Read berom Nusu 25 Bible Online

Nusu 25 - berom bible

Nusu 25

¹Dagwi Darwey a ha na Mose, a yang ɛ,

²“Ha a BeIsrayɛl, bē vey a me na nenɔrɔ. Hwà rɔda sey a me nenɔrɔ̂ yey pyɛng yi na kawɛ mwat.

³Ko nenɔrɔ de hwô sey yi na yɛn a net: Dyam shinang, na dyam pyɛng tanga dyam pama,

⁴na shwey de ha sé wilwil, na hemo de ha sé sinang tanga hemo de ha sé zwey, na shwêy linen puruk de ha pɛngɛ, na setôt vyēl shi,

⁵na bahwô begam de ba ga tɛ̀ vɛ besinang, na vê pyɛ̂ nshi, na cɔ́gɔt tîn rɔgɔ,

⁶na něy yaga bekywa-kya, na pyɛ̂ nesang nerat de be yong mɛ něy shushu, na pyɛ̂ rangas yê nesang hyɔɔlɔl,

⁷na dyéngere ryat yê onis tanga dyéngere ryat o cak yaga rugû fwôm darwêy bepiris, tanga radîng gèy mɛ.

⁸“BeIsrayɛl bē yong kwɔ̂n re a me fongol na nenɔrɔ nemo mo, na me bin sangal ɛ e tē mɛn.

⁹Yin a rɔda yong kwɔn o mwa na pyɛ́ de bê tɛ̀ e ji mo, tyɛng sede remo de ma sé dura a hwo rezinâ hɛ.”

¹⁰“Hwo tɛ̀, be yong Kundung Wuna-na-Sira na cɔ́gɔt tîn rɔgɔ, nelîs gwɛ mita gwining na besɛntimita kuru, netes o na negarang o besɛntimita kuru bataama.

¹¹Bē dak gwɛ na celes dyam shinang e ji mo na bama mo. Bē gwɔrɔ gwɛ na tɔrɔ e bakwɔng o na dyam shinang.

¹²Bē yong nerwěy nenaas ne dyam shinang, na be tɛ̀ e tîn kundung o e bahagat, neba e kahɛ hagat o.

¹³Bē yong begele na cɔ́gɔt tîn rɔgɔ, ko be dak vɛ na dyam shinang.

¹⁴Bē gyira vɛ e ji nerwěy o e kahɛ hagât kundung o yaga jurûs gwɛ.

¹⁵Bê nàra e ji nerwěy kundung o, ko bē paa vɛ wɛt.

¹⁶Ko hwo tɛ̀ e ji gwɛ beta bagasak de ba vɔk ɛ badu hom de ma rɔda nɔng o.

¹⁷“Bē yong pyɛ bâng kundung o na celes dyam shinang, nelis o mita gwining na besɛntimita kuru, ko netes o besɛntimita kuru bataama.

¹⁸Bē yong bekɛrup beba vê dyam shinang, be táng vɛ. Bē yong vɛ na bafabak. Bē tɛ̀ kɛrup o gwining yaga hagât pyɛ bang o hemo, ko gwining yaga hagat o here. Bē yong vɛ, na be sè pyɛ jining na pyɛ bang o e bahagat baba mo.

²⁰Bafabâk bekɛrup o ba rɔda sè vɔk e rak o, na be tɛ̀ a pyɛ bang o necam. Bekɛrup o bê bɛrɛng bemɛn, ko mwa vɛ bê bɛrɛng pyɛ bang o.

²¹“Hwo tɛ̀ beta bagasak e ji kundung o, ko hwo tɛ̀ pyɛ bang o e ra gwɛ.

²²E kwɔn a hane de mê man ɛ na hwo, yi e ra pyɛ bang o e tê bekɛrup o, ma rɔda ha na hwo, ko mê nɔng o mwa badu hom yaga BeIsrayɛl.”

²³“Hwo tɛ̀, be yong tebut na cɔ́gɔt tîn rɔgɔ, nelis wɛ besɛntimita kuru shabatat, netes o besɛntimita kuru batungun, na negarang o kuru bataama.

²⁴Bē dak wɛ na celes dyam shinang, ko bē tɔrɔ wɛ, bē gwɔrɔ bakwɔng o na dyam shinang.

²⁵Bē gwɛ̌ negarang bakwɔng o na netes de na sé sede tas vwɔ, bē to tɔrɔ, bē gwɔrɔ mɛ mwa bakwɔng o na dyam shinang.

²⁶Bē yong nerwěy nenaas ne dyam shinang, ko bē tɛ̀ a bol naas o hihining.

²⁷Bē tɛ̀ nɛ bagat na kwɔn de ba gwɛ̌ negarang bakwɔng o. Fwôm nerwěy o gwɛ a vɔ̂k begele mo gak e jeng jurûs tebut o.

²⁸Bē yong begele mo na cɔ́gɔt tîn rɔgɔ, ko bē dak vɛ na dyam shinang.

²⁹“Bē yong nepěy, na begance, na netsung tanga neshǐ yaga nása pyɛ̂ sɔ vɔk na Dagwi. Bē yong yɛ̄ mwa na celes dyam shinang.

³⁰Ko e ra tebut o, bē tik ɛ kpam-tuk de wô sè e nuyel hom kayɛ jeng.”

³¹“Hwo tɛ̀, bē yong pyɛ tikîs bekywa-kya na celes dyam shinang de ba táng yɛ naka. Retin o na kwɔ̂n kaba mo de ha vɔk ɛ nelang, na nekwɔn tɛsɛ kya mo bē yong yɛ, na ye sè pyɛ jining o.

³²Pyɛ tikîs bekywa-kya mo ye vɔk nelang netyiimin e bahagat yɛ, nelang netat e kahɛ hagat.

³³Kahɛ lang hē vɔk neshǐ nesɛl o netat de ba yong nɛ sede cúyu almɔn de ya sé wunta hɛ mwa na bakparâk yɛ na berang yɛ, netat nê sè e ra lang de he raa, ko nê raa ano e ra kahɛ e ji nelang netyiimin o, ko mwa nɛ nê yi e pyɛ tikîs bekywa-kya mo.

³⁴Ko kwɔ̂n kaba bekywa-kya mo hê vɔk ɛ neshǐ nesɛl o nenaas de ba yong nɛ sede cuyû almɔn de ya sé wunta hɛ, mwa na bakparâk yɛ na berang yɛ.

³⁵Rekparâk cuyû almɔn o, rining rê sè e tê kanɛ nelang neba.

³⁶Mwa pyɛ́ yê pyɛ tikîs bekywa-kya mo bē táng yɛ na celes dyam shinang, na ye sè pyɛ jining o.

³⁷“Bē yong bekywa-kya betaama, be tɛ̀ vɛ e ra pyɛ tikîs bekywa-kya mo, na be ta negbey wɔ e nuyel.

³⁸Bē to yong bekabra na bèkywa-kya mo na celes dyam shinang arɔng.

³⁹Bē yong pyɛ tikîs bekywa-kya mo na mwa pyɛ̂ wɛ na celes dyam shinang de nedirik o na sé sede kilo kuru batat na vɛ betungun.

⁴⁰Tē naka, na hwo yong yɛ̄, tyɛng sede remo de ma ga dura a hwo rezinâ yɛ e ra raku.”