Read berom Ɛsta 8 Bible Online

Ɛsta 8 - berom bible

Ɛsta 8

¹Tuk hane mo, Da Vwel Ahasɛrus a vɛ̌ nɔ̂ng Ɛsta lɔ Haman, mwât repugû BeYuda, na pyɛ̂ nedanelɔ mɛ mwa. Mɔrdɛkai kwong, ba wɔ́ na yɛ e nuyêl Da Vwel, yaga Ɛsta a ga kana dura a yɛ, Mɔrdɛkai a sé nemi mɛ.

²Da Vwel a pat yɔbɔ̂ tô gwɔ̀m yi e vwɔ mɛ, yemo de a ga kana to sey ɛ yi na Haman, ko a nɔ̂ng Mɔrdɛkai. Ɛsta arɔng a tɛ̀ lɔ Haman na pyɛ̂ nedanelɔ mɛ e vwɔ̂ Mɔrdɛkai, na a bɛrɛng a yɛ.

³Ɛsta kwong a to gaba e bol Da Vwel, a sé tosho, ko a ra won na yɛ, na a ro nengyas de Haman, wo yerê Agak, a kana yong e ra BeYuda.

⁴Da Vwel a hwo nára a Ɛsta gwele mɛ gwo dyam shinang, Ɛsta kwong a sogo, a tumal e nuyel mɛ.

⁵A ye, “À darwey, ka sede hwà di a jam a hwo ano, ko ka sede ma pɛngɛ a hwo yey, ko hwà di a sé naka na be ra ano, ko tik na be to jɛk redu rehak, na be bin gang mɛ nengyas de Haman Hamedata, wo yerê Agak, a ga kana yong, na be wey na BeYuda mwa de ba sé e ji bavwêl begbɔng begwɔ̀m e ji mwa yɛnɛ̂ vwel mō.

⁶E rɛ̌ de mê sangal yuu, na me bɛrɛng gawey yerê hemo he gaba e ra yere hom ɛ? E rɛ̌ de mê niri, na me bɛrɛng, ba sé wey na bemat hom ɛ?”

⁷Ko Da Vwel Ahasɛrus a yâng Hwārwey Ɛsta tanga Mɔrdɛkai WoYuda, “Di in, ma ga nɔ̂ng Ɛsta lɔ Haman mwa na pyɛ̂ nedanelɔ mɛ, ko ma ga tɛ̀, be luga hɛ e ra swesêk cɔgɔt, yaga a ga simo a wey na BeYuda.

⁸Ko redu de ba ga jɛk e ji reza hom, na be rusu ɛ yɔbɔ̂ to hom, be tɔk mɔrɔ rɛ wɛt. Mwa ano, yin ê tɔk jɛk redu rehak e ji reza hom, na yin rusu ɛ yɔbɔ̂ to hom, na be dul mɛ wêy BeYuda. Ra in pyɛ de yin a di ya sé tyɛng.”

⁹E pɔlɔ hê kuru baba na hɛ tat (23), e pwɛl gwô netat, pwɛ̂l Sivan à gwane, Mɔrdɛkai a vɛ̌ yishi bemat-jɛ̂k Da Vwel. A ha a yɛn, ko yɛn e raa be jɛk e bebok-berang vɔk na BeYuda, na bemât nuyel, na begwɔmna, na begbɔng begwɔ̀m bavwel naga na kuru baba na vɛ betaama (127) yi e Indya vɔk e Etiyopya. Ba jɛk a kavɛ bemât bavwel na yerê gwông jɛk mɛn tanga yerê lem mɛn, ko ba to jɛk a BeYuda e yerê jɛk mɛn, e relem mɛn arɔng.

¹⁰Ba jɛk bebok-berang e ji rezâ Da Vwel Ahasɛrus, ba rusu ɛ tô gwɔ̀m na yɔbɔ̂ Da Vwel. Ba tomo mɛ̀ betom e ra bedwâ lɔ Da Vwel, ko ba tele mɛ ziri. Redu de ba jɛk a ret ngan:

¹¹“Da Vwel a simo a BeYuda e karɛ repomo, na be tula hɛn, be gyeng bato mɛn yi e bemat de ba rɔda wɔ̀ hwo ɛn. Ka sede kavɛ bemat e vwêl gbɔng gwɔ̀m hak ba hwo ɛn, a simo a yɛn, yɛn a mɔbɔs, yɛn a wey, na yɛn a tala beras de ba vɔk pyɛ̂ yol mwa na beha mɛn tanga nèy mɛn hywiri. Bē hashe yas na pyɛ́ mɛn mwa arɔng.

¹²Ba rɔda ra pyɛ́ yemo e mwa yɛnɛ̂ vwêl Da Vwel Ahasɛrus e tuk hining, hɛ à tuk hê pɔlɔ kuru na hɛ tat e pwɛl gwô kuru na vɛ ba, gwɛ a pwɛ̂l Adar.”

¹³Ba tɛ̀ bemât nuyel e kawɛ bak vwel, be tɛ̀ be mok a bemat mwa pyɛ́ de ba jɛk o, na ye tɛ́ ɛ redu, yaga na BeYuda be bin sè e yong ɛn tuk hane mo, na yɛn a bin tala a vê repugu mɛn pyɔ̌n neves mɛn.

¹⁴Betom o ba jut bedwâ Da Vwel de be tele tyɔng wɛt, ba nára hɛn mɛ ziri, sede remo de Da Vwel a nɔng nu. Ko ba mok redu mo e ji majêy lɔ Da Vwel e gbɔng repomô Shushan arɔng.

¹⁵Mɔrdɛkai kwong a nusu yi e nuyêl Da Vwel na berugû negwɔm de bà sé wilwil, na behak bepɛng o arɔng, na gbɔng bong negwɔm wo dyam shinang e rato mɛ, a to tɛ̀ gwogbɔng gworugu de ba lɔk na wuulu zwey na linen puruk. Ko bemât gbɔng repomô Shushan ba ra nzem yey pyɛng.

¹⁶A yâng BeYuda lɔ̀ɔ, a yang ɛn rwat, yɛn a vɔk yey pyɛng sizɔng. Ko yɛn a sɛ̀ nerey arɔng.

¹⁷E kahɛ vwêl gbɔng gwɔ̀m na e karɛ repomo na e kahɛ kwɔn de redu Da Vwel ra wɔ̀ wul ɛ, BeYuda ba wok neta, ko ba vɔk yey pyɛng sizɔng, ba ra nzem rê pyɛ́ tanga jɔgɔ. Ko bemat pyak vê yére dyuk ba tɛ́ ɛn BeYuda, yaga bengyip mɛn ba vo ɛn.