Read berom Nusu 3 Bible Online

Nusu 3 - berom bible

Nusu 3

¹Mose a sè gyeng vyêl tyà mɛ Yɛtrɔ, piris e Midyan. Tuhak, a kyè na vyēl o, a ye mɛ̀ dɔ e hey, a wɔ̀ wul Hɔrɛp, raku de Dagwi a ga tɛ̀ wɛ jaram yaga yɛ.

²E hwomo, tom-lagwi Dagwi Darwey a dura tó mɛ na yɛ sede lêm kya de ha lolo e tê reburuk. Mose a di kya he re e reburuk o, ko ha ka re rɛ wɛt.

³A ye e yey mɛ, “Pyɛ langat a yemo! Me gwɛ̌ wɔ bagat na me di, yaga sɛ́ de kya ha sé re reburuk o wɛt ɛ?”

⁴Dagwi Darwey a di Mose, a sé kyè vey bagat, a yila hɛ yi e tê reburuk o, a ye, “À Mose! À Mose!” Mose a ye, “Me à womo.”

⁵Dagwi a ye, “Hwo gwɛ̌ sek bagat wɛt! Pat bekpatak mō, yaga kwɔn de hwà tumal ɛ̀ ha sé jaram yaga me.”

⁶A to ye, “Ma sé Dagwi de da mō a re a yɛ fongol, Dagwi wo Abraham, na Yishak tanga Yakɔp.” Ko Mose a bang bayis mɛ, yaga a wok bengyip de e bɛrɛng Dagwi.

⁷Dagwi Darwey a ye, “Ma ga di yerê neves de be ra a bemat hom e Misra. Ma ga wok sesin mɛn de be simo be sey ɛn yi e vwɔ̂ bemât nuyel de be tak a yɛn. Ma tɔk kayɛ pyɛ e ra reyɔm de be sɔ.

⁸Yaga ano de ma vey, na me sey ɛn yi e vwɔ̂ BeMisra, na me nusu na yɛn yi e sevwel semo vɔk e vwel de ha sé rat, ha to sé rey, vwel de ha siri, ko he nɔngɔs pyɛ́ shɛrɛk. Vwel a hane de BeKanaan, na BeHiti, na BeAmɔr, na BePɛrizi, na BeHivi, tanga BeYebus ba sé ɛ̀ e sangal a remo.

⁹Ey, mwin, ma ga wok sesîn bemat hom, ko ma ga di gwong de BeMisra be tak a yɛn.

¹⁰A remo, ma sé kyè wɔ̀ tomo hwo vɔk na gbɔng gwɔ̀m Misra, na hwo wɔ̀ nusu na bemat hom BeIsrayɛl yi e sevwel mɛ.”

¹¹Ko Mose a yâng Dagwi, “Ma sé wa, de mê tɔk wɔ̀ na gbɔng gwɔ̀m, na me nusu na BeIsrayɛl yi e Misra ɛ?”

¹²Ko Dagwi a ye, “Ma rɔda sè tanga hwo. Jeng de hwà ga nusu na bemat yi e Misra, yin a rɔda re a me fongol e reku remo. Pyɛ ma yane de yê dura tsɛng-tsɛng, e me de ma tomo hwo.”

¹³Mose a hanat, a ye, “Ka sede ma wɔ́ na BeIsrayɛl, ko ma ha a yɛn wɔgɔ, Dagwi wo beda mɛn Abraham, na Yishak tanga Yakɔp a tomo me na yɛn, ko yɛn a rɔda rangal me reza mɛ, ko mê ha a yɛn ala?”

¹⁴Dagwi a ye, “Ma sé womo de me sege me wɛt. Yang ɛn, womo de e sege hɛ wɛt a tomo hwo vey na yɛn.

¹⁵Yang ɛn, Dagwi Darwey, yɛ Dagwî beda mɛn Abraham, na Yishak, tanga Yakɔp a tomo hwo vey na yɛn. Reza hom a rane nesheneshey, mwa bezamang bê yila me mɛ.

¹⁶“Kyè, na hwo wɔ̀ tula bemakûk BeIsrayɛl, ko hwo ha a yɛn: Dagwi Darwey, Dagwi wo beda mɛn Abraham, na Yishak tanga Yakɔp a ga dura tó mɛ na hwo. Yang ɛn, ma ga di pyɛ de ba sé ra a yɛn e ji Misra.

¹⁷Yaga ano, ma ga tik ɛ̀: Me kyè wɔ̀ pat ɛn yi e reyɔm o, na me vɔk na yɛn e sevwêl BeKanaan, na BeHiti, na BeAmɔr, na BePɛrizi, na BeHivi tanga BeYebus, vɔk e vwel de ha siri, ko he nɔngɔs pyɛ shɛrɛk.

¹⁸“Ka sede hwà ha a yɛn e gwong gwomo, BeIsrayɛl ba rɔda wok o. E bama mo, hwo tanga bemakûk Israyɛl, yin ê wɔ na Farawo, ko yin a rɔda yang ɛ, ‘Dagwi Darwey, Dagwi wo BeIbrani, a ga dura tó mɛ na wot. A remo, wot a sé ra won na hwo, na hwo tik, wot kyè kwɛngɛl nepɔlɔ netat e hey, na wot wɔ̀ nása a Dagwi Darwey, Dagwi mot, nenɔrɔ̂ yas de be yɛt.’

¹⁹Ko di, ma tɔk, Farawo ê hala hin wɛt, ko vit a mwât gap hwak e ji jey de ê tɛ̀ ɛ gbing-gbing arɔng.

²⁰Ko mê nára vwɔ hom e ra yɛ. Ma rɔda tabak Misra na pyɛ̂ bes yê bengyip yemo de mê ra e hwomo. E bama mo, a rɔda hàla hin na yin nusu.

²¹“Ma rɔda tɛ̀ BeMisra, be ra a yin pyɛ́ ryat. Ano, e jeng nusu min, yin a rɔda nusu vɔ sǎn wɛt.

²²Kawɛ hwâ BeIsrayɛl a rɔda wɔ na hwâ BeMisra de a sé mwât vwara mɛ, na womo de a sé na sangal e lɔ mɛ, na be rangal pyɛ̂ dyam pyɛng na dyam shinang tanga berugu. Yɛn ê tɛ̀ a nèy bewen tanga behwong mɛn yɛ̄. Yi na ra ano de yin ê sey ɛ̀ pyɛ̂ nedanerêy BeMisra.”