Read berom Nusu 22 Bible Online

Nusu 22 - berom bible

Nusu 22

¹Ka sede mwat a shigi rɔndɔng kɛ vyel, ko a mɔrɔ kɛ a row yɛ, ê tala berɔndɔng betungun yaga gwining o, ko vyēl nyaas yaga jining o arɔng.

²A sé gbing-gbing, gbik o a tala pyɛ de a shigi mo. Ka sede a vɔk pyɛ tala mo wɛt, bē row ɛ, na be tala mɛ. Ka sede ba sɛ̀ yas o na yɛ, ko ya rɔngɔl cen, kɛ a sé rɔndɔng, kɛ vyel, kɛ madung ayi, a tala yɛ zang ba. Sede nabwalak ba sɛ̀ gbik a sé simo yel, na a shigi e ji lɔ, ba dak ɛ, ba mɔrɔ, ko nemi mɛ nê sǎ e ra mwat hwak wɛt. Ko ka sede ba mɔrɔ gbik o e jeng de gwi gwa ga kana nusu, ko nemi mɛ nê raa womo de a mɔrɔ hɛ.

⁵Ka mwat a sé gyeng yas mɛ e hey, ko a hàla yɛ, ya re pyɛ́ e hwiri kɛ bwî anap mwat hwak, bē tɛ̀ dâ yas o a tala dâ hwiri kɛ bwî anap o yi e pyɛ́ mo myɛ yê hwiri kɛ bwî anap mɛ.

⁶Ka sede mwat a dak kya e hwiri mɛ, ko kya mo ha hywit ɛ, ha hwo re rɔgɔ, yi e hwomo he shara hɛ vɔk e pyɛ̂ hwirî mwat hwak de ba ga bang ye kwonot o, kɛ pyɛ́ de ba rɔngɔl nà yɛt, ko mwat de a dak kya mo, a tala pyɛ́ de kya ha re mo.

⁷Ka sede mwat a nɔ̂ng mwat hwak dyām kɛ pyɛ́ cak, na a tik a yɛ, ko ba shigi yɛ̄ e lɔ mo, ka ba sɛ̀ gbik o, ko gbik o a tala pyɛ́ mo zang ba.

⁸Ko ka ba sɛ̀ gbik o wɛt, bē wɔ́ na dalɔ mo e kwɔ̂n re a Dagwi fongol, na yɛ a sira hɛ, wɔgɔ, vwɔ mɛ gwa sé e ji shigî pyɛ́ mo wɛt.

⁹Kayɛ jeng de cuna ya yel e tê bemat behak e ra pyɛ cak, kɛ a sé rɔndɔng, kɛ madung, kɛ vyel, kɛ gworugu, kɛ kayɛ pyɛ de ya vuru hɛ, ko bē wɔ́ na yɛn e kwɔ̂n re a Dagwi fongol. Wane de Dagwi a dura a vɔk renɛn, ko bē tɛ̀ ɛ, a tala mumwɛ zang ba.

¹⁰Ka sede mwat a nɔ̂ng mwat hwak madung, kɛ rɔndɔng, kɛ vyel, kɛ kayɛ yerê yas, na a bang a yɛ, ko ya ku, kɛ ya mǎ yɛ, kɛ ba wɔ̂ kyɛrɛ hɛ, ko vit a mwât nuha,

¹¹mwât bang o a wɔ e kwɔ̂n re a Dagwi fongol, na a sira hɛ, vwɔ mɛ gwa sé e ji pyɛ̂ mwat o wɛt. A sé gbing-gbing na dâ pyɛ́ mo a simo na sira mo, ko yɛ dâ bang o a tala pyɛ wɛt.

¹²Ko ka ba shigi yas o yi na yɛ, a tala da mo.

¹³Ko ka sede a sé e ngyāma de ya hama yɛ, dâ bang o a wɔ̀ dura a da mo yɛ, yaga nuha. Ba rɔda tala pyɛ de ngyāma ya mɔrɔ wɛt.

¹⁴Ka sede mwat a hwɔp yas cak ye mwat hwak, ko yas o ya sɛ̀ ram, kɛ ya ku ayi, ko da mo a sé e kwɔn o wɛt, mwât hwɔp o a tala yas o.

¹⁵Ko ka sede da mo a sé e kwɔn o, mwât hwɔp o a tala pyɛ wɛt. Ko ka sede mwat a tala dyām, na a ra fwom na yas, ko yas o ya sɛ̀ ram kɛ ya ku, dyām de a tala mo yê sè e tô yas o.

¹⁶Ka sede mwat a mɛlɛm hwong de be hwono hɛ wɛt, ko a dyɛng na yɛ, a tala yas mɛ, na a tɛ́ ɛ hwā mɛ.

¹⁷Ko ka sede da mo a kyɛ́ ɛ nà nɔng ɛ hwóng mɛ, ko mwat o a tala dyām tyɛng na pyɛ de be nɔngɔs yaga hwong.

¹⁸Hwo tik hwâ ragas vyoshon a nàra kwen wɛt.

¹⁹Mwa mwat de a dyɛng na ngyama, bē mɔrɔ hɛ.

²⁰Kawɛ mwat de a nára nɔrɔ̂ yas vɔk na dagwi hwak de a sé Dagwi Darwey wɛt, bē wey na yɛ.

²¹Yin tak a mwat duk, kɛ yin midra hɛ wɛt, yaga yin á kana sè bemat beduk e sevwêl Misra arɔng.

²²Yin mɔt kuma kɛ hyɛn wɛt.

²³Ka sede yin a ra ano, ko yɛn a vey na sekun mɛn na me, me, Dagwi Darwey, mê sey kun mɛn.

²⁴Ko shom hom yê hwo e ra yin, mê tɛ̀ be wey na yin e como, ko beha min bê tɛ́ ɛn bekuma, nèy min arɔng nê tɛ́ ɛn nehyɛn.

²⁵Ka sede hwà hwɔp a hwak e ji bemat hom dyām, womo de a sé pwɛng, hwo ra sede bemât hwɔpɔ̂ ndi wɛt, hwo sey ndi yi na yɛ wɛt.

²⁶Ka sede hwà sey ɛ gworugû mwat hwak e tô pyɛ de hwà row a yɛ, ko hwo toyo a yɛ na gwɛ gyam gwi gwo gaba.

²⁷Yaga gworugu mo gwɛ a pyɛ banga mɛ gwining zɔng. Ka vit a gwɛ, ko ê bang ɛ na sɛ́ nabwalak ɛ? Yaga ano, ka a vey na sekun mɛ na me, ko mê sey kun mɛ, yaga ma sé wo toshô reyɔm.

²⁸Yin ha há ves e ra Dagwi, kɛ yin mok gawey e ra mwât nuyel min hwak wɛt.

²⁹Yin ro na pyɔlɔ̂ pyɛ̂ hiri min yê yéneng, na yê nshî anap tanga yê něy na me wɛt.[11] Nɔng me hin nèy negel min bewen o arɔng.

³⁰Ano arɔng, nɔng me hin nèy berɔndɔng na ne vyēl min ne tɔ̂ mɛsɛng o. Nèy o, bemus na begam, ne sangal na benêng nɛ pɔlɔ taama, ko e tuk hê rwit yin nára a me nɛ.

³¹Yin a sé bemat hom de ba ga tik vɛ detu yaga me. Yaga ano, yin re namâ yas de ngyāma ya mɔrɔ wɛt, ko yin bomo a bevu hɛ.