Read berom Nusu 30 Bible Online

Nusu 30 - berom bible

Nusu 30

¹“Hwo tɛ̀, be yong gàgbang rangâs pyɛ̂ nesang hyɔɔlɔl na cɔ́gɔt tîn rɔgɔ.

²Nelis o nè sè rebit mita, ko negbey o ano arɔng, negarang o nè sè mita gwining, badúk hɛ be sè pyɛ jining na gàgbang rangas o.

³Bē dak hɛ na celes dyam shinang e ra rak o, na mwa bebak o na badúk o, ko bē gwɔrɔ hɛ na tɔ́rɔ na dyam shinang.

⁴Bē yong nerwěy neba ne dyam shinang, bē tɛ̀ nɛ wɔ̀ gyirik na kwɔn de ba gwɔrɔ na tɔrɔ e bebak de be bɛrɛng bemɛn, ko ba rɔda sè yaga gyisâ begelê jurûs kwɔn o.

⁵Begele mo, bē yong vɛ na cɔ́gɔt tîn rɔgɔ, ko be dak vɛ na dyam shinang.

⁶“Hwo tik gàgbang rangas o e nuyêl gworugû bâng rwi buk de gwa sé e nuyêl Kundung Wuna-na-Sira, e nuyêl pyɛ bang de ya sé e ra kundung o. E hwomo, ma rɔda man na hwo.

⁷Aharon kwong, ê rangas pyɛ̂ nesang hyɔɔlɔl e ra kwɔn o kanɛ nagasi, jeng de a sé yong bekywa-kya.

⁸A rɔda to rangas yɛ̄ nawiri, jeng de ê tɛ̀ kya e bekywa-kya mo. Bē dopse rangas nɔrɔ̂ pyɛ̂ nesang hyɔɔlɔl e nuyêl me, Dagwi Darwey, yaga bezamang min vɔk e nuyel.

⁹Yin rangas pyɛ̂ nesang hyɔɔlɔl cak detu, kɛ nɔrɔ̂ yas de be rangas kɛ hê nemuk wɛt, yin shusha nɔrɔ̂ pyɛ̂ sɔ e ra kwɔn o arɔng wɛt.

¹⁰Zang hining e shey, Aharon ê tɛ̀sɛ nemî nɔrɔ de be hàla a bemat mɛ banɛn e ra badúk kwɔn o. E gwong gwomo, ê tɛ̀sɛ hɛ jɛrɛ. Bē ra ano kahɛ shey yaga bezamang min vɔk e nuyel. Kwɔ̂n rangâs o ha dal mwa na nejɛrɛ, ha sé zɛɛt yaga me.”

¹¹Dagwi Darwey a yâng Mose,

¹²“Di, jeng de hwô bara nepyak beras e ji BeIsrayɛl de ba ga vey tô como, hwo jɛk, kawɛ mɛn ê tala a me dyām yaga neken mɛ. Ka ano wɛt, tumbang wô hwo e ra yɛn, yaga ba bara hɛn.

¹³Kawɛ de ba ga jɛk ɛ, yi e womo de a vɔk neshey kuru baba vɔk e rak o, ê tala rebit shɛkɛl tyɛng na masâ dyām de be ra mɛ fwom e kwɔ̂n re a me fongol. Shɛkɛl o wa sé dyam pyɛng begiram kuru na vɛ beba. Rebit shɛkɛl remo ra sé nɔrɔ vɔk na me.

¹⁵Jeng de bê tala dyām o yaga neken mɛn, bedaberey bê nɔng pyɛ de ya dal wɛt, ko pwɛng arɔng ê nɔng pyɛ de ya radɛ rebit shɛkɛl o wɛt.

¹⁶Ko hwo sey dyām yane yi na BeIsrayɛl, na hwo tik yɛ̄ yaga râ fwôm bûk sangal hom. Dyām o yê sè yaga neken mɛn, ko mê bare na yɛn, na me gyep ɛn.”

¹⁷Dagwi Darwey a to yâng Mose,

¹⁸“Hwo tɛ̀, be yong gwopey na dyam pama tanga pyɛ tikîs gwɛ ye dyam pama arɔng. Tik gwɛ e tê bûk sangal hom na gàgbang rangâs yas. Sila gwɛ na nshi,

¹⁹yaga na Aharon na nèy mɛ bē kus vɔ na bol mɛn na nshi mo, gyam na yɛn a kyè wɔ̀ yel e buk o, kɛ yɛn a wɔ́ bagat na gàgbang rangas yaga ragas fwôm nása nenɔrɔ̂ pyɛ̂ rangas vey na me.

²¹Ka ba ra ano wɛt, ko bê kushu. Hemo ha sé redu yaga Aharon na yére mɛ yaga bezamang mɛn vɔk e nuyel.”

²²Dagwi Darwey a to yâng Mose,

²³“Vɛ pyɛ̂ nesang nerat yemo de ya dal: yɛ̄ à kilo betyiimin vê nshî mir, na kilo betat vê sinamɔn, na kilo betat vê sere de sa vɔk nesang nerat,

²⁴na neshǐ masa netat nê kasiya. Bē masa pyɛ́ mo na masâ dyām de be ra mɛ fwom e kwɔ̂n re a me fongol. Gwɛ̌ neshǐ masa nenaas ne něy pwat.

²⁵Hwo tɛ̀, be wuna, be yong mɛ něy shushu, yerê nemo de mwât tɔ̂k wunsâ něy nesang hyɔɔlɔl e yong. Nà rɔda sè něy shushu ne jɛrɛ.

²⁶Ra fwom na něy o, na hwo zagat mɛ bûk sangal hom, na Kundung Wuna-na-Sira,

²⁷na tebut tanga mwa pyɛ̂ wɛ, na pyɛ tikîs bekywa-kya tanga mwa pyɛ̂ wɛ, na gàgbang rangâs pyɛ̂ nesang hyɔɔlɔl,

²⁸na gàgbang rangâs yas tanga mwa pyɛ̂ hɛ, na gwopey na kwɔ̂n tîk gwɛ arɔng.

²⁹Yi na ra ano, pyɛ́ mo yê tɛ́ ɛ jaram, yê sè pyɛ́ de ya dal mwa na nejɛrɛ. Ko kawɛ mwat de ba nɔng ɛ nû râ yɛ wɛt, ka sede a ra yɛ, ko ê dal wɛt.

³⁰“Hwo shushu a Aharon na nèy mɛ něy o, na hwo tik ɛn mɛ jaram, yaga na be ra a me fwôm bepiris.

³¹Ha na BeIsrayɛl, ‘Bē ra a me fwom na něy shushu ne jɛrɛ nemo yaga bezamang min vɔk e nuyel.

³²Be tɛ̀ a mwat hwak zɔng e rebek wɛt, ko de yin yong tyɛng yerê nɛ yaga râ fwom hwak wɛt. Nà sé zɛɛt yaga Dagwi, ko yaga ano, yin tē mɛ naka.

³³Ko mwa mwat de ba nɔng ɛ nû yong o wɛt, ko ka sede a yong yerê něy o, kɛ a mɔmɔ a mwat hwak zɔng ow, a ga row neken mɛ, bê ro ɛ yi e ji bemat mɛ.’ ”

³⁴Dagwi Darwey a to yâng Mose, “Vɛ pyɛ̂ nesang hyɔɔlɔl yemo: yɛ̄ à sitakte, na onika, na galbanum tanga wɔ̀nɔ firankinsɛn, ko tik na nedirîk kayɛ mo ne sè tyɛng.

³⁵Tɛ̀ bē wuna, be yong mɛ pyɛ̂ rangas yê nesang hyɔɔlɔl yerê nemo de mwât tɔ̂k wunsâ pyɛ́ mo e yong. Bē ra fwom na zɔgɔ̂ pyɛ́ ryat zɔng, bē tɛ̀ kevwashe arɔng. Pyɛ̂ nesang hyɔɔlɔl o yê sè jɛrɛ.

³⁶Hwo hwongo cak e ji pyɛ́ mo, yē tɛ́ ɛ nemuk, ko hwo tik e ra gàgbang rangâs pyɛ́ mo e nuyêl Kundung Wuna-na-Sira, kwɔn de mê man ɛ na hwo e bûk sangal hom. “Pyɛ̂ rangas o yê sè a yin pyɛ de ya dal mwa na nejɛrɛ.

³⁷Yaga ano, ya sé zɛɛt yaga me. Yin yong tyɛng yerê yɛ yaga bato min wɛt.

³⁸Ko mwa mwat de a yong yerê yɛ yaga pyɛ̂ nesang hyɔɔlɔl mɛ a ga row neken mɛ, bê ro ɛ yi e ji bemat mɛ.”