Read berom Nusu 19 Bible Online

Nusu 19 - berom bible

Nusu 19

¹BeIsrayɛl ba sogo yi e Rɛfidim; ba wɔ̀ wul hêy Sinai e nusû pwɛl pwas gwô netat e bama de ba ga nusu yi e Misra. Yɛn a tɛ̀ kwɔ̂n ye ngyɔk e hagât Raku Sinai,

³ko Mose a tut e raku mo vɔk na Dagwi. Dagwi Darwey a yila hɛ yi e hwomo, a ha a yɛ, na a ha a BeIsrayɛl, yére Yakɔp, ngan:

⁴“Yin a ga di pyɛ́ de me ma ga ra a BeMisra, ko yin a ga tɔk gwong de ma ga jut in, sede remo de kim wo hashe nèy e bafabâk wɛ, ko ma vey na yin na me e ngamo.

⁵A remo, ka sede yin ê raa ha hom mwin, na yin gyeng wuna-na-sira hom, yin a rɔda sè bagat na me yin dal bwang bemat o. Mwa jey ya sé nyang; ko yin, ma ga kasa hin yi e yére bemat mwa, na yin se benang zɛɛt.

⁶Yin a rɔda sè yerê bemat de ma tik jaram yaga me, ko yin a rɔda sè sede mwa hin, yin a sé bepiris hom.” E tala mo, Dagwi a to yâng Mose, a ha a BeIsrayɛl neha mo.

⁷Mose kwong a toyo, a yila bemakûk BeIsrayɛl, ko a ha a yɛn neyɛnɛ̂ pyɛ́ mwa de Dagwi Darwey a nɔng ɛ nu.

⁸Bemat mwa ba simo na fwɔ gwining, ba ye, “Mwa pyɛ́ de Dagwi Darwey a ga ha, wot a rɔda ra!” Ko Mose a toyo a Dagwi Darwey na ha de bemat o ba ha.

⁹Dagwi Darwey kwong a to yâng Mose, “Di, ma sé kyè vey na hwo e ji rele de rê lɛrɛ me, yaga na bemat o be bin wok jeng de ma sé ha na hwo. Ano de ba rɔda to tó yey na hwo wɛt, ko bê tɛ̀ gap mɛn e ra hwo kayɛ jeng.” Mose a ha a Dagwi Darwey ha de bemat o ba toyo mɛ,

¹⁰ko Dagwi Darwey a yang ɛ, “Kyè wɔ na bemat o, na hwo tɛ̀ ɛn, be yong ɛn yunung na nahwol, na be man na me. Tɛ̀ ɛn, be kus berugu mɛn arɔng.

¹¹Tik na yɛn a yong ɛn yaga gwaane, yaga e tuk a hane de mê gyirik e ra Raku Sinai e bayis mɛn mwa.

¹²Tɛ̀ yɛnɛ̂ kwɔn de bemat bê tɔk wɔ ɛ, na hwo gwɔrɔ mɛ raku mo. Ko yang ɛn, be tē naka, be tut vɔk e ra raku mo, kɛ be ra retîn wɛ wɛt. Mwa mwat de a ra raku mo, ba rɔda mɔrɔ hɛ.

¹³Bê ra mwat o na vwɔ wɛt, ko bê basak hɛ na beta, kɛ be toro hɛ na bara, kɛ a sé mwasi kɛ yas ayi, ba rɔda tik ɛn beken wɛt. Sɛ̌ jeng de bê wok fwɔ̂ durum e ngyen, na bemat o be de tut vɔk e ra raku mo.”

¹⁴Mose a gyirik yi e raku mo wɔ na bemat o, ko a tɛ̀ ɛn, be yong ɛn, na be man na Dagwi, na be kus berugu mɛn arɔng.

¹⁵A yang ɛn, “Yong in yaga gwaane. Hwak a wɔ́ bagat na hwā wɛt.”

¹⁶E tuk hê netat o, rwa hwol gasi, jey ya tē dɛbɛt, ko gbara wa taksal, rele de ra kana man ra hwo e ra tɛ̂t raku mo, ko fwɔ̂ durum gwa tosho rɛng-rɛng. Bemat mwa de ba sé e kwɔ̂n ye ngyɔk o ba vow rebek.

¹⁷Mose a kyè na bemat o yi e kwɔ̂n ye ngyɔk wɔ̀ man na Dagwi, ko ba tumsal e nedem mɛn e tîn raku mo.

¹⁸Kyeng ha vɛ̌ kyiri Raku Sinai, yaga Dagwi Darwey a gyirik e ra wɛ e ji kya. Kyeng o ha mugus sede kwɔ̂n rugû dyam, ko raku mo mwa wa digis ding-ding.

¹⁹Fwɔ̂ durum o gwa gwɛ̌ kát ɛ, ko Mose a sè ha, ko Dagwi a sè toros a yɛ na fwɔ de gwa sè sede gbara.

²⁰Dagwi Darwey a gyirik e ra Raku Sinai, e hwomo e ra tɛt o, ko a yila Mose wɔ̀ tut e ra tɛt o, ko Mose a wɔ́.

²¹Dagwi Darwey a yang ɛ, “To gyirik, na hwo tusa bemat o, be kwon ye dɔ à yɛnɛ̂ kwɔn de ba gwɔrɔ, yaga na be vey bɛrɛng me wɛt. Ka ano wɛt, ko pyak ba rɔda wey.

²²Bepiris arɔng de be vɛ̀sɛ bagat na me, gbing-gbing be yong ɛn, na be man na me. Ka ano wɛt, ko shom hom yê hwo e ra yɛn.”

²³Ko Mose a yâng Dagwi Darwey, “Bemat o ba rɔda tɔk tut e ra raku wɛt, yaga hwà ga tɛ̀, wot tɛ̀ yɛnɛ, na wot gwɔrɔ mɛ raku mo, na wot tik wɛ detu yaga hwo.”

²⁴Ko Dagwi Darwey a toyo a yɛ, a yang ɛ, “Kyè wɔ̀ gyirik, na hwo toyo vey tanga Aharon. Ko hwo tik bepiris na bwang bemat o, be ye dɔ, na be tut vey sɛ̀ me wɛt. Ka ano wɛt, ko shom hom yê hwo e ra yɛn.”

²⁵Mose kwong a gyirik wɔ na bemat, a ha a yɛn pyɛ́ yemo.