Read berom Nusu 34 Bible Online

Nusu 34 - berom bible

Nusu 34

¹Dagwi Darwey a to yâng Mose, “Yong beta bagasak behak beba tyɛng sede ve mɛsɛng o, ko ma rɔda jɛk e ra vɛ neha de na kana sè e ra ve mɛsɛng vane de hwà kana mɔbɔs.

²Yong o nagasi, na hwo vey tut e ra Raku Sinai, hwo ba gyeng me e hwomo e ra tɛ̂t raku mo.

³Mwat hwak a sè tanga hwo wɛt, kɛ be sang di mwat hwak e ra raku mo, kɛ be gyeng ɛ̀ karâ vyēl na berɔndɔng e hagât nuyêl raku mo arɔng wɛt.”

⁴Ano kwong, Mose a yong beta bagasak beba sede ve mɛsɛng o, ko a sogo bop nagasi, a wɔ̀ tut e ra Raku Sinai, tyɛng sede remo de Dagwi Darwey a ga kana nɔng ɛ nu, a vɔk ɛ beta bagasak o e vɔ mɛ.

⁵Ko Dagwi Darwey a gyirik e ji rele, a tumal e hwomo na Mose, a mok reza mɛ, Dagwi Darwey.

⁶Ko a kwey e nuyêl Mose, a mok, a tē, “Ma sé Dagwi Darwey! Dagwi Darwey à reza hom! Ma sé Dagwi wo toshô reyɔm, wo nerat. Me ra shom ziri wɛt, me dura a bemat nerat hom ding-ding, ma sé wo tsak o arɔng.

⁷Me dura nerat hom e ra bezamang gu kpɛɛ, me halsa banɛn na buru. Ko me tik nà tabak wo râ banɛn wɛt. Me tala banɛ̂n beda e ra nèy mɛn wɔ̀ sɛ̀ zamang hê netat na hê nenaas.”

⁸Mose a pere ye guduruk e vwel, a re fongol.

⁹Ko a ye, “À Darwey, ka sede ma sé rwat e bayis mo, tik na hwo kyè e tē mot. Bemat vemo ba sé gbàrak, ko hwo hàla a wot banɛn na buru mot, hwo tɛ̀ ot bemo.”

¹⁰Ko Dagwi Darwey a ye, “Ma sé wuna me na sira na yin. Ma rɔda ra pyɛ̂ bes e nuyel min, yerê yinde ba ga sang ra e yere cak e jey mwa wɛt. Mwa bemat de hwà sé sangal e tē mɛn ba rɔda di yerê fwom de me, Dagwi Darwey, me tɔk ra, yaga ma rɔda ra pyɛ̂ bengyip sizɔng yaga yin.

¹¹Gyéng in badu de ma nɔng in yunung. Mwin, ma rɔda ro yi e nuyel min BeAmɔr, na BeKanaan, na BeHiti, na BePɛrizi, na BeHivi tanga BeYebus.

¹²Jeng de yin ê yel e sevwel mɛn, tē in naka, yin wuna hin na sira na yɛn wɛt. Ka ano wɛt, yɛn a rɔda sè a yin rwik e fwɔ.

¹³Gangas hin nekwɔn sekwit mɛn, mɔbɔs hin beta sekwit de ba tɛ̀ vɛ cik, ko tow in sesêk Ashera, ci hwā mo.

¹⁴“Yin re a dagwi hwak fongol wɛt, yaga me, Dagwi Darwey, me simo na yin tɛ̀ yey min na me zɔng.

¹⁵Yin wuna hin na sira na bemât sevwel o wɛt, yaga jeng de yɛn e re a bedagwi mɛn fongol, na be nára a vɛ nenɔrɔ̂ rangas, ko ba rɔda rini hin, na yin re pyɛ̂ nenɔrɔ mɛn o.

¹⁶Yin ra a besɔ min wenêng behwong mɛn wɛt, yaga behwong mɛn o ba rɔda tɛ̀ besɔ min o, be raa bedagwi mɛn.

¹⁷“Yin yong pyɛ̂ sekwit na dyam cak wɛt.

¹⁸“Gyeng in Nzem Kpam-tuk Sana Géy-sing. Ra in nɛ e pwɛ̂l Avif, yaga e ji gwɛ de yin á kana nusu yi e Misra. Re in kpam-tuk sana géy-sing nepɔlɔ netaama, sede remo de ma ga nɔng in nu.

¹⁹“Kahɛ hwey negel wen ha sé nang, mwa na nèy yas min de na sé mus kɛ gam kɛ turuk ayi.

²⁰Ko tɔ̂ mɛsɛ̂ng hwêy madung rwas o, viri hin hɛ na kevyel de yin ê nára kɛ nɔrɔ e tô hɛ. Ka sede yin ê viri hɛ wɛt, ko kwɔrɔ hin fwɔ̂ hɛ. Viri hin kahɛ hwêy negel wen e ji nèy min na dyām. “Hwak à mwat a vey e kwɔ̂n re a me fongol na vɔ sǎn wɛt.

²¹“Ra in fwom nepɔlɔ netyiimin, ko tuk hê taama, pɔnglɔ hin, kɛ a ka sé jeng swigi kɛ hywɛp ayi.

²²“Ra in Nzem Bwal ne alkama wo mɛsɛng, tanga Nzem Vos Nèy Cɔ́gɔt e bama de ba ga tala bâng nɛ e yɛnɛ̂ shey o.[17]

²³Zang tat e shey, gbing-gbing mwa berâs BeIsrayɛl bē wɔ́ e kwɔ̂n re a me, Darwey Dagwi Darwey, Dagwi wo BeIsrayɛl fongol.

²⁴Sede remo de ma rɔda ro yére bemât mwa yi e nuyel min, ko mê gwɛ̌ a yin ɛ yɛnɛ̂ vwel o. Vit a bemât repugu de bê yel e vwel o, na be re hɛ, e jeng nzem netat o de yin ê wɔ e kwɔ̂n re a me fongol.

²⁵“Yin wuna nɔrɔ̂ yas de yin e yɛt vey na me na pyɛ́ de ya vɔk ɛ géy-sing wɛt. Yin tɛt ɛ namâ nɔrɔ̂ yas Nzem Gyilsit Nelɔ vɔk e gasi wɛt.

²⁶“Wɔ́ in na pyɛ̂ cap min yê mɛsɛng o de ya dal mwa na nerat e lɔ Dagwi Darwey, Dagwi min. “Yin kyé namâ kekwey vyel e ji nevasâl neng o wɛt.”

²⁷Ko Dagwi Darwey a yâng Mose, “Jɛk badu vemo mo. A sé yi na gyéng vɛ de mê wuna me na sira na hwo tanga BeIsrayɛl.”

²⁸Mose á sè e hwomo na Dagwi Darwey nepɔlɔ kuru banaas, nagwi na naturuk, vit a rê pyɛ́ kɛ sɔ̂ nshi. Ko a jɛk e ra beta bagasak o badu wuna-na-sira mo, vɛ a Badu Kuru.

²⁹Jeng de Mose a gyirik yi e tɛ̂t Raku Sinai na beta bagasak beba ve wuna-na-sira e vɔ mɛ, ko a ka tɔk, bwang bayis mɛ gwa nɛp wɛt, yaga a kana sè ha na Dagwi Darwey.

³⁰Sede Aharon na mwa BeIsrayɛl ba di bwang bayîs Mose de gwa nɛp, ko ba tɛ̀ bengyip nà wɔ bagat na yɛ.

³¹Ko Mose a yila hɛn, ko Aharon na bemât nuyêl bemat o mwa ba wɔ na yɛ, yɛ kwong a ha na yɛn.

³²E bama mo, mwa BeIsrayɛl ba sek bagat, ko Mose a basa a yɛn pyɛ̂ mwa de Dagwi Darwey a ga nɔng ɛ nu e ra yɛ̄ e ra Raku Sinai.

³³Sede Mose a yɛnɛ ha na yɛn, a tɛ̀ kerugu, a kyiri mɛ bayis mɛ.

³⁴Ko kayɛ jeng de Mose e yel e buk, na a ha na Dagwi Darwey, e pat kerugû kyirî bayis o, sɛ̌ a nusu e ngyen. Ko jeng de e nusu, na a ha a BeIsrayɛl pyɛ́ de ba ga nɔng ɛ nu e ra yɛ,

³⁵BeIsrayɛl be di, bwang bayîs Mose de gwo nɛp, ko Mose e to kyiri bayis mɛ na kerugu mo, sɛ̌ jeng de e to yel, na a wɔ̀ ha na Dagwi.