Read berom Nusu 16 Bible Online

Nusu 16 - berom bible

Nusu 16

¹Mwa regyɛng BeIsrayɛl ba sogo yi e Elim, ba kaba gwong, ba wɔ̀ wul hêy Sin de ha sé e tê Elim na Sinai. Yɛn a wul e tuk hê kuru na hɛ tungun e pwɛl gwo neba bama de yɛn a hala sevwêl Misra.

²E hey o, mwa BeIsrayɛl ba gwɔrɔng e ra Mose tanga Aharon,

³ba yang ɛn, “Ká duga Dagwi Darwey a yâng wey na wot e Misra! E hwomo wot á re banama na pyɛ́ de yá vey a wot! Ko yin a ga vey na wot e hey hemo, na vyong ye vos ot, na wot kushu mwa!”

⁴Dagwi Darwey a yâng Mose, “Ma rɔda tomo a yin yi e lagwi na pyɛ̂ re sede rwak de wo rop, ko bemat o ba rɔda kyese tulsa pyɛ́ de yê vey a yɛn yaga tuk hane mo. Yi ano de ma rɔda mara hɛn, na me tɔk, kɛ yɛn ê gyeng ha hom kɛ wɛt.

⁵E tuk hê tyiimin, jeng de yɛn a tula pyɛ́ mo, tik na ye sè zang ba e ra pyɛ́ de be tulsa kahɛ tuk. Ko yɛn a yong yɛ̄ tuk hane mo.”

⁶Ano kwong, Mose tanga Aharon ba yâng mwa BeIsrayɛl, “Nahywegelek yin a rɔda tɔk, e Dagwi Darwey de a pat in yi e sevwêl Misra.

⁷Ko nahwol nagasi yin a rɔda di gbɔng nedyɛt nerat mɛ. A ga wok gwɔrɔng min e ra yɛ. Yaga e yɛ wɛ de yin a gwɔrɔng e ra yɛ. Wot a vey sɛ́ ɛ̀, de yin e gwɔrɔng e ra wot ɛ?”

⁸Mose a to ye, “E Dagwi Darwey de ê nɔngɔs hin banama, na yin reres nahywegelek, tanga kpam-tuk nagasi de yin ê reres, yin siris kang, yaga a ga wok yerê gwɔrɔng min e ra yɛ. Jeng de yin e gwɔrɔng, gwɔrɔng min o ha sé e ra wot wɛt ko e ra Dagwi Darwey!”

⁹Mose kwong a yâng Aharon, “Ha a mwa regyɛng BeIsrayɛl, yɛn a gwɛ̌ sek bagat na Dagwi Darwey, yaga a ga wok gwɔrɔng mɛn.”

¹⁰Jeng de Aharon a sé ha na regyɛng BeIsrayɛl o, ba doyo wɔ e hêy gbingiring, ko ba di gbɔng nedyɛt nerât Dagwi Darwey na nusu e ji rele.

¹¹Dagwi Darwey a ha na Mose, a ye,

¹²“Ma wok gwɔrɔ̂ng BeIsrayɛl. Ha na yɛn, yang ɛn, yɛn ê re banama e rwa nawiri, ko yɛn ê re kpam-tuk, yɛn a sirik nagasi. Yi ano de yɛn ê tɔk, e me wɛ à Dagwi Darwey, Dagwi mɛn.”

¹³Nawiri mo gbɔng regyɛng yerê ríp cak,[6] ya gyirik, ko ya ye ship a kwɔ̂n ye ngyɔk mɛn, ko nagasi arɔng mwɛngɛ gwa dyɛng e kwɔn o.

¹⁴Jeng de mwɛngɛ gwa ye wɔ̀gɔrɔk, ko pyɛ́ cak sede câng nemuk ya sè e vwel o; e bɛ́rɛng yɛ ya sé sede lɔ̂k nàrang de ha kyiri kwɔn o.

¹⁵Sede BeIsrayɛl ba di yɛ̄, yɛn a yâng bemɛn, “E sɛ́ a yemo ɛ?” Yaga yɛn a kana tɔk kɛ e sɛ́ wɛt. Ko Mose a yang ɛn, “E kpam-tuk à wane de Dagwi Darwey a nɔng in, na yin re.

¹⁶A nɔng nu, yin tula neyɛnɛ̂ nepyak pyɛ de yê vey a kawɛ min re. Kawɛ dalɔ a tula shǐ masâ pyɛ́ hining yaga kawɛ mwat e buk mɛ.”

¹⁷BeIsrayɛl ba ra ano, ba tula pyɛ́ mo, behak ba tula pyak ko behak hyet.

¹⁸Ko jeng de ba masa yɛ e shǐ mo, mwat de a kana tula pyak a sɛ̀ pyɛ de ya pɔl wɛt, ko womo de a tula hyet ya radɛ arɔng wɛt. Mwa ba tula pyɛ́ de yê vey a yɛn re.

¹⁹Ko Mose a yang ɛn, “Mwat hwak a tɛ́t ɛ bwang pyɛ́ mo vɔk e gasi wɛt.”

²⁰Ko behak ba wet betong na yɛ wɛt, ba tɛt ɛ bwang o vɔk e gasi, ko ya tɛ̀ bekut, ya ro nesang arɔng. Mose kwong a wok shom na yɛn.

²¹Ano de yɛn a tulsa pyɛ́ mo kahɛ gasi, kawɛ a tula neyɛnɛ̂ nepyak pyɛ de ba simo yaga re mɛn. Ko jeng de gwi gwa ga fes, bwang pyɛ́ de ya tɛt ɛ e vwel ya yē ywey.

²²E tuk hê tyiimin, jeng de yɛn a mara pyɛ́ de yɛn a tula, ko ba sɛ̀ shǐ masâ pyɛ́ ba yaga kawɛ mwat. Ba langat hɛn, ko bemât nuyêl BeIsrayɛl mwa ba vey ha a Mose.

²³Mose a yang ɛn, “Di in, pyɛ de Dagwi Darwey a nɔng nu e ra yɛ a yet: Nahwol a sé tûk pɔngɔ, hɛ a Tuk Shábat, tuk de ha sé hê Dagwi Darwey. Halang hin yunung, pyɛ́ de yin e simo halang, kyé in pyɛ́ de yin e simo kyé, ko pyɛ́ de ya pɔl, tik in yɛ̄ naka yaga nahwol.”

²⁴Ano de yɛn a tik bwang o vɔk e nagasi, sede remo de Mose a kana nɔng ɛn nu, ko ya tɛ̀ nesang wɛt, bekut ba yel e ji mo arɔng wɛt.

²⁵Ko Mose a yang ɛn, “Re in yɛ̄ yunung, yaga yunung a sé tuk pɔngɔ, Tuk Shábat, tuk de ha sé hê Dagwi Darwey. Yin ê sɛ̀ pyɛ́ mo e hey yunung wɛt.

²⁶Tula hin yɛ̄ e nepɔlɔ netyiimin, ko e tuk hê taama, Tuk Shábat, vit a pyɛ́ mo.”

²⁷Mwa ano, behak e ji bemat o ba wɔ́ e tuk hê taama, na be wɔ̀ tula pyɛ́ mo, ko ba sɛ̀ pyɛ cak wɛt.

²⁸Dagwi Darwey a yâng Mose, “Vɔk e yɛ̌ jeng de yin ê nàra e de kyɛ́ in nà gyeng há hom tanga badu hom arɛt?

²⁹Di in, me Dagwi Darwey, ma ga nɔng in tûk pɔngɔ. Yaga ano de ma nɔngɔs hin pyɛ̂ re yê pɔlɔ ba e tuk hê tyiimin. Tik na kawɛ mwat a sangal e kwɔn de a sé ɛ, hwak a hàla kwɔ̂n sangal mɛ tuk hê taama wɛt.”

³⁰Yi ano de bemat ba wusal e tuk hê taama.

³¹BeIsrayɛl kwong ba vo a pyɛ́ mo rezâ mana,[7] ya sé pyɛng sede celes but, ko netâ yɛ e nu sede kekpam-tuk rɔkrɔk de ba tɛ̀ shok.

³²Mose a ye, “Di in, Dagwi Darwey a ga nɔng ot nu, wot mara mana mo e shǐ zang hining, na wot tik wɛ naka gbak-gbak, yaga na bezamang mot vɔk e nuyel be bin di pyɛ̂ re de Dagwi a re mɛ̀ na wot e hey, jeng de a nusu na wot yi e sevwêl Misra.”

³³Ko Mose a yâng Aharon, “Jut fùs, mara mana e ji shǐ masa zang hining, na hwo shusha e fus o, ko hwo tik gwɛ e kwɔ̂n re a Dagwi Darwey fongol, be tik wɛ naka yaga bezamang min vɔk e nuyel.”

³⁴Sede remo de Dagwi Darwey a kana nɔ̂ng Mose nu, Aharon a tik fus o e nuyêl Kundung Wuna-na-Sirâ Dagwi.

³⁵BeIsrayɛl ba re mana neshey kuru banaas, sɛ̌ jeng de yɛn a wɔ̀ wul yɛnɛ̂ sevwêl Kanaan, kwɔn de bê sangal ɛ.

³⁶Gwoshǐ masa de ba kana ra mɛ fwom e jeng yane, ba tâng gwɛ a ɛfa. Nerey gwɛ na dal shǐ masa zang kuru.