Read berom Nusu 27 Bible Online

Nusu 27 - berom bible

Nusu 27

¹“Hwo tɛ̀, be yong gàgbang rangâs yas vey na me na cɔ́gɔt tîn rɔgɔ de nelis o na netes o ne sè tyɛng, ne sè mita beba na besɛntimita kuru batat. Negarang o mita gwining na besɛntimita kuru batat.

²Bē tɛ̀ a hɛ e bato-kwɔng o pyɛ́ de ya sé sede badúk, ko bē wuna yɛ̄, na ye sè pyɛ jining na gàgbang rangas o. Bē dak yɛ mwa na dyam pama.

³Tɛ̀ bē yong mwa pyɛ̂ fwom de yê sè yaga kwɔn o na dyam pama. Pyɛ́ ma yet: bepey yaga paà fongôl kya, na becebut, na bèkɛt sɛ̂t nemi, na begúk tanga bapêy cilâ kya.

⁴“Bē to yong a gàgbang rangas o pyɛ zělzel na dyam pama, ko bē yong nerwěy nenaas yaga kahɛ kwɔ̂ng yɛ mwa vɛ banaas.

⁵Bē tik pyɛ zělzel o e nɛ̂n kwɔgɔt de wa gwɔrɔ kwɔn o wɔ̀ sɛ̀ rwa tē mo.

⁶Bē yong begele beting o yaga gàgbang rangâs yas o na cɔ́gɔt tîn rɔgɔ, ko bē dak vɛ na dyam pama.

⁷Bē gyisa begele mo e ji nerwěy o, na bè sè e bebak kwɔn o beba e jeng jurûs hɛ.

⁸“Bē yong gàgbang rangâs yas o na bebak cɔ́gɔt, na he sè fǒng e ji mo. Tɛ̀ bē yong hɛ tyɛng sede remo de ma dura a hwo e ra raku.

⁹“Hwo tɛ̀, be tɛ̀ a bûk sangal hom pyɛ rɔnɔ de ba lɔk na shwêy linen puruk. E bak rwa batin bē tɛ̀ berugu de nelis vɛ na wul mita kuru banaas na vɛ betyiimin.

¹⁰Bak o wo vɔk sesêk cɔ́gɔt tîn rɔgɔ kuru baba, na pyɛ̂ gyisa mo kuru baba arɔng de ba yong na dyam pama. Ko begúk na bewɔ́rɔ vê kaba berugu mo, bē yong vɛ mwa na dyam pyɛng.

¹¹Bē ra ano e rwa batô buk o arɔng.

¹²E rwa ta, bē tɛ̀ sesek kuru tanga pyɛ̂ gyisa mo kuru arɔng. Bē tɛ̀ berugu de ba sé mita kuru baba na vɛ betat e ra vɛ.

¹³“E rwa rak de gwông yel gwô sè ɛ, negbêy lala mo nê sè mita kuru baba na vɛ betat.

¹⁴E kawɛ bak gwông yel o, bē tɛ̀ sesek tat tanga pyɛ̂ gyisa mo tyat arɔng. Bē tɛ̀ berugu de ba sé mita betaama e ra vɛ.

¹⁶Gwông yel vɔk e lala mo gwô sè e tē, ko nelîs gwɛ nê sè mita shabetat. Bē tɛ̀ a gwɛ gworugû bang de bê lɔk gwɛ na shwêy linen puruk tanga shwey de ha sé wilwil, na sinang tanga hemo de ha sé zwey. Bē tɔrɔ gwɛ na nzem. Bē gana gworugu mo e ra sesek naas de bà vɔk ɛ pyɛ̂ gyisa mo nyaas arɔng.

¹⁷“Bē wuna mwa sesek de ba rɔnɔ mɛ lala mo na bewɔ́rɔ dyam pyɛng. Begûk vɛ bē yong na dyam pyɛng arɔng, ko pyɛ̂ gyisa mo na dyam pama.

¹⁸Ano kwong, nelîs lalâ buk o ne sè mita kuru banaas na vɛ betyiimin, netes o mita kuru baba na vɛ betat, ko negarang pyɛ rɔnɔ mo ne sè mita beba na besɛntimita kuru batat. Bē lɔk berugu mo na shwêy linen puruk, ko be yong pyɛ̂ gyisa mo na dyam pama.

¹⁹Pyɛ̂ mwa de bê yong yaga fwom e kwɔ̂n re a me fongol, tanga bekwagam buk o na vê lala mo arɔng, be sè vê dyam pama.

²⁰“Hwo nɔ̂ng BeIsrayɛl nu, bē vɛ̀sɛ na něy pwat de na dal na nerat, yaga na be tɔk tɛ̀sɛ kya e bekywa-kyâ bûk sangal hom kanɛ nawiri.

²¹Aharon na nèy mɛ bē tɛ̀ kya e bekywa-kya mo e nuyêl gworugû dûl Kundung Wuna-na-Sira. E hwomo, e nuyel hom, bê lolo yi e nawiri vɔk e nagasi. BeIsrayɛl na yére mɛn bē gyeng redu remo neshey gbak-gbak.”