Read berom Nusu 12 Bible Online

Nusu 12 - berom bible

Nusu 12

¹Dagwi Darwey a yâng Mose na Aharon e sevwêl Misra:

²“Pwɛl gwomo gwô sè pwɛ̂l susu e ji pɛl, gwô sè a yin gwô susu mo e ji shey.

³Há a regyɛng BeIsrayɛl mwa wɔgɔ, e ji pwɛl gwomo na pɔlɔ kuru, kawɛ dalɔ a rɔda jut kebot vyel kining, yaga mwa belɔ mɛ.

⁴Ko ka sede belɔ mo ba sé tyɔng de bê tɔk re kevyel o mwa wɛt, ko yɛ̀ a sɛ̀ dalɔ̂ vwara mɛ hwak, be wuna vɔ e ra kevyel o, be bara na nepyak mɛn. Be wuna vɔ e ra kevyel o tyɛng na pyɛ de kahɛ lɔ hɛ̂ tɔk re.

⁵Vyel o yê sè ryat o vit a rām, gam kɛ turuk wo shey hining:

⁶“Bê gyeng yɛ naka vɔk e tuk hê kuru na hɛ naas hê pwɛl gwomo, ko tuk a nane de regyɛng BeIsrayɛl mwa bê yɛt vyēl mɛn o e rwa nawiri.

⁷Yɛn ê vɛ nemi mo, na be mɔmɔ nɛ e ra cɔ́gɔt bedwâ rwi duk vê bahagat na yê gàk o, yê nelɔ de bê re ɛ banamâ vyel o.

⁸Yɛn ê rangas banama mo, ko bê re vɛ e ji naturuk hane mo. Bê wuna vɛ na kpam-tuk sana géy-sing tanga berang de ba sé kpashak.

⁹Yin kwon re bahak e ji vɛ baven o wɛt, kɛ yin kyé vɛ na nshi arɔng wɛt. Bē rangas vɛ mwa na to mo, na bol o tanga pyɛ̂ jim o.

¹⁰Yin kwon tɛt ɛ pyɛ mo cak vɔk e nagasi wɛt. Ko ka bwang o gwa dal, ko yin tɛ̀ kya he re gwɛ hywiri.

¹¹Gyam na yin re, yong in yɔ̀m min yaga kwɛngɛl, tɛ̀ in bekpatak min, vɔk in begele min e vɔ, ko re in pyɛ́ mo sɔ̀k-sɔk. A sé e nzem gyilsit nelɔ de bê nɔng me Dagwi Darwey mɛ nerey.

¹²“E ji turuk hane, mê kwey mwa sevwêl Misra, na me wey na kayɛ pyɛ de ba tɔ yɛ e mɛsɛng o, ye mwasi na ye ngyama, ko mê ra a mwa bedagwî Misra shɔt. Me wɛ à Dagwi Darwey.

¹³Nemi de na sé e nelɔ de yin a sangal ɛ nê sè pyɛ dura. Sede ma di nemi, ko ma rɔda gyilsit nelɔ min, ko tumbang hwak wa rɔda wey na yin wɛt, jeng de ma rɔda tabak BeMisra.

¹⁴Tuk hane ha rɔda sè pyɛ bare na yin. Yin ê ragas nzem e hɛ vey na me, Dagwi Darwey. Ha rɔda tɛ́ ɛ tuk nzem de yin ê ragas nesheneshey.

¹⁵“Re in kpam-tuk sana géy-sing nepɔlɔ netaama. Tuk hê susu mo, paa in géy-sing yi e nelɔ min, yaga kawɛ de ê re pyɛ de ya vɔk ɛ géy-sing, yi e tûk susu mo vɔk e hê netaama mo, wane a ga row neken mɛ, bê ro ɛ yi e ji BeIsrayɛl.

¹⁶E tuk hê susu mo na hê netaama, yin tula hin, na yin re a me fongol. Vit à râ fwom ko tyɔng e hɛ, sɛ̌ yɛnɛ̂ pyɛ́ de kawɛ mwat ê re de bê yong zɔng.

¹⁷Gyenges hin tûk Nzem Kpam-tuk Sana Géy-sing, yaga e hɛ a tuk de ma pat mwa hin yi e sevwêl Misra bagyɛng o bagyɛng o. Mwa nezamang min ne gyenges nzem nemo, na ga tɛ́ ɛ redu.

¹⁸Yi e nawiri ne tuk hê kuru na hɛ naas vɔk e hê kuru baba na hɛ hining hê pwɛ̂l susu mo, yin re kpam-tuk sana géy-sing.

¹⁹Be sɛ̀ géy-sing e nelɔ min e nepɔlɔ netaama nane mo wɛt, yaga kawɛ mwat de a re pyɛ de ba tɛ̀ géy-sing, mwat wane a ga row neken mɛ, bê ro ɛ yi e regyɛng BeIsrayɛl, kɛ a sé kwɛnɛt kɛ a sé mwât vwel o ayi.

²⁰E kahɛ kwɔn de yin ê sangal ɛ, mwat hwak a kwon re pyɛ cak de ya vɔk ɛ géy-sing wɛt.”

²¹Mose a tula mwa bemakûk Israyɛl, a yang ɛn, “Kyè in, na kawɛ a wɔ̀ kasa bwot gam kɛ turuk yaga belɔ mɛ, na yin yɛt vɛ yaga nzem gyilsit nelɔ.

²²Sɛt in ɛ gwoshi, na yin vɛ nemi mo, ko vɛ in vwɔ̂ gwɛ̂s hísɔ̀p, na yin gyira e ji nemi mo, na yin mɔmɔ nɛ e ra cɔgɔt ye gàk rwi duk tanga e ra yê bedwâ rwi duk o arɔng. Hwak e ji min a to nusu e rwi lɔ mɛ wɛt sɛ̌ nagasi.

²³Yaga jeng de Dagwi Darwey a rɔda kwey wɔ̀ mɔbɔs BeMisra, a rɔda di nemi e ra cɔgɔt ye gàk rwi duk tanga yê bedwa mo, a rɔda gyili nelɔ mo, ko a rɔda tik tom-lagwi wo wey na bemat a yel e ji nelɔ min, na a wey na yin wɛt.

²⁴“Gyeng in yɛgɛ̂t badu vemo, yin na yére min nesheneshey.

²⁵Jeng de yin ê yel e sevwel de Dagwi Darwey a rɔda nɔng in, sede remo de a ga kana sira hɛ, tik na yin gyeng negwɔn o.

²⁶Jeng de nèy min ne ba rangal hin, ‘Tîn gyêng negwɔn nemo mo hɛ a sɛ́ arɛt?’

²⁷Ko yin a rɔda ye, ‘A sé e nɔrɔ̂ rangâs yas de be yɛt vɔk na Dagwi Darwey, yaga a gyilsit nelɔ BeIsrayɛl e Misra, jeng de á wey na BeMisra, ko á sey nelɔ mot.’ ” BeIsrayɛl kwong ba ye guduruk, na be re a Dagwi fongol.

²⁸Ba kyè ba wɔ̀ ra tyɛng na pyɛ de Dagwi Darwey a nɔ̂ng Mose na Aharon nu.

²⁹Nakabadem, Dagwi Darwey a wey na nèy negel mwa de na sé e ji Misra, yi e hwêy negel Farawo de a sé re negwɔm wɔ̀ sɛ̀ hwêy negel de da mɛ a sé e lɔ̂ ngyang, mwa na tɔ̂ mɛsɛng hê yas arɔng.

³⁰Farawo, yɛ na bemât badu mɛ tanga BeMisra mwa, ba sene naturuk, ko rewɔ̂ng sesin ra hwo e Misra, yaga vit a lɔ de mwat a tik nà ku ɛ.

³¹Farawo a tɛ̀, ba vey a yɛ na Mose na Aharon e ji naturuk o, ko a yang ɛn, “Kyè in, nusu hin yi e ji bemat hom, yin na BeIsrayɛl min. Kyè in wɔ̀ re in a Dagwi Darwey fongol, sede remo de yin a ga nàra e de rangsal o! Jut in karâ vyēl na berɔndɔng min, na yin kyè! Ko yang in Dagwi min, a tɛ̀ nerat e ra me arɔng!”

³²

³³BeMisra ba shonong bemat o, be nusu dey-dey yi e sevwel o, ba ye, “Ka yin a kyè wɛt, ko wot mwa wot ê kushu!”

³⁴BeIsrayɛl kwong ba hashe nemuk kpam-tuk de ba ga kana bɔrɔk nɛ, ko ba rɔngɔl nà tɛ̀ géy-sing e nɛ, tanga bapêy yong wɛ, ba rɔgɔs e ji berugû banga mɛn, ko ba gansa e ra basanat mɛn.

³⁵Yɛn a ga kana rangâl BeMisra pyɛ̂ dyam pyɛng na dyam shinang tanga berugu, sede remo de Mose a ga kana ha a yɛn.

³⁶Ko Dagwi Darwey a ga kana tɛ̀ BeMisra, be dura a BeIsrayɛl nerat. Yaga ano, yɛn a ga nɔngɔs hɛn pyɛ́ de bá rangsal. Yi ano, yɛn a seres ɛ̀ pyɛ̂ nedanerêy BeMisra.

³⁷BeIsrayɛl ba kaba kwɛngɛl yi e Ramɛsɛs vɔk e Sukɔt. Yɛn a wul sede bemat gu naga batyiimin (600,000) zɔgɔ beras, ba bara beha na nèy wɛt.

³⁸Bemat beduk pyak ba kyè tanga yɛn arɔng, ba nusu na yas pyak, karâ vyēl na berɔndɔng.

³⁹Yɛn a halang borô kpam-tuk na nemuk de bá kana bɔrɔk e Misra. Yɛn a kana vɔk jeng tɛ̂ géy-sing, na be to yong pyɛ́ yaga gwong wɛt, remo de ba pere ro ɛn yi e Misra.

⁴⁰BeIsrayɛl ba kana sangal e ji sevwêl Misra neshey naga benaas na kuru batat (430).

⁴¹Tuk de neshey nane mo na sila, tuk a hane de bemât Dagwi Darwey ba hàla sevwêl Misra bagyɛng o bagyɛng o.

⁴²E ji turuk hane mo, Dagwi Darwey a bɛrɛng nekanang, na a bin nusu na BeIsrayɛl yi e Misra. Yimo yi e jeng o, mwa bezamang BeIsrayɛl be bɛrɛng nekanang e turuk hane, yaga na be nɔ̂ng Dagwi Darwey nerey.

⁴³Dagwi Darwey a yâng Mose na Aharon, “Badu Nzem Gyilsit Nelɔ ma vet: Mwat dūk ê re pyɛ́ mo wɛt.

⁴⁴Ko kawɛ sam dūk de ba sey na dyam, ê tɔk re, ka sede ba ga kana wɔ́ a yɛ e cwɛl.

⁴⁵Mwat dūk de a ka sé sangal na yin tanga mwât fwôm sehwoyo dūk ba rɔda re wɛt.

⁴⁶Bē re pyɛ́ mo e lɔ de ba yong ɛ yɛ, be nusu na cɛ̂k nama mo cak vɔk e majey wɛt, be kwon kwɔrɔ kup o arɔng wɛt.

⁴⁷Tik na regyɛng BeIsrayɛl mwa be gyeng Nzem Gyilsit Nelɔ mo.

⁴⁸Ka sede mwat dūk de a sé e sangal e ji min, ko e simo a gyeng nzem gyilsit nelɔ vɔk na Dagwi Darwey, gbing-gbing be yosom beras mwa vê lɔ mɛ. E bama mo, bê jut ɛ hwêy vwel o, ko ê tɔk gyeng nzem o. Ko vit a mwat de ê re pyɛ́ mo, ka sede ba ga kana wɔ́ a yɛ e cwɛl wɛt.

⁴⁹Badu mo ba sé vining o e ra hwêy vwel tanga mwat dūk de a sé sangal e ji min, de ba ga wɔ́ a yɛ e cwɛl.”

⁵⁰BeIsrayɛl mwa ba ra tyɛng pyɛ de Dagwi Darwey a nɔ̂ng Mose na Aharon nu.

⁵¹E tuk hane, Dagwi Darwey a nusu na BeIsrayɛl bagyɛng o bagyɛng o yi e sevwêl Misra.