Read berom Nusu 1 Bible Online

Nusu 1 - berom bible

Nusu 1

¹Nèy Yakɔp, womo de be tang ɛ, à Israyɛl arɔng, na kyè vɔk e sevwêl Misra tanga yɛ; kahɛ mo tanga belɔ mɛ, nɛ

²À Rubɛn, na Simɛyɔn, na Levi, na Yuda,

³na Isakar, na Zɛbulun, na Bɛnyamin,

⁴na Dan, na Naftali, na Gat tanga Ashɛr.

⁵Nepyak yerê Yakɔp mwa na sè kuru bataama. Hwey mɛ Yɔsɛf há kana sè e Misra.

⁶E bamâ jeng, Yɔsɛf na begwa mɛ tanga bwang zamang hane ba kushu.

⁷Ko yere mɛn, yɛ à BeIsrayɛl, ya tɔs nèy, ya karak hɛ, ya gwɛsɛ hɛ ding-ding, sɛ̌ ya vɛ̌ ye ship a vwel mwa.

⁸Gbɔng gwɔ̀m hwak a hwo re negwɔm Misra; yɛ a kana tɔk pyɛ cak e ra Yɔsɛf wɛt.

⁹A hwo yâng bemat mɛ, “Di in, BeIsrayɛl vemo ba ga gwɛ̌ hɛn ding-ding, ba ga tɛ́ ɛn pyɛ sap na wot.

¹⁰Gbing-gbing wot jāma begwong, de wot ê dul ɛn, nà to gwɛsɛ nepyak mɛn. Yaga ka ba hwo e ra wot na como, gyeng yɛn ê wuna to na bemât repugu mot, na be tó como na wot, yi ano, yɛn a rɔda vɔk negwɔm e ra sevwel o.”[1]

¹¹Yaga ano, BeMisra ba tɛ̀ a BeIsrayɛl bemât nuyel e ra yɛn, na be midra hɛn na fwom gbing-gbing. Ba lɔk bapomô Pitɔm na Ramɛsɛs de ba vɔk begbɔng begban Farawo e ji vɛ.

¹²Ko sede BeMisra ba gwɛ̌ tak a yɛn reyɔm, ko BeIsrayɛl o ba gwɛsɛ hɛn zɔng, ba gwɛ̌ shara hɛn. Yaga ano, BeMisra ba hwo sap BeIsrayɛl,

¹³ko ba gwɛ̌ tɛ̀ ɛn, be ra fwom pwep, yaga na sangal he sè a yɛn kpashak. Ba tɛ̀ ɛn, be tow sebwos, be luk sē, na be yong mɛ̀ bagat bwos. Ano arɔng yɛn a ragas kagwɛ fwôm hey. Ba wok nemwishish mɛn wɛt.

¹⁵E bamâ hane, Farawo a tomo be yila a yɛ Shifra na Puwa, behâ sɛlɛ̂ behâ tɔ̂ BeIbrani wɔgɔ, BeIsrayɛl, a ha na yɛn, a ye,

¹⁶“Jeng de yin a sé ra fwôm sɛlɛ, ko yin a di hwâ BeIbrani a sé e ra bakwot mɛ na a tɔ, ka a tɔ hwey wen, ko yin mɔrɔ hɛ; ko ka sede e hwong o, ko yin tik hɛ na neken.”

¹⁷Behâ sɛlɛ mo ba vɔk bengyip Dagwi, ko yɛn a ra fwom na redu gbɔng gwɔ̀m o wɛt, ba tik nèy bewen o na neken.

¹⁸Yaga ano, Farawo a tomo be yila a yɛ behâ sɛlɛ mo, a rangal hɛn, “Yaga sɛ́ de yin a sé ra ano arɛt? Yaga sɛ́ de yin e tikis nèy bewen na neken ɛ?”

¹⁹Behâ sɛlɛ ba toyo a yɛ, ba ye, “Behâ BeIbrani ba sé sede behâ BeMisra wɛt, be tɔ vit a yɔ́m. Gyam na hwak e ji bemât sɛlɛ a wul, ba ga kana tɔ.”

²⁰Ko BeIsrayɛl ba karak, ba gwɛsɛ hɛn ding-ding. Dagwi kwong a nɔ̂ng behâ sɛlɛ mo nerat.

²¹A nɔng ɛn yére pyak, yaga yɛn a vɔk bengyip mɛ.

²²E bama de Farawo a di ano, a nɔ̂ng bemat mɛ mwa nu, a ye, “Werek hin kahɛ hwey wen de ba tɔ a BeIbrani, e Gwɔrɔt Nil; ko kahɛ hwey hwong, yin tik hɛ ken.”