Read berom Nusu 32 Bible Online

Nusu 32 - berom bible

Nusu 32

¹E kwɔ̂n ye ngyɔk, BeIsrayɛl ba di de Mose a ros nà gyirik yi e raku mo, ko yɛn a wɔ̀ kyɛrɛ Aharon, ba yang ɛ, “Sa womo Mose de a nusu na wot yi e Misra, wot a tɔk pyɛ de ya ga sɛ̀ ɛ wɛt. Yong a wot dagwi womo de ê kyè e nuyel mot!”

²Aharon a toyo a yɛn, a yang ɛn, “Páa in yɔ̄bɔ dyam shinang yê betong beha min, na yê nèy bewen tanga behwong min de be tɛ̀sɛ, na yin vey mɛ.”

³Ano kwong, bemat o mwa ba paa yɔ̄bɔ dyam shinang yê betong mɛn, ko ba vey a Aharon mɛ.

⁴A sey yɛ̄, ko a ye ywey a yɛ, a yong mɛ bwôt mus. Ko bemat o ba yâng bemɛn, “À BeIsrayɛl, Dagwi min a womo de a ga nusu na yin yi e Misra!”

⁵Sede Aharon a di ano, a hwo lɔk gàgbang rangâs yas e nuyêl bwot mus o, ko a mok, a ye, “Nahwol, wot e ba ra nzem yaga Dagwi Darwey!”

⁶Ano kwong, bemat o ba sogo bop e nusû hwol, ba vey na yas, na be yɛt cāk be rangas burang yaga nɔrɔ vɔk na Dagwi, na cāk yê nenɔrɔ̂ wunâ nesa de be re. Ba sangal, ba re na sɔ, ko ba sogo, ba hwo rɛ̌ kpɛɛ.

⁷Ko Dagwi Darwey a yâng Mose, “Gyirik ziri, yaga bemat mō, vemo de hwà ga nusu na yɛn yi e Misra, ba ga ra gbɔng pyɛ vyes.

⁸Ba ga pere ye rɛng à gwong de ma nɔng ɛn nu: ba ga yóng a bato mɛn bwôt mus na dyam shinang, ba gaba e cât bol wɛ, ba re a wɛ fongol, ko ba ga nára a wɛ nenɔrɔ̂ yas rangas, be tē, dagwi mɛn a wane de a ga nusu na yɛn yi e Misra!”

⁹A re nuyel, a ye, “Ma ga tɔk bemat o, ba sé gbàrak.

¹⁰Tík me zɔng, na shom hom ye ye puu e ra yɛn, na me wey na yɛn! Ko mê tɛ̀ o na yére mō, yin tɛ́ in yerê bemât jey ryey o e to mɛn.”

¹¹Ko Mose a dak a Dagwi Darwey, Dagwi mɛ, yey, a ye, “À Da, yaga sɛ́ de hwà simo, na shom mō ye ye puu e ra bemat mō de hwà ga nusu na yɛn yi e Misra na gbɔng reto mō arɛt?

¹²Hwó simo, BeMisra be ye, a sé yaga nengyas zɔng de hwà nusu na yɛn, na hwo wɔ̀ mɔbɔs hɛn e ra beraku, na hwo wey na mwa hɛn e ji jey a? À Da, tik shom mō pyep o ye ye rɔ̀s. Sege báre mō, hwo tɛ̀ gawey hemo he hwo e ra bemat mō wɛt!

¹³Bare na Abraham, na Yishak na Yakɔp de ba raa hwo. Bare na sira de hwà kana sira a yɛn hwo pyɛ mo. Hwà yang ɛn, hwà rɔda tɛ̀ yére mɛn ye gwɛ̌ hɛ pyak sede netangacɛ̂n lagwi, ko hwà rɔda nɔ̂ng yére mɛn mwa sevwel semo de hwà ga sira a yɛn, yɛn a rɔda re nedanelɔ sɛ̄ nesheneshey.”

¹⁴Ano kwong, Dagwi Darwey a sege bare mɛ, a ra a bemat mɛ mo pyɛ cak vyes yemo de a ga kana ha wɛt.

¹⁵Mose kwong a doyo, a hwo gyirik yi e raku, a vɔk beta bagasak beba ve badu e vɔ mɛ, de ba vɔk ɛ jɛk e mwa bak ba, e nuyel na e bama mo.

¹⁶Beta mo bá sè yông Dagwi, ko jɛk o ha sè mɛ arɔng de a jining e ra vɛ.

¹⁷Sede Yɔshuwa a wok rewɔng de bemat o ba tá, ko a yâng Mose, “Ba sé ra como e kwɔ̂n ye ngyɔk o.”

¹⁸Ko Mose a toyo a yɛ, a ye, “Wey, a sé rewɔ̂ng rê como kɛ rewɔ̂ng bemat de ba ga re ɛn e como wɛt. E lwɛ́lɛ zɔng de me wokos.”

¹⁹Sede Mose a vey bagat na kwɔ̂n ye ngyɔk, ko a di bwôt mus o na rɛ́ɛ de ba sé rɛ̌, shom ya sogo a yɛ, a barak beta bagasak de ba sé e vɔ mɛ, ko bà mɔbɔs hɛn cɛ́k o cɛ́k o e tîs raku mo.

²⁰A jut bwôt mus de ba yong o, a ye ywey a wɛ na kya, a hwongo wɛ buruk, ko a waram nemuk o e ra nshi, ko a tɛ̀ BeIsrayɛl be sɔ nɛ.

²¹Ko a yâng Aharon, “E sɛ́ de bemat o ba ra a hwo ano, de hwà ga tɛ̀ ɛn, be ra gbɔng renɛn remo ɛ?”

²²Ko Aharon a hanat, a ye, “À darwey hom, hwo tɛ̀ shom wɛt! Hwà dun ɛn wɛt, na negwɔn simô râ neves.

²³Ba yang me, ‘Sa womo Mose de a nusu na wot yi e Misra, wot a tɔk pyɛ de ya ga sɛ̀ ɛ wɛt. Yong a wot dagwi womo de ê kyè e nuyel mot!’

²⁴Ano kwong, ma yang ɛn, mwat de a vɔk pyɛ tɔrɔ ye dyam shinang, tik na a pat. Ko yɛn a paa pyɛ̂ dyam shinang o, ba nɔng me. Ma tɛ̀ yɛ̄ e kya, ko bwôt mus womo wa pere nusu!”

²⁵Mose a di nehywɛ bemat o na to sé e bak gwining wɛt, yaga Aharon a ga tɛ̀, be tɔk to wok ha wɛt. Yi ano, ba ga tɛ́ ɛn pyɛ seshɛgɛsh e nuyêl bemât repugu mɛn.

²⁶Ko a tumal e dem yêl kwɔ̂n ye ngyɔk, a mok, a ye, “Mwa mwat de a sé e bak Dagwi Darwey, a vey na me!” Ko yerê Levi mwa ya tula hɛ na yɛ.

²⁷A yang ɛn, “Dagwi Darwey, Dagwî BeIsrayɛl, a nɔng nu, kawɛ min a gana wal mɛ, yin raa na gwɔsɔ yi e rwa kwɔ̂n ye ngyɔk hek vɔk e hek, ko kawɛ a mɔrɔ gwà mɛ na sa mɛ, na mwât vwara mɛ.”

²⁸BeLevi ba ra, sede remo de Mose a nɔng ɛn nu, ko tuk o, ba wey na bemat sede gu batat (3,000).

²⁹Ko Mose a ye, “Yaga yin a ga tik nà wey na nèy min, na begwa min wɛt, yin a ga tɛ́ in jaram yunung yaga fwôm bepiris Darwey, ko yɛ a ga tɛ̀ a yin nerat.”

³⁰Nusu hwol, Mose a yâng bemat o, “Yin a ga ra gbɔng renɛn. A remo, ma rɔda tut e raku wɔ na Dagwi Darwey, kɛ gyeng mê sɛ̀ gwong na a hàla a yin renɛn min o.”

³¹Ano kwong, a tut wɔ na Dagwi Darwey, a ye, “Káa, à Da! Bemat vemo ba ga ra gbɔng renɛn! Ba ga yóng a tó mɛn dagwî dyam shinang.

³²Ko di a remo, ka sede hwà simo, hàla a yɛn renɛn mɛn. Ka ano wɛt, ko hwo fugut reza hom e bwok-basa mo de hwà ga kana jɛk ɛ bazâ bemat mō.”

³³Ko Dagwi Darwey a toyo a Mose, a ye, “Womo de a ra a me renɛn, e yɛ wɛ de ma rɔda fugut reza mɛ e bwok-basa hom.

³⁴A remo, kyè na bemat o vɔk e kwɔn de ma ga ha a hwo. Tom-lagwi hom a rɔda kyè e nuyel mō. Ko di, jeng ya sé kyè vey de mê tabak hɛn yaga banɛn mɛn.”

³⁵Ano kwong, Dagwi Darwey a tomo na tumbang e ra bemat o, yaga yɛn a ga tɛ̀ Aharon, a yong bwôt mus wò dyam shinang.