Read berom Nusu 31 Bible Online

Nusu 31 - berom bible

Nusu 31

¹Dagwi Darwey a to yâng Mose,

²“Di, ma ga kasa Bɛzalɛl Uri Hur wo yerê Yuda.

³Ma ga sila hɛ na gabik hom, na sekwɛl, na tɔ̂k râ kagwɛ fwôm vwɔ.

⁴A rɔda tɔk yong bazinâ pyɛ́ detidetu, yemo de ê yong na dyam shinang, na dyam pyɛng, na dyam pama.

⁵A rɔda tɔk dak dyéngere ryat yaga tɛ́sɛ e nekwɔn, na tsêp cɔ́gɔt, na kagwɛ fwôm vwɔ arɔng.

⁶Ano arɔng, ma ga tɛ̀ Oholiyap Ahisamak wo yerê Dan, na a ra fwom tanga yɛ. Ma ga to tɛ̀ mwa vemo de ba tɔk tom vɔ, na be sɛlɛ hɛn. Ma ga nɔng ɛn tɔ̂k yông kayɛ pyɛ de ma ga kana nɔng o nu e ra yɛ̄:

⁷yɛ̄ a bûk sangal hom, na Kundung Wuna-na-Sira, na pyɛ bâng gwɛ, tanga mwa pyɛ́ de ya sé e ji buk o,

⁸yɛ̄ a tebut tanga pyɛ̂ wɛ, na pyɛ tikîs bekywa-kya ye celes dyam shinang tanga pyɛ̂ wɛ mwa, na gàgbang rangâs pyɛ̂ nesang hyɔɔlɔl,

⁹na gàgbang rangâs yas tanga pyɛ̂ wɛ mwa, na gwopey na pyɛ tikîs gwɛ.

¹⁰Bê yong berugû Aharon de ba tɔrɔ vɛ arɔng, vemo de ê ra mɛ fwôm piris, tanga berugû fwôm nèy mɛ,

¹¹na něy shushu tanga pyɛ̂ rangâs nesang hyɔɔlɔl yaga Duk Jɛrɛ. Yɛn a yong pyɛ́ yemo tyɛng e gwong de ma ga kana nɔng o nu.”

¹²Ko Dagwi Darwey a to yâng Mose,

¹³a ha a BeIsrayɛl, a ye, “Gyeng in Tuk Shábat, hemo de ma ga tɛ̀, he sè tûk pɔngɔ. Ano yin a rɔda tɔk, yaga bezamang min vɔk e nuyel, e me, Dagwi Darwey, de ma tik in jaram, na yin sè benang.

¹⁴Ano, gyeng in Tuk Shábat! Hê sè tûk jɛrɛ na yin. Yin ê ra fwom nepɔlɔ netyiimin, ko tuk hê taama ha sé tûk pɔngɔ, jaram yaga me. Bē mɔrɔ mwat de e ra fwom tuk o.

¹⁶Gbing-gbing BeIsrayɛl be gyeng Tuk Shábat yaga bezamang mɛn vɔk e nuyel. Hê sè pyɛ durâ wuna-na-sira e tē hom na yɛn gbak-gbak, yaga me, Dagwi Darwey, ma kana yong lagwi na jey e ji nepɔlɔ netyiimin, ko e tuk hê taama ma tumal fwom mwa, ma pɔng.”

¹⁸Jeng de Dagwi Darwey a yɛnɛ ha na Mose e ra Raku Sinai, a nɔng ɛ beta bagasak beba de yɛ̀ pyɛ mɛ a jɛk ɛ Badu e ra vɛ.