Read berom Ɛsta 9 Bible Online

Ɛsta 9 - berom bible

Ɛsta 9

¹A vane ano, e tûk pɔlɔ kuru na hɛ tat e pwɛl gwô kuru na vɛ ba, gwɛ a pwɛ̂l Adar, tuk a hane de ba rɔda sila redu Da Vwel. E tuk o, vê repugû BeYuda ba ga kana sɛt yey mɛn, na be sɛ̀ reto e ra yɛn, ko pyɛ mo ya doyo hɛ karibit, yaga e BeYuda e negya de ba hwo e ra vê repugu mɛn.

²E karɛ repomo de BeYuda ba sɛ́ ɛ e bebak mwa vê yɛnɛ̂ vwêl Da Vwel Ahasɛrus, ba tula hɛn, na be bin man gèy na bemat de ba simo hwo e ra yɛn. Ko vit a mwat de a vɔk yey-ting, na a tumal a man gèy na yɛn, yaga bengyip mɛn ba hwo e ra mwa bwang bemât yére dyuk.

³Mwa bemât nuyel ve bebak vwel mwa, vɛ a begbɔng begwɔ̀m na begwɔmna tanga bemât badu Da Vwel, ba raa BeYuda, yaga bengyip Mɔrdɛkai ba ga vo ɛn.

⁴Mwin, Mɔrdɛkai a gwɛ̌ sɛ̀ nerey e lɔ Da Vwel, reto mɛ ra gwɛsɛ hɛ, ko reza mɛ ra gwɛ̌ karak e mwa bavwêl begbɔng begwɔ̀m arɔng.

⁵Ano de BeYuda ba ra a bemât repugu mɛn pyɛ de yey mɛn ya simo. Ba tow ɛn mwa na bewal, ba mɔbɔs hɛn, ko ba wey na yɛn pyɛt.

⁶E ji majêy lɔ Da Vwel e gbɔng repomô Shushan zɔng BeYuda ba wey na bemat naga betungun (500).

⁷Yɛn a to mɔbɔs ɛ nèy Haman Hamedata, wò repugû BeYuda, kuru. Nɛ̀ a Parshandata, na Dalfɔn, na Aspata,

⁸na Porata, na Adaliya, na Aridata,

⁹na Parmashta, na Arisai, na Aridai tanga Vaizata.

¹⁰Ko yɛn a ka jut pyɛ̂ bemât repugu mɛn cak wɛt.

¹¹Ba ha a Da Vwel o nepyak bemat de ba mɔbɔs e ji gbɔng repomô Shushan tuk hane mo.

¹²Ko a ha na Ɛsta, a ye, “E ji gbɔng repomô Shushan zɔng BeYuda ba ga wey na bemat naga betungun tanga nèy Haman kuru. Ko sɛ̌ ba wey na bemat o ala e bwang bebak vwel o ɛ! Ko a remo, e wôn sɛ́ de hwô to ra ɛ? Ba rɔda nɔng o. Hwô simo sɛ́ ɛ? Bê ra a hwo yɛ.”

¹³Ko Ɛsta a toyo a yɛ, a ye, “À darwey, ka sede a jam a hwo, tik na hwo nɔ̂ng BeYuda vê Shushan reto, na be to ba ra nahwol pyɛ de ba simo a yɛn, be ra yunung. Ko tik na be ló bavîn nèy Haman nane kuru e ra sesêk cɔ́gɔt arɔng.”

¹⁴Da Vwel kwong a nɔng nu, be ra ano. Ba tɛ̀ redu e gbɔng repomô Shushan, ko ba ló bavîn nèy Haman nane kuru e ra cɔ́gɔt.

¹⁵BeYuda vê Shushan ba to tula hɛn e tûk kuru na hɛ naas hê pwɛ̂l Adar, ko ba mɔbɔs bemat naga betat (300), ko yɛn a ka jut pyɛ mɛn cak wɛt.

¹⁶BeYuda de ba sè e bwang bebak bavwêl Da Vwel ba tula hɛn arɔng, na be dul bato mɛn. Yɛn a wey na bemat gu kuru bataama na vɛ batungun (75,000), ko yɛn a ka jut pyɛ mɛn cak wɛt. Ano yɛn a pɔnglɔ yi na bemât repugu mɛn.

¹⁷Ba ra ano e tûk kuru na hɛ tat hê pwɛ̂l Adar. Ko tuk hê kuru na hɛ naas, yɛn a pɔng, ko yɛn a tɛ̀ hɛ, he tɛ́ ɛ tûk nzem rê pyɛ́ na jɔgɔ̂ yey pyɛng.

¹⁸Pyɛ ma yemo de ya tɛ̀, BeYuda de ba sangal e nebapomo nesɛl tanga e nehey, be tɛ̀ tûk kuru na hɛ naas hê pwɛ̂l Adar he sè tûk nzem rê pyɛ́ na jɔgɔ̂ yey pyɛng, ko e tuk o be tomsal a bemɛn nenɔrɔ̂ pyɛ̂ cwey o arɔng. Ko BeYuda vê gbɔng repomô Shushan ba ga tula hɛn e negasî pwɛ̂l kuru na nɛ̀ netat tanga nɛ̀ nenaas, ba dul bato mɛn, ko e tuk hê kuru na hɛ tungun, yɛn a pɔng, ko yɛn a tɛ̀ hɛ, he tɛ́ ɛ tûk nzem rê pyɛ́ na jɔgɔ̂ yey pyɛng.

²⁰Mɔrdɛkai a tɛ̀, be jɛk pyɛ́ yane mwa, ko a tomo na yɛ̄ e bwok-rwang vɔk na BeYuda e yɛnɛ̂ vwêl mwa hê Da Vwel Ahasɛrus, hê bagat na hê yikyik.

²¹E ji mo, a nɔng ɛn nu, be tɛ̀ tuk hê kuru na hɛ naas tanga hê kuru na hɛ tungun nè pwɛ̂l Adar ne tɛ́ ɛn negasî nzem kahɛ shey.

²²Negasi ma nane de BeYuda ba sɛ̀ pɔnglɔ yi na bemât repugu mɛn. Pwɛl a gwane arɔng de lashê yey mɛn ha tɛ́ ɛ yey pyɛng, sesin mɛn sa tɛ́ ɛ lwɛlɛ̂ yey pyɛng. A jɛk a yɛn, na yɛn a gyenges negasi mo ne sè negasî nzem rê pyɛ́ na jɔgɔ̂ yey pyɛng, na be to tomsal a bemɛn na nenɔrɔ̂ pyɛ̂ cwey, ko be nɔngɔ̂s bepɛng nenɔrɔ arɔng.

²³Ano kwong, BeYuda ba ra tyɛng pyɛ de Mɔrdɛkai a kana jɛk a yɛn. Ba re nuyel na ragas nzem de yɛn a kana susu mo kahɛ shey.

²⁴Ba yi mɛ, yaga Haman Hamedata wò cang Agak, mwât repugû mwa BeYuda, à kana yong gwông nengyas, na a wey na BeYuda mwa. Yaga ano, a ra purim — wɔgɔ, a masa sesek yaga na a bin sɛ̀ tuk de bê wey na yɛn.

²⁵Ko jeng de Da Vwel a wok hâ nengyas o, a hwo nɔng redu e jɛk wɔgɔ, nengyas de Haman a yong e ra BeYuda ne to ɛ e rato mɛ. Ko ba ló ɛn, yɛ tanga nèy mɛ, e ra sesek cɔ́gɔt.

²⁶Yaga ano, ba vo a negasi nane rezâ Purim, yi na retîn ha rane, “purim.” Yaga kayɛ pyɛ de Mɔrdɛkai a jɛk e ji bwok-rwang o tanga pyɛ́ de ya ga té na yɛn,

²⁷BeYuda mo ba di a jam, ko a sé a yɛn gbing-gbing, na yɛn tanga yére mɛn, na mwa vemo de bê tɛ́ ɛn BeYuda arɔng, be gyenges negasi neba nane kahɛ shey, tyɛng e gwong de ba jɛk, tyɛng e jeng o arɔng.

²⁸Ba tɛ̀, BeYuda e kahɛ lɔ wɔ̀ sɛ̀ mɛ nezamang mɛn, e kahɛ vwêl gbɔng gwɔ̀m, na e karɛ repomo be bare na be to gyenges negasi mo. Gbing-gbing BeYuda be kwon ye bam a nepɔlɔ̂ Nzem Purim nemo e nuyel wɛt.

²⁹E bama mo, Hwārwey Ɛsta, hwông Abihail, a to jɛk na mwa retô negwɔm mɛ bwok-rwang hwak e ra rehâ Nzem Purim, na a to gwɛ̌ a bwok-rwang de Mɔrdɛkai a ga kana jɛk gap. Yɛn a tɛ̀ vwɔ tanga Mɔrdɛkai.

³⁰Ba tomo na bwok-rwang o vɔk na mwa BeYuda de ba sé sangal e bavwêl begbɔng begwɔ̀m naga kuru baba na vɛ bataama vê mwa yɛnɛ̂ vwêl Da Vwel Ahasɛrus. E ji mo, ba jɛk ɛ rehâ sangâl netyang tanga yêy dyɛngɛ.

³¹Ba to nɔ̂ng BeYuda nu, yaga na yɛn tanga yére mɛn be gyenges negasî Purim nemo tyɛng e jeng nɛ̀, sede remo de Mɔrdɛkai, WoYuda, tanga Hwārwey Ɛsta ba nɔng ɛn nu e ra nɛ̀. Be gyenges nɛ arɔng sede remo de yɛn pyɛ mɛn ba tɛ̀ a bato mɛn ɛ tanga yére mɛn jeng tik rê pyɛ́ tanga jeng sesin.

³²Redu de Ɛsta a tɛ̀, ra nɔ̂ng badu Nzem Purim reto, ko ba to jɛk rɛ e ji bwok-basa, na be bare na rɛ.