Read berom Nusu 28 Bible Online

Nusu 28 - berom bible

Nusu 28

¹Dagwi Darwey a to yâng Mose, “Yila gwà mō Aharon tanga nèy mɛ bewen o — Nadap, na Abihu, na Ɛlɛyazar tanga Itamar yi e ji BeIsrayɛl vey na hwo. Tik ɛn detu, na be ra a me fwôm bepiris.

²Tɛ̀ bē lɔk a gwà mō Aharon berugu zɛɛt berat o sizɔng de bê jám a fwom mɛ.

³Ha a vemo mwa de ba tɔk fwôm vwɔ, yɛn vane de ma ga nɔng ɛn tɔ̂k râ pyɛ́ yane, na be lɔk a Aharon berugu, na be tik ɛ detu, na a ra a me fwôm piris.

⁴Berugu de ba rɔda lɔk o vɛ a radîng gèy, na rugû fwom, na gworugû rak o, na gworugû ji mo, na torô kpin tanga gyindi. Bē tolo berugu zɛɛt yaga gwà mō Aharon na nèy mɛ, na be ra a me mɛ fwôm bepiris.

⁵Bē ra fwom o na shwey hê dyam shinang, na shwey de ha sé wilwil, na sinang tanga hemo de ha sé zwey, na shwêy linen puruk arɔng.

⁶“Hwo tɛ̀, be lɔk rugû fwom na shwêy dyam shinang, na hê linen puruk tanga shwey de ha sé wilwil, na sinang tanga hemo de ha sé zwey. Bē lɔk gwɛ na nzem.

⁷Kegyindî rugu mo, bē lɔk kɛ na nzem na pyɛ́ yane mo arɔng, bē wuna kɛ na rugû fwom o. Bē lɔk pyɛ̂ ye làp bya de bê wuna ɛ rugu mo e nuyel na bamâ batô vɔ.

⁹Tɛ̀ be jut dyéngere ryat bya yê onis. Tɛ̀ mwât tɔ̂k tɛ́sɛ jɔ̂t batô gwɔ̀m, a jining e ra yɛ̄ bazâ nèy Yakɔp kuru na nɛ neba, baza betyiimin e gwofwa gwining, ko bwang baza betyiimin e gwo neba, be raa mɛ e tɔs mɛn. Ano arɔng, bē yong nekwɔn de nê vɔk dyéngere mo na dyam shinang.

¹²Bē tɛ̀ yɛ̄ bya, na be man yɛ na pyɛ̂ ye làp o e batô vɔ rugû fwom o, na ye sè e tô yére BeIsrayɛl. Ano de Aharon ê vɔkɔs bazâ yɛ̄ e batô vɔ mɛ, pyɛ̂ bare e nuyel hom, me Dagwi Darwey.

¹³“Bē yong nekwɔn kabsa neba na dyam shinang.

¹⁴Bē to yong ngyang bya na celes dyam shinang sede rwik, bē wuna yɛ na nekwɔn kabsa mo e ra pyɛ̂ ye làp o.

¹⁵“Hwo tɛ̀, be lɔk radîng gèy wo darwêy bepiris yaga rangsal me pyɛ́ de me simo be ra. Bē lɔk wɛ na pyɛ jining o, na tɔrɔ sede rugû fwom.

¹⁶Bē gunung rugu mo fap beba, ko nelis o na negbey o nè sè sede negbêy tas vwɔ ba.

¹⁷“E nuyêl rading o, bē manas ɛ̀ dyéngere ryat kuru na yɛ bya yemo de ba ga tɛ̀ e nekwɔn vɔ́k o ne dyam shinang. Bē manas yɛ̄ e begwong o benaas. E gwong gwô mɛsɛng o bē ngyɛrɛ ɛ dyéngere ryat de be tâng yɛ a karnelyan, na topas tanga ɛmɛral; e gwong o gwo neba turkɔs, na safaya tanga dayamɔn; e gwong o gwo netat yakinta, na agat tanga ametis; ko e gwong o gwô tala mo beril, na onis tanga yaspa.[16]

²¹Bē jining bazâ yére BeIsrayɛl kuru na yɛ bya e ra dyéngere mo, hining e ra kayɛ mo.

²²“Bē yong nerwěy neba ne dyam shinang, na be tɛ̀ nɛ e bato-kwɔng rak o vê radîng gèy. Bē wuna ngyang yê celes dyam shinang bya de ba ga man na nekwɔn kabsa e ra pyɛ̂ ye làp na nerwěy rading o.

²⁶Bē to yong nerwěy neba ne dyam shinang, ko bē tɛ̀ nɛ e bato-kwɔng tîn radîng gèy o e nɛn o.

²⁷Bē to yong nerwěy o nehak neba ne dyam shinang, ko bē tɛ̀ nɛ e ra pyɛ̂ ye làp bagat wɔ̀ sɛ̀ gyindî rugû fwom o.

²⁸Bē rɔgɔs nerwěy radîng gèy o tanga ne rugû fwom o na rwik de gwa sé wilwil. Ano de rading o wô sangal gak e ra kegyindi mo, sana hàla kwɔ̂n sangal wɛ.

²⁹“Kayɛ jeng de Aharon ê yel e Duk Jɛrɛ, a rɔda tɛ̀ radîng gèy o de wa vɔk ɛ bazâ yére BeIsrayɛl. Ko me, Dagwi Darwey, mê dopse bare na bemat hom.

³⁰E ji radîng gèy o, hwà rɔda tɛ̀ Urim na Tumim, yaga na Aharon a vɔk ɛ vɛ, jeng de a sé kyè vey e nuyel hom. Ano de ê vɔk pyɛ de a rɔda tɔk mɛ simo hom yaga BeIsrayɛl, kayɛ jeng de a sé kyè vey e nuyel hom.”

³¹“Hwo tɛ̀, be lɔk gworugû rak o gwolwis o na shwey de ha sé wilwil, zɔgɔ gwɛ.

³²Bē tɛ̀ a gwɛ fwɔ de to hê yel ɛ, bē lɔk keshwey kpadarak, bē tolo kɛ, ko bē gwɔrɔ mɛ fwɔ̂ rugu mo, yaga na gwo kwon hama hɛ wɛt.

³³Bē tɔrɔ tîn gworugu mo na nèy cɔ́gɔt pomigiranet de ba yong nɛ na shwey de ha sé wilwil, na sinang tanga hemo de ha sé zwey, ko bē tɛ̀ begyɛngɛrɛng vê dyam shinang e tê nɛ.

³⁴Bē sɔksɔl begyɛngɛrɛng o na nèy cɔgɔt o pere wɔ̀ gwɔrɔ mɛ mwa tîn gworugu mo.

³⁵Aharon ê tɛ̀ gwɛ jeng de a sé ra fwôm piris. Jeng de a sé kyè vey e nuyel hom e Duk Jɛrɛ, na jeng de a sé kyè wɔ̀ nusu, bê wokos toshô begyɛngɛrɛng o, ko ê ku wɛt.

³⁶“Bē yong kebworô celes dyam shinang, ko bē jining ɛ jɛk sede hê tô gwɔ̀m ngan: WO JƐRƐ YAGA DAGWI DARWEY.

³⁷Bē rɔgɔs kɛ e nuyêl torô kpin na rwik de gwa sé wilwil.

³⁸Ka rɔda sè e ra tilî Aharon, yaga na me, Dagwi Darwey, me bin sey nenɔrɔ de BeIsrayɛl be nása vey na me, mwa ano de be ragas buru e de nása nɛ.

³⁹“Bē lɔk gworugû ji mo gwolwis o na shwêy linen puruk, ko bē to lɔk torô kpin o na pyɛ jining o. Ano arɔng bē lɔk gyindi de bê tɔrɔ wɛ na nzem.

⁴⁰“Hwo tɛ̀, be lɔk a nèy Aharon bewen o berugû ji mo belis o, na begyindi tanga bebong arɔng, berugu berat o de ba jam yaga fwom mɛn.

⁴¹Hwo tɛ̀ a gwà mō Aharon tanga nèy mɛ ɛ pyɛ́ mo. E bama mo, hwo shushu hɛn na něy, hwo tɛ̀ ɛn bepiris, ko hwo tik ɛn jaram, yaga na be ra fwôm bepiris hom.

⁴²Bē tolo a yɛn tacuru byit o na rugû linen, na ye kaba yi e rawit wɔ̀ sɛ̀ yɛnɛ̂ tà yaga bang mɛ newarap mɛn.

⁴³Aharon na nèy mɛ bê tɛ̀sɛ tacuru mo kayɛ jeng de bé kyè wɔ e bûk sangal hom, kɛ jeng de ba sé kyè wɔ bagat na gàgbang rangâs yas, na be ra fwom. Ka ano wɛt, ba rɔda hwɔtɔ a tó mɛn nɛn, ko hê vey a yɛn na reku. Hemo ha rɔda tɛ́ ɛ redu yaga Aharon na yére bama mɛ neshey gbak-gbak.