Read berom Nusu 26 Bible Online

Nusu 26 - berom bible

Nusu 26

¹“Hwo tɛ̀, be yong gworugû bâng bûk sangal hom. Bē yong gwɛ neshǐ neshǐ mo kuru. Bē lɔk nɛ na shwêy linen puruk. E ji nɛ bē lɔk bazinâ bekɛrup na shwey de ha sé wilwil, na sinang tanga hemo de ha sé zwey.

²Nelîs kahɛ shǐ mo ne sè mita kuru na vɛ beba na rebit o, ko negbey o mita beba; mwa nɛ ne sè pyɛ jining o.

³Bē wuna neshǐ mo netungun na tolo, na be sɛ̀ mɛ negbêy gwining. Ano de bê ra na bwang betungun o.

⁴Bē tɛ̀ a kagwɛ mo e hagât nelis o hining pyól kuru batungun na wuulu de wa sé wilwil, na be wuna bebak rugu beba vane mo. Bē yong pyól o, na ye bɛrɛng yê hagat o here.

⁶E bama mo, bē yong yɔ̄bɔ dyam shinang kuru batungun, na be manas mɛ pyôl berugu mo, yaga na berugu beba mo be sè gwining.

⁷“Yaga bâng buk o, hwo to tɛ̀, be lɔk neshǐ berugu mo nehak kuru na hɛ hining na setôt vyēl shi.

⁸Nelis kahɛ mo nè sè mita kuru na vɛ betat na rebit o, ko negbey o mita beba; mwa nɛ ne sè pyɛ jining o.

⁹Bē wuna neshǐ mo netungun na tolo, ko bwâng netyiimin o be wuna na tolo arɔng. E jeng de yin ê tɛ̀ buk o, bē tɛ̀ shǐ hê netyiimin e ra rwi yel, be gunung hɛ befap o beba.

¹⁰Bē tɛ̀ pyól kuru batungun e hagât bak o gwining, ko bē ra ano na hagat o here arɔng, na ye bɛrɛng bemɛn.

¹¹Ano arɔng, bē yong yɔ̄bɔ pama kuru batungun, na be gyira yɛ e ji pyól o, yaga na berugu beba mo be sè gwining.

¹²“Bê lasha pyɛ bang o ye setôt vyēl e ra gworugû linen gworwat o, e gwong de rebit shǐ mo hê kwey gworugû linen o e bamâ buk o. Ko e rwa vwɔ yege na vwɔ mwɛlɛng, pyɛ bang ye setôt vyēl o yê kwey gworugû linen na rebit mita e nelis arɔng.

¹⁴Bē to be yong pyɛ̂ bang o cak bya gbak: jining o bē wuna na bahwô beturuk de ba sé basinang, ko ye neba mo bē wuna na bahwô pyɛ-ji-nshi.”

¹⁵“Hwo to tɛ̀, bē yɛt cɔ́gɔt tîn rɔgɔ, na be yong mɛ ri duk de bê tɛ̀ vɛ cik.

¹⁶Nelîs kagwɛ mo mita benaas na rebit o, ko netes o besɛntimita kuru bataama.

¹⁷Kagwɛ mo gwa rɔda vɔk nenu de na sé myol neba de na sé tyɛng, na ne kaba ri duk o.

¹⁸Bē yong cɔ́gɔt buk o kuru baba yaga rwa batin,

¹⁹na pyɛ̂ gyisâ yɛ kuru banaas na dyam pyɛng, bya yaga kayɛ cɔgɔt, ko jining e kahɛ nû myol o.

²⁰Bē yong pyɛ jining o yaga rwa batô buk o arɔng.

²²Ko yaga hagat bamâ buk o hê rwa ta, bē yong cɔ́gɔt tyiimin.

²³Bē to yong cɔ́gɔt bya zɛɛt yaga bato-kwɔng vê bamâ buk o.[15]

²⁵Ano kwong, ba rɔda vɔk cɔ́gɔt rwit na pyɛ̂ gyisâ yɛ yê dyam pyɛng kuru na yɛ tyiimin, bya yaga kayɛ cɔgɔt o.

²⁶“Bē yong cɔ́gɔt yê gabeneng kuru na yɛ tyungun yê tîn rɔgɔ de yê kaba cɔ́gɔt yê gacik. Bē tɛ̀ tyungun e hagat o hining hê buk o,

²⁷tyungun e hagat o here, na tyungun e hagât bamâ buk o, e rwa ta.

²⁸E ji cɔ́gɔt yê gabeneng o, tyat yê sè yaga tɛ́ e tê bahagât buk o batat, ko bê yɛt yɛ wɛt, bē tɛ̀ yɛ burang.

²⁹Bē dak cɔ́gɔt gacik tanga yê gabeneng na dyam shinang, ko bē yong nerwěy ne dyam shinang, bē wuna nɛ na cɔ́gɔt gacik, na nè kabsa cɔ́gɔt gabeneng o.

³⁰Ano kwong, ra fwom na pyɛ́ yemo mwa na hwo tɛ̀, be wuna bûk sangal hom, tyɛng sede remo de ma dura a hwo e ra raku.”

³¹“Hwo tɛ̀, be lɔk gworugû bâng rwi buk o na shwêy linen puruk. E ji gwɛ bē lɔk bazinâ bekɛrup na shwey de ha sé wilwil, na sinang tanga hemo de ha sé zwey.

³²Bē yong sesêk cɔ́gɔt tîn rɔgɔ naas de ba dak vɛ na dyam shinang, ko bè to vɔk ɛ begúk vê dyam shinang. Bē gyisa vɛ cik e ji pyɛ̂ gyisa yê dyam pyɛng de bê tɛ̀ yɛ e bak vwel o.

³³Bē kaba gworugû bang o na begúk de ba sé e nɛ̂n yɔ̄bɔ de ya sé e ragyip buk o. Ko hwo tik Kundung Wuna-na-Sirâ Dagwi de gwa vɔk ɛ beta bagasak beba e bamâ gworugu mo. Ano de gwa rɔda gas Duk Jɛrɛ yi e Duk Jɛrɛ Wo Jɛrɛ.

³⁴Ko hwo tɛ̀ pyɛ bang e ra Kundung Wuna-na-Sira mo.

³⁵Tik tebut e vwɔ yege e jêy gworugû bâng rwi kwɔn o, ko hwo tik pyɛ tikîs bekywa-kya e vwɔ mwɛlɛng o arɔng.

³⁶“Yaga kwɔ̂n yel e buk o, tɛ̀ bē lɔk gworugu na shwêy linen puruk tanga shwey de ha sé wilwil, na sinang tanga hemo de ha sé zwey. Bē tɔrɔ gwɛ na nzem.

³⁷Bē yong sesêk cɔ́gɔt tîn rɔgɔ tungun, bē dak vɛ na dyam shinang, ko bè to vɔk ɛ begúk vê dyam shinang yaga kaba gworugu mo. Bē yong a vɛ pyɛ̂ gyisa yê pama de bê tɛ̀sɛ ɛ yɛ e bak vwel o.”