Read berom Nusu 14 Bible Online

Nusu 14 - berom bible

Nusu 14

¹Dagwi Darwey a yâng Mose,

²“Há a BeIsrayɛl, be to ɛn vɔk e bama, na be tɛ̀ kwɔ̂n ye ngyɔk wɔ̀ bɛrɛng Pi-Hahirɔt, e tê Migdɔl na gbɔng rep bagat na Baal-Zɛfɔn. Bê tɛ̀ kwɔ̂n ye ngyɔk e hwomo tyɛng na be bɛrɛng mɛ gbɔng rep.

³Farawo a rɔda bare, ba ga dɔnɔ BeIsrayɛl e vwel o, ko hey ha ga gwɔrɔ hɛn, vit a gwông nusu.

⁴Ko me ma rɔda tɛ̀ yêy Farawo kashalang, a rɔda raa bol min. Ko ma rɔda dura reto hom yi na gbɔng wɛng de mê di e ra Farawo na regyɛng bemât como mɛ. Ano de BeMisra ba rɔda tɔk, mɛ wɛ à Dagwi Darwey.” Ano de BeIsrayɛl ba sege gwông kwɛngɛl mɛn.

⁵Sede ba ha a gbɔng gwɔ̀m Misra, bemat o ba ga tele, ko yɛ tanga bemât badu mɛ ba sege bare mɛn e ra bemat o, ba ye, “E sɛ́ de wot a ra ɛ? Wot a ga hàla BeIsrayɛl be kyè, yɛn de ba sé besam mot.”

⁶Ano kwong, a vɛ̌ tɛ̀, be yong kyɛkyɛ̂ bedwa mɛ, na be tula bemât como mɛ.

⁷A sogo a kyè na mwa bekyɛkyɛ̂ bedwa Misra, wuna tanga bemɛ naga betyiimin (600) de ba sé berat. Kawɛ kyɛkyɛ mo wa vɔk ɛ bemat betat, gwining e ji mɛn a se mwât nuyêl como.

⁸Dagwi Darwey a tɛ̀ yêy Farawo kashalang, a vɛ̌ hwo raa bol BeIsrayɛl de ba sé kyè bɛs na yey ting.

⁹Bemât comô Misra, vê bekyɛkyɛ̂ bedwa na besuga tanga vê bol, ba raa bol BeIsrayɛl, ko ba wɔ̀ vo ɛn e kwɔn de ba ye ɛ̀ ngyɔk e hagat gbɔng rep, bagat na Pi-Hahirɔt, de wɔ́ bɛrɛng wɔ̀ sɛ̀ Baal-Zɛfɔn.

¹⁰Sede Farawo a gwɛ̌ wɔ bagat, BeIsrayɛl ba ye ganga, ko — ányé yēè! — ba di BeMisra ba sé kyè vey hwo e ra yɛn! Ba tɛ̀ bengyip ding-ding, ko ba tosho vɔk na Dagwi Darwey, na a sɛlɛ hɛn.

¹¹Ko ba yâng Mose, “A sé yaga vit a besak e Misra de hwà vey na wot, na wot ba wey e hey arɛt? Di, pyɛ de hwà ra a wot, hwà ká hwo nusu na wot yi e Misra!

¹²Pyɛ ma yemo de wot á kana ha a hwo e Misra, jeng de wot á ye, hwo tik zɔng, wot ê ra a BeMisra fwom! Nduga, wot ra a yɛn fwom, de wot ba wey e hey ngan zɔng!”

¹³Ko Mose a yang ɛn, “Yin wok bengyip wɛt! Tumal hin gak, ko yin a rɔda di pyɛ de Dagwi Darwey ê ra, na a sey in mɛ yunung. BeMisra vemo de yin e bɛrɛng yunung, yin a rɔda to ba di ɛn wɛt gbak-gbak.

¹⁴Dagwi Darwey ê to como yaga yin! Dyɛng in nehywɛ min zɔng.”

¹⁵Ko Dagwi Darwey a yâng Mose, “Yaga sɛ́ de hwó tosho vey na me ɛ? Yâng BeIsrayɛl, be kyè vɔk e nuyel.

¹⁶Ko hwo, jut gwele mō, na hwo nára gwɛ e ra gbɔng rep, na nshi ne gas ɛn. Ano de BeIsrayɛl ba rɔda ye dɔ e ra vwel e ji gworep o.

¹⁷Me kwong, ma rɔda tɛ̀ neyey BeMisra kashalang, na yɛn a bin dopɛ e yin. Ko ma rɔda dura reto hom yi na gbɔng wɛng de mê di e ra Farawo na regyɛng bemât como mɛ, na bekyɛkyɛ̂ bedwa mɛ tanga besuga mɛ mwa. Jeng de mê di wɛng, BeMisra mo ba rɔda tɔk, me wɛ à Dagwi Darwey.”

¹⁹Tom-lagwî Dagwi de a kana sé kyè e nuyêl regyɛng BeIsrayɛl a toyo, a vɔk e bama mɛn, ko rele arɔng ra toyo yi e nuyel mɛn vɔk e bama,

²⁰ra vɛ̌ tumal e tê BeMisra na BeIsrayɛl. Rele mo ra vɛ̌ tɛ̀ lwīl e bak BeMisra, ko negbey e bak BeIsrayɛl. Ano kwong, vit a hwak de a wɔ́ bagat na mumwɛ mwa à turuk o.

²¹Ko Mose a nára vwɔ mɛ e ra gbɔng rep, ko Dagwi Darwey a tɛ̀ gûl rak gwo pɛsɛl na gap mwa turuk, gwa gangas nshî gbɔng rep o, gwa gas nɛ zang ba, gwa tik vwel e tē mo.

²²Nshi na tɛ̀ sede bedwâ duk e vwɔ yege tanga mwɛlɛng, ko BeIsrayɛl ba kwey e tê gworep o e ra vwel.

²³BeMisra arɔng ba vey, ba raa bol mɛn vɔk e tê gworep o, ba raa na bedwa na bekyɛkyɛ̂ bedwa tanga besuga mɛn mwa.

²⁴E rwa hwol gasi, Dagwi Darwey a di regyɛng bemât comô BeMisra yi e rele de ra lolo kya, ko a tɛ̀, a sè a yɛn kpɛɛ yaga bengyip.

²⁵A tɛ̀, bol bekyɛkyɛ̂ bedwa mɛn bè sè veng,[4] bè tɔk doysa washak wɛt. Ko BeMisra ba ye, “Dagwi Darwey a sé tó como yaga BeIsrayɛl e ra wot. Wot shara hot!”

²⁶Ko Dagwi Darwey a yâng Mose, “Nára vwɔ mō e ra gbɔng rep, na nshi mo ne to ɛn e ra BeMisra, mwa na bekyɛkyɛ̂ bedwa mɛn na besuga mɛn.”

²⁷Mose kwong a nára vwɔ mɛ e ra gbɔng rep o, nshi na to ɛn e dem nɛ e rwa gasi tyɛng sede yimo. BeMisra ba hwo tele, na be hywit ɛn jeng de ba di nɛ ba pom, ko Dagwi Darwey a wey na yɛn e tê gworep o.

²⁸Nshi na toyo, na kyiri bekyɛkyɛ tanga besuga, mwa na bemât comô Farawo de ba raa bol BeIsrayɛl e ji gbɔng rep; gwining e ji mɛn a tɛt ɛ wɛt.

²⁹Ko BeIsrayɛl ba ga kana kwey e ji gbɔng rep o e ra vwel, nshi na ga kana tɛ̀ a yɛn sede jwa-duk e vwɔ yege na mwɛlɛng mɛn.

³⁰Ano de Dagwi Darwey a sey BeIsrayɛl e tuk hane yi na BeMisra. Sede BeIsrayɛl ba bɛrɛng bavin mɛn tɔɔlɔl e ra rekwogôm gbɔng rep o,

³¹ba tɔk, Dagwi Darwey a ga wey na BeMisra yi na gbɔng reto mɛ. Hemo ha tɛ̀ ɛn, yɛn a wok bengyip mɛ, ko ba tɛ̀ gap mɛn e ra yɛ tanga mwât fwom mɛ Mose.