Read berom Nusu 18 Bible Online

Nusu 18 - berom bible

Nusu 18

¹Yɛtrɔ, tyà Mose, piris wo vwêl Midyan, a wok pyɛ̂ mwa de Dagwi a ga ra yaga bemat mɛ BeIsrayɛl tanga Mose, na gwong de a pat ɛn yi e Misra.

²Ano kwong, Yɛtrɔ a vey na Zipora, hwâ Mose, tanga nèy mɛ bewen o beba. Mose a kana gang ɛ e lɔ da mɛ. Ba tâng rezâ kunat o, à Gɛrshɔm, wɔgɔ, kwɛnɛt e hwomo, yaga e jeng tɔ mɛ Mose a ye, “Ma kana sè kwɛnɛt e vwel duk.”

⁴Ko rezâ wo neba mo à Ɛliyɛzɛr, wɔgɔ, Dagwi mwât sɛlɛ hom, yaga Mose a ye, “Dagwi wo da hom a sé mwât sɛlɛ hom, yɛ wɛ a sey me yi e wâl Farawo.”

⁵A sé ano de Yɛtrɔ a vey nɔ̂ng Mose hwā mɛ na nèy bewen mɛ e hey, e kwɔn de yɛn a ye ɛ ngyɔk bagat na raku de wa sé jaram yaga Dagwi.

⁶A tomo be ha a Mose wɔgɔ, tyà mɛ Yɛtrɔ a sé kyè vey na yɛ, na hwā mɛ tanga nèy bewen mɛ neba.

⁷Ko Mose a sogo, a kyè wɔ̀ sey tyà mɛ, a gaba e cat bol mɛ, ko a kula hɛ e gèy. Yɛn a rangal netyâng bemɛn, ko ba yel e ji bûk Mose.

⁸Mose kwong a hwo ha a tyà mɛ mwa pyɛ́ de Dagwi Darwey a ga ra na Farawo tanga BeMisra, yaga na a viri BeIsrayɛl. A ha a yɛ mwa nezap reyɔm de na sɛ̀ ɛn e gwong arɔng, na gwong de Dagwi Darwey a sey ɛn.

⁹Ko Yɛtrɔ a vɔk yey pyɛng yaga mwa nerat de Dagwi Darwey a ga dura a BeIsrayɛl, jeng de a sey ɛn yi e vwɔ̂ BeMisra.

¹⁰A ye, “Tik na be nɔ̂ng Dagwi Darwey nerey, yɛ de a sey in yi e vwɔ̂ BeMisra na Farawo! A remo, ma tɔk, Dagwi Darwey a dal bedagwi mwa, yaga a vibis bemat mɛ yi e vwɔ̂ BeMisra vemo de ba bɛɛ hɛn sede vit a hɛn nà setot e rato.”

¹²E bama mo, Yɛtrɔ a nára a Dagwi nɔrɔ̂ yas de be yɛt, be rangas burang, tanga nenɔrɔ̂ yas nehak de be yɛt arɔng. Ko Aharon na mwa bemakûk BeIsrayɛl yɛn a vey re pyɛ̂ nɔrɔ mo tanga Yɛtrɔ, tyà Mose, e nuyêl Dagwi.

¹³Tuk het, Mose a hwo sangal, na a ra a bemat shɔt, ko bemat o ba gwɔrɔ hɛ e tumal yimo nagasi vɔk e nawiri.

¹⁴Ko sede tyà mɛ a di nepyak fwom de Mose a sé ra, a ye, “E sɛ́ de hwà sé ra a bemat o ɛ? Yaga sɛ́ de hwo nju mō zɔng de hwà sé ra fwom o, ko bemat ba gwɔrɔ hwo e tumal yimo nagasi vɔk e nawiri ɛ?”

¹⁵Ko Mose a yâng tyà mɛ, “Bemat o be vɛ̀sɛ na me, yaga na be rangsal pyɛ́ de Dagwi e simo.

¹⁶Sede cuna ya sé e tē mɛn, yɛn e vey mɛ e nuyel hom. Me arɔng me yóng ɛn na bemɛn, ko me dūsa a yɛn badu Dagwi na basa mɛ.”

¹⁷Ko tyà mɛ a yang ɛ, “Gwong de hwà kwey ɛ gwa sé tyɛng wɛt.

¹⁸Hwo na bemat vemo ngan mwa yin e kyè wɔ̀ wey na bato min zɔng. Pyɛ́ mo ya dal gap mō, hwô kyɛm hwo ra yɛ nju mō wɛt.

¹⁹Wet betong na ha hom. Ma sé vo a hwo biya, ko tik na Dagwi a sé tanga hwo! Hwo hwà rɔda sè e tô bemat o e nuyêl Dagwi, hwô vɛ̀sɛ na sesin mɛn e nuyel mɛ.

²⁰Hwô misang a yɛn badu Dagwi na reha mɛ, ko hwô dura a yɛn gwong de ba rɔda raa, na pyɛ́ de ba rɔda ra arɔng.

²¹Yaga shɔ̄t yê begelek, hwà rɔda kasa e ji bemat mwa vemo de bê kyɛm, vemo de ba vɔk bengyip Dagwi arɔng, bemat de be tó yey na yɛn wɛt, de be sey pyɛ bang nu arɔng wɛt. Tɛ̀ yerê vane be sè bemât nuyêl bemat gu gu, na naga naga, na kuru batungun batungun tanga kuru kuru. Tik na yɛn vane be ra a bemat shɔt kayɛ jeng. Ko shɔt de ya dal gap mɛn, be vey mɛ na hwo, ko ye begelek o, yɛn a ra yɛ pyɛ mɛn. Yi ano, hwô tɛ̀ pyɛ́ ye sè a hwo begelek yi na gâs nedirik fwom o tanga yɛn.

²³Ka sede hwà ra ano — ko Dagwi a nɔng o nû ra ano mo — hwà rɔda tɔk jut nedirik o. Bemat vemo mwa arɔng ba rɔda tanga tòros hɛn, vit a ruru pyak.”

²⁴Mose kwong a wok ha de tyà mɛ a ha a yɛ, ko a ra tyɛng pyɛ de a ha.

²⁵A hwo kasa vemo de bê kyɛm e ji BeIsrayɛl, a tɛ̀ ɛn bemât nuyêl bemat gu gu, na naga naga, na kuru batungun batungun tanga kuru kuru.

²⁶Yɛn ba ra a bemat shɔt kayɛ jeng: neha de na dal ɛn, ba wɔ́ a Mose mɛ, ko ne begelek o ba ra pyɛ mɛn.

²⁷E bama mo, Mose a tɛ̀ tyà mɛ e gwong, ko a to ɛ wɔ e sevwel mɛ.