Read berom Nusu 35 Bible Online

Nusu 35 - berom bible

Nusu 35

¹Mose a tula regyɛng BeIsrayɛl mwa, ko a yang ɛn, “Pyɛ́ ma yemo de Dagwi Darwey a ga nɔng in nu, yin ra:

²Ra in fwom nepɔlɔ netyiimin, ko tuk hê taama ha sé tûk pɔngɔ, tûk jɛrɛ, jaram yaga Dagwi Darwey. Kawɛ de ê ra fwom e hɛ, bē mɔrɔ hɛ.

³Yin ka pɛl kya e nelɔ min Tuk Shábat wɛt.”

⁴Mose a to yâng regyɛng BeIsrayɛl mwa, “Pyɛ́ ma yemo de Dagwi Darwey a ga nɔng nu e ra yɛ:

⁵Yin vey a Dagwi Darwey na nenɔrɔ. Kawɛ de yey mɛ ya ra ɛ, ko tik na yɛ a vey na dyam shinang, na dyam pyɛng tanga dyam pama,

⁶na shwey de ha sé wilwil, na hemo de ha sé sinang tanga hemo de ha sé zwey, na shwêy linen puruk de ha pɛngɛ, na setôt vyēl shi,

⁷na bahwô begam de ba ga tɛ̀ vɛ basinang, na vê pyɛ-ji-nshi, na cɔ́gɔt tîn rɔgɔ,

⁸na něy yaga bekywa-kya, na pyɛ̂ nesang nerat de be yong mɛ něy shushu, na pyɛ̂ rangas yê nesang hyɔɔlɔl,

⁹na dyéngere ryat yê onis tanga dyéngere ryat o cak yaga rugû fwôm darwêy bepiris, tanga radîng gèy mɛ.

¹⁰“Ko tik na kavɛ e ji min de ba vɔk tɔ̂k râ fwôm vwɔ be vey, na be yong mwa pyɛ́ de Dagwi Darwey a ga nɔng nu:

¹¹gworugû bâng kwɔ̂n sangâl Dagwi, na pyɛ̂ kyiri hɛ, na begúk tanga cɔ́gɔt de bê tɛ̀sɛ yɛ sede ri duk, na cɔ́gɔt yê gabeneng tanga sesêk hɛ, na pyɛ̂ gyisâ wɛ,

¹²na kundung tanga begelê gwɛ, na pyɛ bâng gwɛ tanga gworugû bâng rwi Duk Jɛrɛ Wo Jɛrɛ,

¹³na tebut kpam-tuk de be nása yaga Dagwi, mwa na begelê wɛ, tanga mwa pyɛ̂ wɛ, na kpam-tuk arɔng,

¹⁴na pyɛ tikîs bekywa-kya, na mwa pyɛ̂ yɛ tanga bekywa-kya mo, na něy o,

¹⁵na gàgbang rangâs pyɛ̂ nesang hyɔɔlɔl, tanga begelê hɛ, na něy shushu, na pyɛ̂ rangâs yê nesang hyɔɔlɔl, na gworugû bâng rwi buk o,

¹⁶na gàgbang rangâs yas, na pyɛ zělzel ye dyam pama, na begele beting hɛ, tanga mwa pyɛ̂ hɛ, na gwopey nshi tanga pyɛ tikîs gwɛ,

¹⁷na berugû rɔnɔ̂ lala mwa na sesêk vɛ, na pyɛ̂ gyisa mo, na gworugû bâng rwi lala,

¹⁸na bekwagam buk o tanga vê pyɛ rɔnɔ̂ lala, na rik vɛ,

¹⁹na berugu de ba tɔrɔ vɛ yaga fwôm bepiris e kwɔ̂n sangâl Dagwi, vɛ a berugû jɛrɛ yaga Aharon na nèy mɛ.”

²⁰E bamâ tula mo, Mose a tɛ̀ mwa regyɛng BeIsrayɛl e gwong.

²¹Ko kawɛ de yey mɛ ya luga hɛ, ba vɛsɛ a Dagwi Darwey na nenɔrɔ̂ yông bûk sangâl Dagwi tanga pyɛ̂ fwôm gwɛ, mwa na berugû bepiris.

²²Beras na beha, mwa vemo de neyey mɛn na luga hɛn, ba vey na nerwěy, na yɔ̄bɔ betong, na yɔ̄bɔ, na bèlɛlɛ fwɔ, na mwa yére pyɛ̂ dyam shinang detidetu, ba nɔ̂ng Dagwi Darwey yɛ.

²³Kawɛ mwat de a vɔk shwey de ha sé wilwil, na hemo de ha sé sinang, tanga hemo de ha sé zwey, na shwêy linen puruk de ha pɛngɛ, na setôt vyēl shi, na bahwô begam de ba ga tɛ̀ vɛ besinang, tanga bahwô pyɛ-ji-nshi, ba vey mɛ.

²⁴Kawɛ mwat de ê tɔk nɔng dyam pyɛng kɛ dyam pama, ba vey mɛ na Dagwi Darwey. Ko kawɛ mwat de a vɔk cɔ́gɔt tîn rɔgɔ, de be tɔk ra mɛ kagwɛ fwom, ba vey mɛ.

²⁵Mwa beha de ba tɔk tâ shwey, ba vey na shwey de ha sé wilwil, na sinang tanga hemo de ha sé zwey, tanga shwêy linen puruk de ha pɛngɛ arɔng.

²⁶Ko beha de ba tɔk tâ shwey na setôt vyēl, ba ra ano arɔng.

²⁷Bemât nuyel ba vey na dyéngere ryat yê onis, na dyéngere ryat o cak yaga rugû fwôm Aharon tanga radîng gèy mɛ,

²⁸na něy pwat yaga kywa-kya na něy shushu, tanga pyɛ̂ rangas yê nesang hyɔɔlɔl tanga pyɛ̂ nesang nerat.

²⁹Ano de BeIsrayɛl mwa, beras na beha, vemo de yey mɛn ya luga hɛn, ba vey na nɔrɔ̂ yey pyɛng vɔk na Dagwi Darwey, yaga fwom de a kana nɔ̂ng Mose nu.

³⁰Ko Mose a yâng BeIsrayɛl, “Di in, Dagwi Darwey a ga kasa Bɛzalɛl Uri Hur wo yerê Yuda.

³¹A ga sila hɛ na gabik mɛ, na sekwɛl, na tɔ̂k râ kagwɛ fwôm vwɔ.

³²A rɔda tɔk yong bazinâ pyɛ́ detidetu de ê yong na dyam shinang, na dyam pyɛng, tanga dyam pama;

³³ê tɔk dak dyéngere ryat yaga tɛ́sɛ e nekwɔn, na tsêp cɔ́gɔt, na kagwɛ fwôm vwɔ arɔng.

³⁴Dagwi Darwey a ga nɔng ɛ, tanga Oholiyap Ahisamak wo yerê Dan, tɔ́k, na be basa a behak râ yerê tom o.

³⁵A to nɔng ɛn tɔ̂k râ kagwɛ fwom, fwôm tɛ́sɛ jɔ̂t batô gwɔ̀m, na tɔ̂k yông bazina, na lɔk, na tɔrɔ na shwey de ha sé wilwil, na sinang tanga hemo de ha sé zwey, na shwêy linen puruk arɔng. Yɛn bê tɔk ra mwa yerê tom o, ve vwɔ tanga ve yông bazina.