Read berom Nusu 24 Bible Online

Nusu 24 - berom bible

Nusu 24

¹Dagwi Darwey a yâng Mose, “Tūt vey na me, hwo na Aharon, na Nadap na Abihu tanga bemakûk BeIsrayɛl kuru bataama. Gyam yin rɔngɔl nà wul, yin ye guduruk, na yin re a me fongol.

²Hwo nju mo hwo vey bagat na me, ko bwang mɛn bē vey bagat wɛt. Bwang BeIsrayɛl bē tut e raku mo wɛt.”

³Mose a kyè a wɔ̀ ha a bemat mwa badu de Dagwi Darwey a ha, na mwa pyɛ́ de a nɔng ɛ nu e ra yɛ. Ko bemât mwa ba simo na fwɔ gwining, ba ye, “Wot ê ra mwa pyɛ́ de Dagwi Darwey a nɔng redu e ra yɛ!”

⁴Mose kwong a jɛk mwa Badu Dagwi Darwey. Nusu hwol a sogo bop nagasi, a lɔk gàgbang rangâs yas vɔk na Dagwi e tîn raku mo, ko a to tɛ̀ beta kuru na vɛ beba cik, gwining e tô kayɛ yerê BeIsrayɛl.

⁵E bama mo, a tɛ̀ bewên BeIsrayɛl behak, na be nára a Dagwi Darwey nenɔrɔ̂ yas de be rangas burang, ba to yɛt bebôt bemus yaga nenɔrɔ̂ wunâ nesa arɔng.

⁶Mose a jut rebit nemî yas o, a tɛ̀ e ji neshǐ, ko bwang rebit o a waram nɛ e ra gàgbang rangâs yas o.

⁷A to jut bwok-basa badu wuna-na-sira mo, a basa a bemat gwɛ. Ko yɛn a ye, “Wot ê ra na yey mot mwa pyɛ́ de Dagwi Darwey a ga ha mwa!”

⁸Mose kwong a jut neshǐ de na vɔk ɛ nemi mo, a waram nemi mo e ra bemat o, a ye, “Nemi à nemo de na man wuna-na-sira de Dagwi Darwey a wuna na yin e ra badu mɛ vemo mwa.”

⁹E bama mo, Mose na Aharon, na Nadap na Abihu tanga bemakûk BeIsrayɛl kuru bataama ba wɔ̀ tut e ra raku mo,

¹⁰ko ba di Dagwi wo BeIsrayɛl. E nɛ̂n tas bol mɛ ba di sede retis de ba lɔk na safaya, dyéngere ryat sizɔng, ko ye nɛp sede lagwi.

¹¹Ano de bemât nuyêl BeIsrayɛl vane ba di Dagwi, ko yɛ a nára vwɔ mɛ, na a wey na yɛn wɛt. Yɛn a re na sɔ e nuyel mɛ.

¹²Dagwi Darwey a yâng Mose, “Tūt vey na me e ra tɛ̂t raku mo, na hwo gyeng e hwomo, ko ma rɔda nɔng o beta bagasak de ba vɔk ɛ Badu na basa hom de ma ga jɛk ɛ. Bē basa a BeIsrayɛl, na be tɔk pyɛ́ de me simo yi na yɛn.”

¹³Ano kwong, Mose a sogo na Yɔshuwa mwât sɛlɛ mɛ, ko yɛ Mose a kyè wɔ̀ tut e ra rakû Dagwi.

¹⁴A kana yâng bemakûk BeIsrayɛl, bē gyeng e hwomo, sɛ̌ ba to vey sɛ̀ ɛn. Ko Aharon tanga Hur bê sè na yɛn, ko kawɛ de a vɔk ha, a wɔ́ a yɛn na hɛ.

¹⁵Mose a tut e raku mo, ko rele ra kyiri wɛ.

¹⁶Gbɔng nedyɛt nerât Dagwi Darwey nà hwo sangal e ra Raku Sinai mo. É bɛrɛng BeIsrayɛl nedyɛt nerat o na sè sede kya de he lolo e ra tɛ̂t raku mo. Rele mo ra kyiri wɛ pɔlɔ tyiimin, ko e tuk hê taama, Dagwi a yila Mose yi e ji rele mo.

¹⁸Mose a yel e ji rɛ, a tút wɔ e ra tɛ̂t raku mo, ko a sangal e hwomo wosho kuru banaas na pɔlɔ kuru banaas arɔng.