁶Ɛsta a toyo a yɛ, a ye, “Mwât repugu de a kyɛ́ ɛ hot o, yɛ̀ a gwarap womo Haman!” Haman a vɛ̌ ye gbit na bengyip e nuyel Da Vwel tanga Hwārwey mɛ.

⁷Da Vwel a ye puu na shom, a vɛ̌ hàla kwɔ̂n nzem o, a kyè vɔk e bwî jamuk mɛ. Ko Haman a nàra e hwomo na Hwārwey Ɛsta, a sè ra won na yɛ yaga neken mɛ, remo de a di Da Vwel a ga tɛ̀ e yey mɛ na a wey na yɛ.

⁸Jeng de Da Vwel a wɔ̀ toyo yi e bwi mo, a pom, a sɛ̀ Haman, a ga gaba guduruk e ra bak gat de Ɛsta a ye ɛ̀ yɛndɛng. Da Vwel a tɛ̀ kun, a ye, “Àaa! A sé byɛs a me hwā e nuyel hom, e ji lɔ hom a?” Gyam na a yɛnɛ ha, bemât fwom mɛ ba vɛ̌ kyiri tô Haman o.

⁹Ko Harbona, hwak e ji berɛmɛt de be ra a Da Vwel fwom, a ye, “À darwey, di, ba ga kana tɛ̀ swesêk cɔgɔt de nelis o na sé mita kuru baba na vɛ betat (23) e lɔ Haman. A ga kana tɛ̀ yɛ yaga Mɔrdɛkai, yɛ womo de a ha ha de ha sey neken mō.” Da Vwel a vɛ̌ nɔng nu, a ye, “Bē wɔ̀ luga hɛ e ra gwɛ!”

¹⁰Ko ba kyè wɔ̀ luga Haman e ra cɔgɔt de a ga kana yong yaga Mɔrdɛkai. E bama mo, shôm Da Vwel ya de ye rɔ̀s.