Read berom Nusu 21 Bible Online

Nusu 21 - berom bible

Nusu 21

¹Badu ma vemo de hwà rɔda nɔ̂ng BeIsrayɛl:

²Ka sede hwà sey sam WoIbrani, a rɔda ra sesam neshey netyiimin, ko e shey hê taama bê hàla hɛ washak, vit à tala.

³Ka sede a kana ra weneng gyam a tɛ́ ɛ sam, ko hwā mɛ a rɔda kyè tanga yɛ. Ka sede a kana vey hwɔrɔs, ko dalɔ mɛ a de ra a yɛ weneng, hwā mo a tɔs a yɛ nèy bewen kɛ behwong, hwā mo tanga nèy o ba sé vê dalɔ mɛ, ko yɛ ê kyè nju mɛ.

⁵Ko ka sede sam o a nusu wɛshɛrɛk, na a ye, “Ma tɛ̀ yey na dalɔ hom, na hwā hom tanga nèy hom, me simo na me sè washak wɛt”,

⁶ko dalɔ mɛ a rɔda wɔ na yɛ e kwɔ̂n re a Dagwi fongol. E hwomo, a rɔda tɛ̀ ɛ, a tumal bagat na rwi duk kɛ jwâ rwi duk, ko dalɔ mɛ a rɔda boro fwong mɛ na kwet. Ano kwong, a rɔda nàra sam dalɔ mɛ vɔk e neyɛnɛ neshey mɛ e jey.

⁷Ka sede mwat a row hwóng mɛ sede sam, ba rɔda hàla hɛ washak e shey hê taama sede sam rwas wɛt.

⁸Ka sede dalɔ de a sey ɛ á kana simo, na a tɛ́ ɛ hwā mɛ, ko a de jut a yɛ e yey wɛt, a tik belɔ mɛ be to sey ɛ. Vit à hɛ nà gwong, na a row ɛ na kwɛnɛt, yaga a ga ra a yɛ naka wɛt.

⁹Ka sede a simo, na a tɛ́ ɛ hwâ sɔ mɛ, ko tik na a ra a yɛ tyɛng sede hwóng mɛ.

¹⁰Ko ka sede yɛ pyɛ mɛ a ra weneng na yɛ, ko e bama mo a vo hwā mo hwak, a kwon ro sam o na pyɛ̂ re kɛ berugu wɛt, a to tik dyɛngɛs na yɛ arɔng wɛt.

¹¹Ka a sila a yɛ pyɛ́ tyat yemo wɛt, ko yɛ a tik ɛ washak, vit a sey ɛ̀ dyām.

¹²Kawɛ de a rusu mwat, na a mɔrɔ hɛ, ko bē mɔrɔ hɛ arɔng.

¹³Ka sede a ra na negaren wɛt, pyɛ mo ya vey e ra gawey zɔng, ko tik na yɛ a tele wɔ̀ dal e kwɔn de Dagwi Darwey a rɔda kasa a yin.

¹⁴Ko ka sede mwat a yong ɛ, na a mɔrɔ mumwɛ na negaren, bē jut ɛ, bē mɔrɔ hɛ arɔng, mwa ano de a ga kana tele vɔk e kwɔ̂n de be re a Dagwi ɛ fongol, na a kaba gàgbang rangâs yas o.

¹⁵Mwat winde a rusu dá mɛ kɛ neng mɛ, bē mɔrɔ hɛ.

¹⁶Mwat de a shigi mwat, kɛ a ga kana row ɛ, kɛ a ka sé rɔɔ vɔk ɛ jeng de ba vo ɛ, bē mɔrɔ hɛ.

¹⁷Mwat de a mok a da mɛ kɛ neng mɛ gawey, bē mɔrɔ hɛ.

¹⁸Ka sede bemat beba ba sé ra yol, ko gwining a toro mumwɛ na fwà, kɛ a gunung vwɔ a rusu hɛ mɛ, ko mwat o a ku wɛt, a nàra e dyɛngɛ,

¹⁹e bama mo a to sogo, a hwo kyè e tē yɛndɛng na gwele mɛ, yɛ mwat de a rusu hɛ mo ba rɔda hàla hɛ washak, ko a tala pyɛ yaga jeng de a ga lashe a yɛ, ko a to tala yaga pege mɛ sɛ̌ a tɛ̀ tyang.

²⁰Ka sede mwat a dak sam mɛ, rwas o kɛ hwā mo, na gwele, a pere ku, ko bē tabak hɛ.

²¹Ko ka sede sam o a wul pɔlɔ hining kɛ ba gbak, ba rɔda ra a dalɔ mo shɔt wɛt, yaga sam o a sé pyɛ nedanelɔ mɛ.

²²Ka sede bemat ba sé ra yol, ko hwak a mǎ hwā de a vɔk jim, ko jim o ya pere nusu hɛ, ko yɛ hwā mo a mǎ hɛ wɛt, bē tɛ̀ mwat wane de a mǎ hwā mo, a tala pyɛ de rwâs hwā mo a tɛ̀, ka sede ya sé tyɛng na pyɛ de shɔt ya ye.

²³Ko ka sede hwā mo a to sɛ̀ ram hak detu, shɔt o yê kwey e begwong vemo ngan: neken e tô neken,

²⁴yis e tô yis, hwin e tô hwin, vwɔ e tô vwɔ, bwol e tô bwol,

²⁵râm kya e tô râm kya, rām e tô rām, zére e tô zére.

²⁶Ka sede mwat a rusu yîs sam mɛ, rwas o kɛ hwā mo ayi, ko yis o ha pere lashe hɛ, a rɔda hàla hɛ washak, yaga yis de a ga bidɛ.

²⁷Ka sede a pat hwîn sam mɛ, rwas o kɛ hwā mo, a rɔda hàla hɛ washak, yaga hwin de a ga bidɛ.

²⁸Ka sede mus wa luga rwas kɛ hwā, wa mɔrɔ, bē tów wɛ na beta, sɛ̌ wa ku, ko be re banamâ wɛ wɛt, ko dâ rɔndɔng o, ba rɔda tabak hɛ wɛt.

²⁹Ko ka sede ba kana tɔk mus o na yol, ko da mo a ra a ka gyeng wɛ wɛt, mwa ano de ba ga ha na yɛ, mus o wa vɛ̌ luga rwas kɛ hwā, wa mɔrɔ, ko bē tów wɛ na beta sɛ̌ wa ku, ko da mo, bē mɔrɔ hɛ arɔng.

³⁰Ko ka ba tɛ̀ a yɛ pyɛ de ê viri hɛ mɛ, a tala mwa pyɛ de ba yɛrɛ a yɛ, yaga na a viri mɛ neken mɛ.

³¹Ano arɔng, ka sede mus o wa luga hwêy wen kɛ hwông mwat hwak, wa mɔrɔ, ko bē ra a da mo tyɛng na redu remo.

³²Ko ka sede mus o wa luga sam, rwas o kɛ hwā mo, wa mɔrɔ, da mo a tala dâ sam o dyām shɛkɛl[10] kuru batat, bē tów mus o na beta sɛ̌ wa ku.

³³Ka sede mwat a tik revɔng pyot, kɛ a cing rɛ, a tik rɛ nà bang, ko rɔndɔng kɛ madung wa gaba e ji mo, wa ku,

³⁴dâ revɔng o a tala dâ yas o dyām, ko yɛ a vɔk revin o.

³⁵Ka sede rɔndɔ̂ng mwat hwak wa luga wo mwât hwak, ko wà ku, bedâ berɔndɔng o bē row kwen o mo, ko bē gas dyām o. Ano arɔng, bē gas revîn rɔndɔng o.

³⁶Ko ka sede ba kana tɔk rɔndɔng o na yol, da mo kwong a ra a ka gyeng wɛ wɛt, a tala rɔndɔng o na rɔndɔng o hwak, ko yɛ a vɔk revin o.