Read berom Nusu 11 Bible Online

Nusu 11 - berom bible

Nusu 11

¹Dagwi Darwey a yâng Mose, “Ma rɔda to vey a Farawo tanga BeMisra na tumbang wo yɛnɛ mo. E bama mo, yɛ a rɔda hàla hin, yin kyè yi e ngamo. Mwin, ê hàla hin zɔng wɛt, ko a rɔda ro in.

²Yaga ano, há a BeIsrayɛl, na kawɛ rwas na hwā e ji mɛn be rangâl bemât vwara mɛn pyɛ̂ dyam pyɛng na dyam shinang.”

³Dagwi Darwey a tɛ̀ BeMisra, be dura a BeIsrayɛl nerat; ko Mose a sɛ̀ gbɔng nerey e bayîs bemât badu Farawo tanga bemât mwa.

⁴Mose a yâng Farawo, “Dagwi Darwey a ye ngan: ‘Vɔk e rwa nakabadem ma rɔda kwey e Misra mwa,

⁵ko kahɛ hwêy negel ha rɔda ku, yi e hwêy negel Farawo de a sé re negwɔm wɔ̀ sɛ̀ mɛ hwêy negel sam hwong de a sé ra fwôm hwongo, mwa na tɔ̂ mɛsɛng yê yas arɔng.

⁶Ba rɔda tosho ding-ding e sevwêl Misra mwa, yerê sesin de ba ga sang ra wɛt, ko ba rɔda to ba ra sɛ arɔng wɛt.

⁷Ko e ji bak BeIsrayɛl bê wok fwɔ̂ mwasi kɛ ngyama wɛt mwa na bû vu. Yi ano, yin a rɔda tɔk, me Dagwi Darwey, mê gas tê BeMisra na BeIsrayɛl.’ ”

⁸Ko Mose a re nuyel na ha, a yâng Farawo, “Bemât badu mō mwa ba rɔda vey na me, ba rɔda gaba e cât bol hom, be ra won, na me kyè na bemat de be raa me mwa! Ko mê kyè.” E bamâ neha nane, Mose a nusu yi na Farawo na shom sizɔng.

⁹Dagwi Darwey a kana ha a Mose, a ye, “Farawo a rɔda kyɛ́ ɛ nà wok o, yaga na me gwɛ̌ ra pyɛ̂ bes hom e sevwêl Misra.”

¹⁰Mose na Aharon ba ra mwa pyɛ̂ bes yemo e nuyêl Farawo, ko Dagwi Darwey a tɛ̀ yêy Farawo kashalang, a hàla BeIsrayɛl, na be nusu yi e sevwel mɛ wɛt.