Read berom Nusu 13 Bible Online

Nusu 13 - berom bible

Nusu 13

¹Dagwi Darwey a yâng Mose,

²“Tík in a me jaram nèy negel bewen ne bemasi mwa na tɔ̂ mɛsɛng hê yas. Mwa nɛ na sé nenang.”

³Mose a yâng BeIsrayɛl, “Gyeng in tuk hemo de yin a nusu yi e Misra, e ji sesam. Bare hin na gwong de Dagwi Darwey a nusu na yin na vwɔ̂ gap mɛ yi e hwomo. Yin re kpam-tuk de wa vɔk ɛ géy-sing ko tyɔng wɛt.

⁴Yunung yin a sé nusu, e pwɛ̂l Avif.

⁵Dagwi Darwey à kana sira a bedabeda min, a rɔda nɔng in sevwêl BeKanaan, na BeHiti, na BeAmɔr tanga BeYebus. Vwel hemo ha siri naka, ha vɔk pyɛ́ shɛrɛk. Jeng de a rɔda wul na yin e hwomo, yin a rɔda gyeng Nzem Kpam-tuk Sana Géy-sing e ji pwɛl gwomo mo.

⁶Pɔlɔ taama yin re kpam-tuk sana géy-sing, ko tuk hê taama ha rɔda sè tuk nzem, na yin nɔ̂ng Dagwi Darwey nerey.

⁷E ji nepɔlɔ netaama mo, re in kpam-tuk sana géy-sing. Be sɛ̀ kpam-tuk na géy-sing kɛ gey sing e mwa yɛnɛ̂ sevwel min wɛt.

⁸E tuk hane mo, yin a rɔda misang a nèy bewen min ngan: ‘Wot a sé ra nzem nemo, na wot bare na pyɛ́ de Dagwi Darwey á ra a wot, jeng de á nusu na wot yi e Misra.’

⁹Negwɔn nemo nê sè pyɛ bare, sede pyɛ́ de yin e tɛ̀sɛ e vwɔ na e ratili min. Yê bare a yin, yin dopse basa, yin ngyɛgɛt e ji badu Dagwi Darwey yɛ de a nusu na yin na vwɔ̂ gap mɛ yi e Misra.

¹⁰Gyeng in nzem nemo kahɛ shey, tyɛng na jeng de ba ga tɛ̀.”

¹¹Mose a re nuyel na ha, a ye, “Dagwi Darwey a rɔda wul na yin e sevwêl BeKanaan, sede remo de á kana sira a yin na bedabeda min na sirâ mwin, ê nɔng in hɛ.

¹²E jeng o, tik in jaram yaga Dagwi Darwey kahɛ mɛsɛ̂ng tɔ. Kahɛ hwêy yas min hê mɛsɛng de ha sé mus, kɛ gam kɛ turuk, hê sè hê Dagwi Darwey, bê yɛrɛ hɛ be nára a yɛ mɛ nɔrɔ.

¹³Ko kahɛ hwêy madung rwas o, hê mɛsɛng de ba tɔ, viri hin hɛ na kevyel de yin ê nára kɛ nɔrɔ. Ka sede yin e simo sege hɛ wɛt, ko kwɔrɔ hin fwɔ̂ hɛ. Viri hin kahɛ hwêy negel wen e ji nèy min arɔng na kevyel de yin ê nára kɛ nɔrɔ.

¹⁴“Jeng yê ba vey de nèy bewen min nê rangal hin retîn negwɔn nemo. Ko yin a rɔda yang ɛn, ‘A sé yi na vwɔ̂ gap de Dagwi Darwey a nusu na wot yi e Misra, e ji sesam.

¹⁵Jeng de Farawo a tɛ̀ yey mɛ kashalang, a kyɛ́ ɛ nà hàla hot, ko Dagwi Darwey a wey na kahɛ hwêy negel e yɛnɛ̂ sevwêl Misra, hwey hê mwasi tanga hê yas. Yaga ano, wot e yɛrɛ kahɛ hwey tɔ̂ mɛsɛng de ha sé mus, kɛ gam kɛ turuk, na wot nára mɛ nɔrɔ vɔk na Dagwi, ko nèy negel bewen mot wot e viri na kevyel de wot e nára kɛ e nɔrɔ.’

¹⁶Negwɔn nemo na sé pyɛ bare, sede pyɛ́ de wot e tɛ̀sɛ e vwɔ na e ratili mot. Ye bare a wot wɔgɔ, yi na vwɔ̂ gap mɛ de Dagwi Darwey a nusu na wot yi e Misra.”

¹⁷Jeng de Farawo a hàla BeIsrayɛl, na be kyè, Dagwi a kyɔk ɛn e gwong de gwa raa rekwogôm Gworep Tē vɔk e sevwêl BeFilisti wɛt, mwa ano de gwa dal na nebagat. A ra ano, yaga a bare, jeng de bemat o bê di negbâng como, ko yɛn ê sege bare mɛn, na be to toyo vɔk e Misra.

¹⁸Ano kwong, a gwɔrɔ na yɛn e hey wɔ̀ sɛ̀ Gbɔng Rep Sere. BeIsrayɛl ba nusu bagyɛng o bagyɛng o sede bemât como yi e Misra.

¹⁹Ko Mose a hashe bekup Yɔsɛf, sede remo de Yɔsɛf a kana tɛ̀ BeIsrayɛl be sira a yɛ na sirâ mwin. A kana ha a yɛn wɔgɔ, jeng de Dagwi e ba nusu na yɛn yi e ngamo, gbing-gbing yɛn a ba hashe bekup mɛ, yɛn a kyè mɛ.

²⁰BeIsrayɛl ba re nuyel na kwɛngɛl yi e Sukɔt, ko ba tɛ̀ kwɔ̂n ye ngyɔk e Etam, e hagât hey.

²¹E kwɛngɛl mɛn, Dagwi Darwey a kyè e nuyel mɛn nagwi e ji rele, na re dura a yɛn gwong, ko naturuk a kyè e ji relê kya, na re nɔng ɛn negbey; ano yɛn a tɔk kyè kwɛngɛl mɛn nagwi na naturuk.

²²Kahɛ tuk, rele mo rá sè e nuyel mɛn nagwi, ko relê kya rá sè e nuyel mɛn naturuk.