Read berom Nusu 33 Bible Online

Nusu 33 - berom bible

Nusu 33

¹A vane ano, Dagwi Darwey a yâng Mose, “Sogo yi e ngamo, hwo na bemat vemo de hwà vey na yɛn yi e Misra, na yin kyè wɔ e sevwel semo de ma ga kana sira, mê nɔ̂ng Abraham, na Yishak, na Yakɔp, tanga yére mɛn sɛ,

²vwel hemo de ha siri naka, de ha vɔk pyɛ́ shɛrɛk. Ma rɔda tomo tom-lagwi e nuyel min, ko ma rɔda ro BeKanaan, na BeAmɔr, na BeHiti, na BePɛrizi, na BeHivi tanga BeYebus. Ko me, mê kyè na yin wɛt, yaga yin a sé bemât negbarak, gyeng mê sang wey na yin e gwong.”

⁴Sede bemat o ba wok neha lashê yey nemo, ba hwo sangal yɔɔm, ko vit a mwat de a tɔrɔ hɛ na yɔ̀m ryat.

⁵Yaga Dagwi Darwey a ga kana ha na Mose, a yang ɛ, “Ha a BeIsrayɛl, yɛn a sé bemât negbarak. Ka ma ka kyè na yɛn, ko ma rɔda wey na yɛn e hining zɔng. Yaga ano, be paa nedirî yɔ̀m mɛn, na me di pyɛ de mê ra na yɛn.”

⁶Ano de BeIsrayɛl ba paa nedirî yɔ̀m mɛn, ko yi e Raku Hɔrɛp vɔk e nuyel, ba to tɛ̀sɛ nɛ wɛt.

⁷Yi e jeng yane, kayɛ jeng de BeIsrayɛl ba sé tɛ̀ kwɔ̂n ye ngyɔk, Mose a ga tɔ́k ɛ e hashê buk o, a tɛ̀sɛ gwɛ e jey yikyik tyɔng na kwɔ̂n ye ngyɔk, ko a vo a gwɛ rezâ bûk man na Dagwi. Ko kawɛ de e simo redu Dagwi Darwey e ra pyɛ cak, a rɔda wɔ e buk de gwa sé zɛɛt na kwɔ̂n ye ngyɔk.

⁸Kayɛ jeng de Mose e kyè wɔ e buk o, ko bemat o mwa bé sogo, be tumal e ri buk mɛn, na be bɛrɛng hɛ, sɛ̌ a yel e ji bûk man na Dagwi e ngyen.

⁹Sede Mose a ga yel e buk o, rele re gyirik, re ba tumal e rwi gwɛ, ko Dagwi Darwey e ha na yɛ.

¹⁰Jeng de bemat be di rele ra tumal e rwi buk o, be sogo mwa, be ye guduruk, be re fongol, kawɛ e rwi buk mɛ.

¹¹Dagwi Darwey kwong e ha na Mose bayis na bayis, sede remo de mwat e ra berem na sa mɛ. E bama mo, Mose e to toyo wɔ e kwɔ̂n ye ngyɔk. Ko Yɔshuwa Nun, bwôt mwât sɛlɛ mɛ, e gas ɛ na buk o wɛt.

¹²Mose a yâng Dagwi Darwey, “Di, hwà ga yang me, me kyè na bemat vemo vɔk e sevwel mɛn o, ko hwà ga ha a me, kɛ e wa de hwà rɔda tomo, na a sè tanga me wɛt. Ko di, hwà ga ye, hwà tɔk me tsɛng-tsɛng, ko ma sé rwat e bayis mo.

¹³Ka sede a sé ano, tik na hwo dura a me pyɛ́ de hwó simo na me tɔk o, na me re nuyel na sé rwat e bayis mo. Hwo bare arɔng, hwà ga kasa bemat vemo, na be sè bemo.”

¹⁴Dagwi Darwey a toyo a yɛ, a ye, “Ma rɔda kyè tanga hwo, ko ma rɔda tɛ́t a hwo nedirik mō.”

¹⁵Ko Mose a toyo a yɛ, a ye, “Mwin, ka sede hwô kyè tanga wot wɛt, ko hwo sogo hot yi e ngamo wɛt.

¹⁶Sɛ̌ hwà kyè tanga wot. Yi e rɛ̌ de ba rɔda tɔk, wot a sé berat e bayis mo, me na bemat mō ɛ? Ko ka hwà kyè tanga wot, me na bemat mō, ba rɔda di ot detu na bwang bemat e ji jey.”

¹⁷Ko Dagwi Darwey a yâng Mose, “Ma rɔda ra tyɛng pyɛ de hwà ga ha, yaga ma tɔk o tsɛng-tsɛng, ko hwà sé rwat e bayis hom.”

¹⁸Mose a ye, “Ka hwà simo, dura a me gbɔng nedyɛt nerat mō.”

¹⁹Ko Dagwi Darwey a toyo a yɛ, a ye, “Ma rɔda kwey e nuyel mō na gbɔng nedyɛt nerat hom, ko ma rɔda mok reza hom e nuyel mō, rɛ à Dagwi Darwey. Me dura nerat na vemo de me simo, me tosho reyɔ̂m vemo de ma kasa.”

²⁰A re nuyel a ye, “Hwô tɔk di bayis hom wɛt, yaga vit a mwat de ê di me, na a dal!

²¹Ko di, kwɔn hak ha sé e hagat hom, de hwô tɔk tumal ɛ e ra gwofwa.

²²Ko jeng de mê kwey e ji gbɔng nedyɛt nerat hom, mê tɛ̀ o e ji virîng gwofwa mo, ko mê kyiri hwo na vwɔ hom, sɛ̌ jeng de ma ga kwey.

²³E bama mo, ma rɔda jut vwɔ hom, ko hwà rɔda di bama hom. Ko bayis hom bê tɔk di vɛ wɛt.”