Read berom Nusu 17 Bible Online

Nusu 17 - berom bible

Nusu 17

¹Regyɛng BeIsrayɛl mwa ba sogo, ba kaba gwong yi e hêy Sin, ko ba kyè na tɛ́sɛ nekwɔn ye ngyɔk, sede remo de Dagwi Darwey a nɔng ɛn nu. Yɛn a wul Rɛfidim, ba tɛ̀ kwɔ̂n ye ngyɔk, ko e kwɔn o ba bidɛ nshî sɔ.

²Bemat o ba haras a Mose, ba yang ɛ, “Nɔng ot nshî sɔ!” Mose a toyo a yɛn, a ye, “Yin e haras a me yaga sɛ́ ɛ? Yaga sɛ́ de yin e mara Dagwi Darwey ɛ?”

³E jeng o bemat o ba sé wokos na yêy hwɔshɔ, ko yɛn a gwɔrɔng e ra Mose, ba ye, “Yaga sɛ́ de hwà nusu na wot yi e Misra, na hwo ba wey na wot, na nèy mot tanga yas mot na yêy hwɔshɔ ɛ?”

⁴Ko Mose a ra won na Dagwi Darwey, a ye, “Ma rɔda ra sɛ́ na bemat vemo arɛt? Bwang o tyɔng yɛn a rɔda basak me na beta!”

⁵Ko Dagwi Darwey a yang ɛ, “Jut behak e ji bemât nuyêl BeIsrayɛl, na hwo vɔk ɛ̀ gwele mō gwomo de hwà rusu mɛ nshî Gwɔrɔt Nil, na hwo kyè e nuyel mɛn.

⁶Di, mê tumal e nuyel mō e hwomo e ra gwofwa Rakû Hɔrɛp.[8] Fala gwofwa mo, ko nshi nê nusu yi e ji gwɛ, ko bemat o ba rɔda sɔ.” Mose kwong a ra ano e bayîs bemât nuyêl BeIsrayɛl.

⁷Ba vo a kwɔn o rezâ Masa na Mɛriba wɔgɔ, Mara na Haras, yaga BeIsrayɛl ba haras a Mose, ko ba mara Dagwi Darwey, jeng de ba tē, “Dagwi Darwey a sé tanga wot kɛ wey ɛ?”

⁸Jeng de BeIsrayɛl ba rɔngɔl e Rɛfidim, BeAmalɛk ba vey, ba tó como na yɛn.

⁹Ko Mose a yâng Yɔshuwa, mwât sɛlɛ mɛ, “Kasa a wot bemat behak, na hwo kyè mɛ̀ wɔ̂ como na BeAmalɛk nahwol. Me, ma rɔda ba wɔ̀ tumal e ra tɛ̂t rahwol, ma rɔda kaba gwele e vwɔ hom, gwomo de Dagwi á ra pyɛ̂ bes na gwɛ.”

¹⁰Yɔshuwa kwong a ra tyɛng pyɛ de Mose a nɔng ɛ nu. A wɔ̀ tó como na BeAmalɛk, ko Mose, na Aharon, tanga mwat hwak de reza mɛ à Hur, ba tut vɔk e ra tɛ̂t rahwol.

¹¹Ko kayɛ jeng de Mose a vɔk vwɔ mɛ e rak o, BeIsrayɛl be hwo di wɛng, ko kayɛ jeng de a gyirik na gwɛ, e BeAmalɛk de be hwo di wɛng.

¹²Jeng de vɔ Mose ba ga ye gbɛrɛk, ko Aharon tanga Hur ba jut gwofwa, ba tɛ̀ a yɛ, a sangal e ra gwɛ. Yɛn kwong ba tumal, hwak e vwɔ yege ko hwak e vwɔ mwɛlɛng mɛ, ko ba vɔk vɔ mɛ vɔk e rak o. Ano de vɔ mɛ ba nàra ting vɔk e jeng de gwi gwa gaba.

¹³Yɔshuwa kwong a wey na bemât comô BeAmalɛk.

¹⁴Dagwi Darwey a yâng Mose, “Ma rɔda fugut BeAmalɛk mwa burang yi e jey! Ba rɔda to bare na yɛn wɛt. Yaga ano, jɛk pyɛ́ yemo, na ye sè pyɛ̂ bare, ko tɛ̀ a Yɔshuwa yɛ̄ e fwong.”

¹⁵Mose kwong a lɔk gàgbang rangâs yas vɔk na Dagwi, ko a vo a hɛ rezâ Dagwi Darwey a sé túta hom.

¹⁶A ye, “Nára tuta Dagwi Darwey wɔ e rak o![9] Yɛ a rɔda tó como na BeAmalɛk neshey gbak-gbak.”