Read berom Nusu 29 Bible Online

Nusu 29 - berom bible

Nusu 29

¹“Di, pyɛ́ de hwô ra a Aharon na nèy mɛ bewen o, jeng de hwô tik ɛn jaram, yaga na be bin ra a me fwôm bepiris a yet: Jut bwôt mus na beturuk beba de mwa yɛ ya vɔk rām kɛ pyɛ cak vyes wɛt.

²To jut kpam-tuk, na nekpam-tuk rɔkrɔk de ba súk na něy, na kpam-tuk bagasak de ba mɔmɔ ɛ̀ něy. Bē yong mwa yɛ̄ sana géy-sing na nemuk alkama ne myeenen.

³Tɛ̀ yɛ̄ e kaw, ko hwo vey mɛ, hwo vɔk ɛ na bwôt mus tanga beturuk beba mo.

⁴“Hwo wɔ́ na Aharon na nèy mɛ e rwi bûk sangal hom, ko hwo kus ɛn na nshi.

⁵Jut berugu mo, na hwo tɛ̀ a Aharon vɛ, gworugu ji mo gwolwis o, na gworugu rak o, na rugû fwom tanga radîng gèy. Hwo rɔgɔs rugû fwom o na gyindî gwɛ de ba tɔrɔ.

⁶Tɛ̀ a yɛ torô kpin e rato mɛ, ko hwo rɔgɔs ɛ keboro kane e ra torô kpin o de wa vɔk ɛ jɛk ngan: WO JƐRƐ YAGA DAGWI DARWEY.

⁷E bama mo, jut něy shushu, na hwo shushu a yɛ e rato mɛ.

⁸“Hwo vey na nèy mɛ, tɛ̀ a yɛn berugu belis mɛn,

⁹na bebong mɛn. Ko hwo rɔgɔs a Aharon na nèy mɛ begyindi. Yi ano, fwôm bepiris gwa ga tɛ́ ɛ mwɛn e ra redu de ra nàra nesheneshey. “E bama mo, hwo tɛ̀ Aharon na nèy mɛ bepiris hom.

¹⁰Hwo vey na bwôt mus e nuyêl bûk sangal hom, ko Aharon na nèy mɛ, bē tɛ̀ vɔ mɛn e ratô wɛ.

¹¹Yɛrɛ wɛ e nuyêl gàgbang rangas yas yaga me, e rwi buk hom o.

¹²Vɛ nemi mo, na hwo tɛ̀ nɛ na kwɛn vwɔ mō e ra pyɛ́ de ya sé sede badúk yê kwɔn o, ko bwang nemi mo mwa, hwo losho nɛ e retîs kwɔn o.

¹³Paa mwa sebwêp pyɛ̂ jim o, na cûng bwep de ya sé e ra yey o, tanga pyík o na bwep yɛ̄, na hwo rangas e ra kwɔn o.

¹⁴Ko banamâ mus o, na rehwo mo tanga balagey o, hwo rangas e bamâ jêy kwɔ̂n ye ngyɔk. Hemo ha sé nɔrɔ de be hàla mɛ banɛ̂n bepiris.

¹⁵“E bama mo, jut gwining e ji beturuk o, ko Aharon na nèy mɛ, bē tɛ̀ vɔ mɛn e ra tô wɛ.

¹⁶Yɛrɛ wɛ, vɛ́ nemi mo, na hwo waram nɛ̀ e ra bakwɔng banaas vê gàgbang rangâs yas o.

¹⁷Yɛt turuk o bagap o bagap o, kus pyɛ̂ jim o tanga bol bama mo, ko hwo wuna na bagap o tanga to mo.

¹⁸Rangas mwa turuk o e ra gàgbang rangas o. Hemo ha sé nɔrɔ̂ pyɛ̂ re, de nesang hɛ ne pɛngɛ a me yey.

¹⁹“Ano kwong, hwo to vey na turuk o woro, ko Aharon na nèy mɛ bē tɛ̀ vɔ mɛn e ra tô wɛ.

²⁰Yɛrɛ wɛ, vɛ nemi mo, ko hwo tɛ̀ a Aharon nɛ e kwɔ̂ng fwông vwɔ yege mɛ tanga ve nèy mɛ, na e ra bekɛn vɔ berey mɛn ve yege, tanga e ra bekɛn bol berey mɛn ve yege arɔng. Bwang o kwong, waram nɛ e ra bakwɔng banaas vê gàgbang rangâs yas o.

²¹To nɔ̀t ɛ nemi de na sé e ra kwɔn o, tanga něy shushu, ko hwo zagat e ra Aharon na e ra berugu mɛ, tanga e ra nèy mɛ na berugu mɛn arɔng. Ano de Aharon tanga nèy mɛ na berugu mɛn bê sè jaram yaga me.

²²“Hwo paa sebwêp turuk o wo neba de wa sé yaga nɔrɔ de be nára jeng tɛ̂ bepiris hom. Yerê bwep a hemo: hê rum o, na hê pyɛ̂ jim o, na cûng bwep de ya sé e ra yey o, na pyík o, na bwêp yɛ, tanga fwâ vwɔ yege mo.

²³Jut regat kpam-tuk rining, yi e kaw de wa sé e nuyêl gàgbang rangâs yas, na kegat kpam-tuk rɔkrɔk kining de ba tɛ̀ ɛ něy, tanga kpam-tuk bagasak gwining arɔng.

²⁴Tɛ̀ mwa pyɛ́ yemo e vɔ Aharon na nèy mɛ, na be ra mɛ, sede ba sé nára nɔrɔ yaga me.

²⁵E bama mo, to sey yɛ yi e vɔ mɛn, ko hwo rangas yɛ̄ e ra gàgbang rangas o e ra nɔrɔ̂ yas burang. Hemo ha sé nɔrɔ̂ pyɛ̂ re de nesang hɛ ne pɛngɛ a me yey.

²⁶“Hwo jut cɔ̌ turuk wo neba, womo de wa sé yaga tɛ̂ Aharon piris hom, ko hwo ra mɛ, sede hwà sé nára a me nɔrɔ̂ yɛ. Ya rɔda sè numo mō hê nɔrɔ mo.

²⁷Kayɛ jeng de BeIsrayɛl bê nása nɔrɔ̂ wunâ nesa vey na me, cɔ̌ tanga fwâ yege bê sè numo hê yére Aharon. Hê sè nenɔrɔ mɛn vey na me, Dagwi Darwey. Hemo ha sé ano, yaga jeng de ba kana nára turuk tɛ̂ Aharon na nèy mɛ bepiris hom, ba ra na cɔ̌ mo sede ba sé nára a me nɔrɔ̂ yɛ, ko ba nára fwa mo e nuyêl gàgbang rangâs yas. Yaga ano, hwo Mose, hwo tɛ̀ pyɛ́ yemo jɛrɛ yaga bepiris hom.

²⁹“E bamâ rekû Aharon, bē nɔ̂ng hwey mɛ de hê jut fwom mɛ berugu mo. Fwom de ê ragas, gwɛ a yeles e bûk sangal hom, na a ra fwom e Duk Jɛrɛ. Ná berugu vemo, bê shushu a yɛ něy, bê tɛ̀ ɛ darwêy bepiris. A rɔda tɛ̀ berugu mo pɔlɔ taama.

³¹“Hwo jut namâ turuk wo neba, ko hwo kyé hɛ e kwɔn de ha sé jɛrɛ.

³²Aharon tanga nèy mɛ ba rɔda re banama mo, mwa na kpam-tuk de wa tɛt ɛ e kaw, e hwomo e rwi bûk sangal hom.

³³Yɛn zɔng de ba ga hàla a yɛn banɛn mɛn de bê re pyɛ́ yemo e jeng tɛ́ ɛn bepiris, na be tik ɛn jaram. Vit a mwat hwak de ê re pyɛ́ yane mo, yaga ya sé jɛrɛ.

³⁴Ko ka sede bwang banama kɛ kpam-tuk gwa pɔl vɔk e gasi, ko hwo rangas yɛ̄. Bē re wɛt, yaga ya sé pyɛ̂ jɛrɛ.

³⁵“Ano de hwô ra a Aharon na nèy mɛ pyɛ́ de ma nɔng o nu: nára nɔrɔ̂ tɛ́ ɛn bepiris nepɔlɔ netaama.

³⁶Kahɛ tuk, hwo nára nɔrɔ̂ mus de be rangas vey na me, yaga na be hàla a yɛn mɛ banɛn. Hemo hê tɛ̀ gàgbang rangas o jɛrɛ. Zagat kwɔn o na něy shushu, na be tɛ̀ hɛ jaram.

³⁷Nepɔlɔ netaama, hwo raa e de ra ano. Yi ano de gàgbang rangas o wa rɔda dal mwa na nejɛrɛ, ko kawɛ mwat de ba nɔng ɛ nû ra mo wɛt, ka sede a ra kwɔn o, ko ê dal wɛt.

³⁸“Di, pyɛ́ de hwô nása nenɔrɔ̂ yɛ kahɛ tuk e ra gàgbang rangâs yas, yɛ̄ a bebôt beturuk beba vê neshey ninining de be yɛt, be rangas burang.

³⁹Nára gwining nagasi ko gwining o nawiri.

⁴⁰To gwɛ̌ yaga nɔrɔ̂ nemuk shǐ masa hining hê nemuk alkama nerat de hwà suk nɛ na shǐ masa gwining hê něy pwat de na dal na nerat. Yaga nɔrɔ̂ pyɛ̂ sɔ, hwo to mara nshî anap shǐ masa hining, ko hwo tɛ̀ yɛ̄ mwa e ra kwɔn o. Hemo ha sé nɔrɔ̂ pyɛ̂ re de nesang hɛ ne pɛngɛ a me yey.

⁴²Yin na yére min yaga bezamang min vɔk e nuyel, yin ê nása a me nenɔrɔ nemo e rwi bûk sangal hom. E buk o de ma rɔda man na yin, na me ha na hwo.

⁴³E hwomo de ma rɔda man na BeIsrayɛl arɔng, ko gbɔng nedyɛt nerat hom nê tɛ̀ kwɔn o jɛrɛ.

⁴⁴Ma rɔda tɛ̀ buk o tanga gàgbang rangâs yas o jɛrɛ, ko ma rɔda tik Aharon tanga nèy mɛ bewen o jaram, na be ra a me fwôm bepiris.

⁴⁵Ma rɔda sangal e tê BeIsrayɛl, mê sè Dagwi mɛn.

⁴⁶Ano kwong, yɛn a rɔda tɔk, e me wɛ a Dagwi Darwey, Dagwi mɛn, de ma nusu na yɛn yi e sevwêl Misra, yaga na me sangal e ji mɛn. E me wɛ a Dagwi Darwey, Dagwi mɛn.