Read berom Nusu 15 Bible Online

Nusu 15 - berom bible

Nusu 15

¹E bama mo, Mose tanga BeIsrayɛl ba ra a Dagwi Darwey lwɛlɛ̂ feng, ba ye: “Ma rɔda ra a Dagwi Darwey lwɛlɛ, yaga gbɔng wɛng de a ga re; suga na dwa mɛ a ga barak hɛn e ji gworep.”

²Yɛ a sé gap hom na tîn lwɛlɛ hom, yɛ Dagwi Darwey de a sey me. E yɛ wɛ à Dagwi hom, ma rɔda ra a yɛ lwɛlɛ, e yɛ wɛ à Dagwî da hom, ma rɔda nɔng ɛ nerey.

³Dagwi Darwey a sé mwât como, reza mɛ à Dagwi Darwey.

⁴Bemât comô Farawo tanga bekyɛkyɛ̂ bedwa mɛ, a ga barak hɛn e ji gworep. Bejwâng bemât nuyêl como mɛ, nshî Gbɔng Rep Sere na ga re ɛn.

⁵Tɛmɛ-nshi na kyiri hɛn, ba tē pyɔp vɔk e nɛ̂n gworep sede gwofwa.

⁶“Vwɔ yege mō, à Dagwi Darwey, gwa vɔk reto za wɛt, vwɔ yege mō, à Dagwi Darwey, gwa cɛgɛt wo repugu!”

⁷Ná gbɔng nerey mō, hwà ga kyira vê repugu mō, hwà tɛ̀ shom mō, ye hwo e ra yɛn, ya re ɛn sede cugul.

⁸E ji shom, hwà pɛl nesong mō, ko nshi na pere tula hɛn; Tɛmɛ-nshi na tumal tabat sede jwa-duk, nshî nɛ̂n gworep na ye gàt.

⁹Wo repugu a ye, “Ma rɔda raa bol mɛn na yol, mê wɔ̀ vo ɛn, ma rɔda gas pyɛ́ mɛn de ma hashe, ma rɔda rungta a to hom yɛ. Ma rɔda hwɔltɔ wal hom, ma rɔda wey na yɛn na vwɔ hom.”

¹⁰Ko hwo, à Dagwi Darwey, hwà pɛl nesong mō, nshî gworep na kyiri hɛn; ba ye pyɔp sede dyam shi e ji tɛmɛ-nshi.

¹¹“À Dagwi Darwey, wà a sé sede hwo e ji bemat-lagwi ɛ? E wa a vɔk nerey, ko a to sé jɛrɛ sede hwo ɛ! Wa e ra tomông bengyip tanga pyɛ̂ langat sede hwo ɛ!

¹²Hwà nára vwɔ yege mō, ko vwel ha wɔlɔk vê repugu mot.

¹³Hwà tɛ̀ yey na bemat mō, vemo de hwà ga vibis hɛn, ko hwà ga kyè e nuyel mɛn. Na gap mō hwà ga kyè na yɛn taltal vɔk e kwɔ̂n sangal mō hê jɛrɛ.

¹⁴Bemât jey ba wok, ba vow babek mɛn; nepêp bengyip na hwo e ra BeFilisti.

¹⁵A sé a begwɔ̀m Ɛdɔm yɔɔt a remo, bemât nuyêl BeMowap ba vow na bengyip, neyey bemât sangal e ji Kanaan na ye ywey.

¹⁶Bengyip ná sap ves nà hwo e ra yɛn; yɛn a di gâp vwɔ mō, yɛn a sǎ diring, sɛ̌ bemat mō, à Dagwi Darwey, ba ye dɔ, bemat mō de hwà ga tɛ̀ ɛn bemo.

¹⁷Hwô vey na yɛn, na hwo tik ɛn e ra raku mō; kwɔn de hwo Dagwi Darwey hwà yong, na hwo sangal ɛ, kwɔ̂n rê fongol de hwà lɔk na vɔ mō.

¹⁸Hwo Dagwi Darwey hwà rɔda re negwɔm neshey gbak-gbak.”

¹⁹Yɛn a ra lwɛlɛ mo, yaga bedwâ Farawo, na bekyɛkyɛ vɛ̄ tanga besuga mɛ ba yel e ji gworep, ba raa BeIsrayɛl, ko Dagwi Darwey a toyo na nshî gworep o e ra yɛn. Ko BeIsrayɛl ba ga kana kyè e ra vwel hwogot e tê gworep.

²⁰Miryam, hwā zarap, gwà Aharon, a jut kebing e vwɔ mɛ, ko beha mwa ba dopɛ, be rɛ̌ na nebing o.

²¹A yishi a yɛn lwɛlɛ mo, ko beha mo ba wunsa: “Ra in a Dagwi Darwey lwɛlɛ, yaga gbɔng wɛng de a ga re; suga na dwa mɛ a ga barak hɛn e ji gworep.”

²²Mose kwong a sogo na BeIsrayɛl yi e bak Gbɔng Rep Sere, ba kyè vɔk e hêy Shur. Yɛn a kyè kwɛngɛl pɔlɔ tat e hey, ko ba sɛ̀ nshi wɛt.

²³Ba wɔ̀ wul Reneng,[5] kwɔn de ba sɛ̀ ɛ nshi. Ko ba tɔk sɔ nɛ wɛt, yaga na reneng, yaga ano de ba kana vo a kwɔn o rezâ Reneng.

²⁴BeIsrayɛl ba gwɔrɔng e ra Mose, ba tē, “E sɛ́ de wot ê sɔ ɛ?”

²⁵Ko Mose a ra won na Dagwi Darwey, de a dura a yɛ cɛ̌k cɔgɔt cak. A jut yɛ, a bomo e ji nshi mo, ko na tɛ́ ɛn nerat. E hwomo Dagwi Darwey a nɔng ɛn nu, a tɛ̀ a yɛn redu, ko a mara hɛn arɔng.

²⁶A ye, “Ma sé Dagwi Darwey, Dagwi min. Ka sede yin a rɔda gyeng ha hom gakgak, na yin ra pyɛ́ de ya jam e bayis hom, na yin wok ha hom, na yin gyeng badu hom, ko ma rɔda vey a yin na nerɔ yerê nane de ma kana tɛ̀ e ra BeMisra wɛt, yaga me Dagwi Darwey ma sé mwât tɛsɛ hin tyang.”

²⁷Yi e Reneng yɛn a vey e Elim, kwɔn de ha vɔk lel nshi kuru na vɛ ba tanga batîn tyet barey o kuru bataama (70). Ko yɛn a tɛ̀ kwɔ̂n ye ngyɔk e hwomo bagat na nshi mo.