Read berom Nusu 10 Bible Online

Nusu 10 - berom bible

Nusu 10

¹Dagwi Darwey a yâng Mose, “Ci na Farawo! Me, ma ga tɛ̀ yey mɛ tanga yê bemât badu mɛ gbarak. Ma ra ano, na me bin dura mɛ tomông bes hom vemo e ji mɛn,

²na hwo ba tɔk há a nèy mō tanga nèy nèy mō, gwong de ma dura a BeMisra rezot, na pyɛ̂ bes de ma ra e ji mɛn. Yi ano, yin a rɔda tɔk, me wɛ à Dagwi Darwey.”

³Ano kwong, Mose tanga Aharon ba wɔ́ na Farawo, ba yang ɛ, “Dagwi Darwey, Dagwi wo BeIbrani, a ye ngan: ‘Vɔk e yɛ̌ jeng de hwô kyɛ́ o nà dyɛng to mō vey na me arɛt? Hàla bemat hom, be kyè wɔ̀ re a me fongol.

⁴Ka sede hwà simo, hwo hàla hɛn be kyè wɛt, ko nahwol, ma rɔda pat rawal vey e ji yɛnɛ̂ sevwel mō.

⁵Wa rɔda ye ship a vwel o, vit a mwat de ê tɔk di hɛ wɛt. Wa rɔda re bwang pyɛ́ de ya tɛt a yin ɛ e bamâ fwala, wô re mwa batîn berang de ba sé ras e hiri min arɔng.

⁶Rawal o wô sila nelɔ mō, na nelɔ mwa bemât badu mō tanga ne bemât Misra mwa. Wô sè winde beda mō na bedabeda mō ba ga sang di yere mo wɛt yimo tûk tɔ́ mɛn vey e remo.’ ” E bama mo, Mose a doyo, a kyè.

⁷Bemât badu Farawo ba yang ɛ, “Vɔk e yɛ̌ jeng de mwat womo ê dopse vɛ̀sɛ a wot na reyɔm arɛt? Tik bemat o be kyè wɔ̀ re a Dagwi Darwey, Dagwi mɛn fongol! Pere vey e jeng yemo hwà di, Misra wa ga wey wɛt arɛt?”

⁸Ano kwong, ba to toyo na Mose tanga Aharon vey na Farawo, ko a yang ɛn, “Kyè in, wɔ̀ re a Dagwi Darwey, Dagwi min, fongol. Me ye ngan, e beva vɛ de bê wɔ ɛ?”

⁹Mose a toyo a yɛ, a ye, “Wot ê kyè mwa, bebot bemat na bemakuk, bewen na behwong, tanga karâ vyēl na berɔndɔng mot. Gwong a gwomo de gwa jam, na wot wɔ̀ ra a Dagwi Darwey nzem.”

¹⁰Farawo a yang ɛn, “Show in, Dagwi a tɛ̀ a yin nerat, ka sede ma tik in, yin kyè na beha tanga nèy min! Ma ga di, pyɛ min o ya sé detu.

¹¹Wey! Yin beras zɔng yin kyè, na yin wɔ̀ re a Dagwi Darwey fongol, remo de e pyɛ de yin e simo a yane.” Ko a tɛ̀, ba ro Mose tanga Aharon yi e nuyel mɛ.

¹²Ko Dagwi Darwey a yâng Mose, “Nára vwɔ mō e ra sevwêl Misra, na rawal wo bin vey, na wo re kayɛ pyɛ pyɛt de fwala ha tɛt ɛ.”

¹³Ano kwong, Mose a nára gwele mɛ e ra vwêl Misra, ko Dagwi Darwey a tomo na gûl rak, gwa woshô pɛsɛl nagwi na naturuk. Jeng de gasi ha ye gbey, ko gwa ga vey na rawal.

¹⁴Rawal o wa hwo e vwêl Misra mwa, wa sangal e yɛnɛ̂ hɛ, wa man tyɔng wɛt. Ba ga sang di rawal wo man ano wɛt, ko bê to ba di wɛ ano arɔng wɛt.

¹⁵Rawal o wa ye ship a vwel o mwa, wa tɛ̀ jey ya sè mwangalang, ko wa re mwa pyɛ́ de ba tus mwa na nèy cɔ́gɔt de fwala gwa tɛt ɛ. Vit a bwang pyɛ cak de ya tɛt ɛ sede sɔng kɛ berang e sevwêl Misra mwa.

¹⁶Ko Farawo a tomo, be vey na Mose tanga Aharon ziri, a yang ɛn, “Ma ga ra nɛn na Dagwi Darwey, Dagwi min, na yin arɔng.

¹⁷Hàla a me hin nɛn hom zɔng, ko ra in won na Dagwi Darwey, Dagwi min, na a gas me na reku remo.”

¹⁸Mose a nusu yi na Farawo, ko a wɔ̀ ra won na Dagwi Darwey.

¹⁹Ko Dagwi Darwey kwong a doyo na gûl ta, a tɛ̀ gwa yi na gap ding-ding, gwa pere wɔ̀ tusa rawal o, gwa wɔ̀ gang wɛ e Gbɔng Rep Sere, vit à rawal gwining de wa to tɛt ɛ e yɛnɛ̂ sevwêl Misra.

²⁰Ko Dagwi Darwey a tɛ̀ yêy Farawo kashalang, a kyɛ́ ɛ nà hàla BeIsrayɛl be nusu.

²¹Dagwi Darwey a yâng Mose, “Nára vwɔ mō e lagwi, yaga na lwīl gwo bin vey e ra sevwêl Misra, yerê lwīl de bê mɔgɔm begwong.”

²²Mose a nára vwɔ mɛ e lagwi, ko lwīl tíbit gwa hwo e ra sevwêl Misra mwa nepɔlɔ netat.

²³Bemat ba tɔk di bemɛn wɛt, ko e ji nepɔlɔ netat nane, vit a mwat de a tɔk ye yɛk-yɛk yi e kwɔn de a kana sé ɛ. Ko BeIsrayɛl bá sè wok netâ negbey e bak vwel de yɛn a sangal ɛ.

²⁴Farawo kwong a tomo, be vey na Mose, ko a yang ɛ, “Ci in, wɔ̀ re in a Dagwi Darwey fongol. Yin ê tɔk kyè na belɔ min, sɛ̌ karâ vyēl na berɔndɔng min zɔng de yin ê tik vɛ e ngamo!”

²⁵Ko Mose a ye, “Ko sɛ̌ hwo wɛ hwô nɔng ot yas o ā rè, de wot ê nára mɛ yerê nenɔrɔ̂ yas de be yɛt vɔk na Dagwi Darwey, Dagwi mot, arɛt?

²⁶Wey, wot ê kyè nà yas mot mwa, ko wot ê ka tik ɛ ko jining wɛt! Wot pyɛ mot wot ê kasa e ji yɛ, na wot nára nɔrɔ mo vɔk na Dagwi Darwey, Dagwi mot. Ko wot ê ka tɔk pyɛ de wot ê nɔng mɛ nɔrɔ mo wɛt, sɛ̌ wot a wul kwɔn o e ngyen.”

²⁷Ko Dagwi Darwey a tɛ̀ yêy Farawo kashalang, a simo hàla bemat o be kyè wɛt.

²⁸Farawo a yâng Mose, “Kyè e jey! Tē naka, me to di bayis mō wɛt! Tuk de hwà ba man bayis na me, hwô ku!”

²⁹Mose a toyo a yɛ, a yang ɛ, “Ha mō ha gaba ɛ̀ tyɛng, hwô to di bayis hom wɛt!”