Read berom Nusu 23 Bible Online

Nusu 23 - berom bible

Nusu 23

¹E jeng shɔt, hwo shara neha bɔs wɛt. Hwo wuna to na mwât renɛn, na hwo nɔng nuha bɔs wɛt.

²Hwo raa bamâ nepyak bemat, ka sede ba sé ra pyɛ de ya sé vyes wɛt. Ko jeng de hwà sé nɔng nuha e nuyêl shɔt, hwo raa bamâ bemât rigîm shɔt yaga nepyak mɛn wɛt.

³Ko hwo raa bamâ mwat de a sé pwɛng kɛ vit a hɛ na mwat e jeng shɔt arɔng wɛt.

⁴Ka sede hwà sɛ̀ rɔndɔng kɛ madûng mwât repugu mō de wa sé kyě kyè kpɛɛ, ko hwo toyo a yɛ na wɛ.

⁵Ka hwà pom gobok e ra madûng mwât repugu mō e dyɛngɛ na pyɛ́ de ya ga yɛklɛ wɛ, hwo sɛlɛ hɛ e de ye cik a wɛ, hwo kwey zɔng wɛt.

⁶Hwo tik nà ra a mwat shɔt na tsak o, yaga a sé pwɛng wɛt.

⁷Hwo seres neha bɔs wɛt. Hwo yɛrɛ a mwat, de ba sɛ̀ ɛ na renɛn wɛt, shɔt mɔrɔ, yaga me, Dagwi Darwey, mê wey na mwat wane de a ra pyɛ vyes yerê yane.

⁸Hwo sey pyɛ bâng nu wɛt, yaga ye bang bayîs yêy bemat, ko ye tɛ̀, bemât nuyel be rigim shɔt bemat de ba vɔk tsak o.

⁹Yin midra a mwat duk de a sé sangal na yin wɛt, yaga yin a dun a? Yin arɔng yin á kana sè bemat beduk e Misra.

¹⁰Hwo how cāp mō neshey netyiimin, ko hwo tula pyɛ́ mo.

¹¹Ko e shey hê taama, hwo tik yɛ̄ ye ros. Tik a bepɛng min be yɛt jiri mo, na be sɛ̀ mɛ pyɛ̂ re, ko bwang pyɛ́ de ya tɛt ɛ, ngyāma yê re. Ra tyɛng ano na bwî anap mō tanga batîn pat mō arɔng.

¹²Ra fwom mō pɔlɔ tyiimin, ko tuk hê taama hwo tumal fwom, yaga na hywàrak na madung mō be pɔng, yaga na sam mō tanga mwat duk de hwà jut ɛ e fwom arɔng, be to yang ɛn wɛng-wɛng.

¹³Tē in naka na pyɛ̂ mwa de me, Dagwi Darwey, ma ga ha a yin! Yin ra won na bedagwi behak wɛt, kɛ be wok baza mɛn be nusu e nu min wɛt.

¹⁴Ra in nzem zang tat e shey, na yin nɔng me mɛ nerey.

¹⁵Ne mɛsɛng o nɛ à Nzem Kpam-tuk Sana Géy-sing. Yin ê ra nɛ e pwɛ̂l Avif,[12] yaga e gwɛ de yin a kana nusu ɛ yi e Misra. E ji nepɔlɔ netaama yin ê re kpam-tuk sana géy-sing, sede remo de ma ga nɔng in nu. Hwak e ji min a vey e kwɔ̂n re a me fongol vɔ sǎn wɛt.

¹⁶Ra in Nzem Bwal, ne pyɛ́ yê mɛsɛng de yin a how e cāp min. Ko ra in Nzem Vos Nèy Cɔ́gɔt[13] e nabolos, e bama de ba ga vos nèy anap tanga pat.

¹⁷Zang tat e shey, e ji nzem netat nemo, mwa beras min bē wɔ́ e kwɔ̂n re a me, Darwey Dagwi Darwey, fongol.

¹⁸Yin wuna nɔrɔ̂ yas de yin e yɛt vey na me na pyɛ́ de ya vɔk ɛ géy-sing wɛt. Yin tik sebwêp namâ nzem o he pɔl sana rangas wɛt.

¹⁹Wɔ́ in na pyɛ̂ cap min yê mɛsɛng de ya dal mwa na nerat e lɔ Dagwi Darwey, Dagwi min. Yin kyé renamâ kekwey vyel e ji nevasâl neng o wɛt.

²⁰Dagwi Darwey a ye, “Di, ma sé kyè wɔ̀ tomo tom-lagwi e nuyel min, na a gyep in e kwɛngɛl min, na a kyè na yin wɔ e kwɔn de ma ga yong a yin.”

²¹Wet in betong na yɛ, na yin gyeng ha mɛ. Yin sogo nehywɛ mɛ wɛt, yaga a rɔda hàla a yin wɛt, remo de me, Dagwi Darwey, me dura reto hom yi na yɛ.

²²Ko ka sede yin a gyeng ha mɛ, na yin ra kayɛ pyɛ de ma ha a yin yi na yɛ, ko ma rɔda tó como na bemât repugu min, mê ye yɛndɛng a vemo de be shisa hin e vwara.

²³Tom-lagwi hom ê kyè e nuyel min, na a wɔ́ na yin e kwɔn de BeAmɔr, na BeHiti, na BePɛrizi, na BeKanaan, na BeHivi tanga BeYebus ba sé ɛ, ko ma rɔda wey na yɛn.

²⁴Yin gaba e cât bol bedagwi mɛn, na yin re a vɛ fongol wɛt, kɛ yin masa râ pyɛ́ de bemat o be ragas. Ko wey in na pyɛ̂ sekwit mɛn, yin mɔbɔs beta sekwit de ba tɛ̀ vɛ cik arɔng.

²⁵Re in a me, Dagwi Darwey, Dagwi min, fongol, ko mê tɛ̀ vwel min, he nɔng pyɛ́ na nshî sɔ de yê vey a yin. Mê dul in yi e serɔ arɔng.

²⁶Vit a hwā de ê pat jim, kɛ a wey ɛ̀ sang-gwon e sevwel min. Yin ê kushu beven wɛt.

²⁷“Mê tɛ̀ gbɔng bengyip hom be hwo e ra bemat de bê wok reha min. Mwa vemo de yin ê kwey e nekwɔn sangal mɛn, bê lingsit yaga bengyip, ko ma rɔda tɛ̀ bemât repugu min mwa be tele.

²⁸Mê tɛ̀ tumbang[14] wo hwo e ra bemat o gyam na yin wul. Yi ano, mê ró a yin BeHivi, na BeKanaan tanga BeHiti.

²⁹Ko mê ro mwa hɛn e shey hining wɛt, yaga ka ma ra ano, ko kwɔn o hê tɛ́ ɛ hey, ngyāma yê gwɛsɛ hɛ, yê dal gap min arɔng.

³⁰Ma rɔda ró a yin hɛn tyɔng-ti-tyɔng yi e nuyel min, sɛ̌ yin a gwɛ̌ hin pyak, na yin bin sey ɛ sevwel o.

³¹Ma rɔda tɛ̀ yɛnɛ̂ sevwel min yi e Gbɔng Rep Sere wɔ̀ sɛ̀ Gworep Tē, na yi e hey e rwa batin wɔ̀ sɛ̀ Gwɔrɔt Ɛifaratɛs. Me kyè wɔ̀ nɔng bemât sangal e sevwel o e vɔ min, na yin ro ɛn yi e nuyel min.

³²Yin wuna sira na yɛn kɛ bedagwi mɛn wɛt.

³³Yin tik ɛn, be sangal e sevwel min wɛt. Ka yin a tik ɛn, ko bê tɛ̀ in, yin ra a me renɛn. Ka sede yin a re a bedagwi mɛn fongol, ko ê sè a yin rwik e fwɔ.”