Read berom Nusu 36 Bible Online

Nusu 36 - berom bible

Nusu 36

¹“A remo, tik na Bɛzalɛl tanga Oholiyap, na bwang behak e ji vê tɔ̂k tom vwɔ de Dagwi Darwey a ga nɔng ɛn sekwɛl na tɔ́k, bē ra pyɛ́ mwa yê kwɔ̂n sangâl Dagwi, sede remo de a ga nɔng nu.”

²Mose a yila Bɛzalɛl tanga Oholiyap, na bwang behak e ji vê tɔ̂k tom vwɔ de Dagwi Darwey a kana nɔng ɛn sekwɛl o, kawɛ mo de yey mɛ ya luga hɛ, a vêy râ fwom o.

³A hwo nɔng ɛn mwa nenɔrɔ de BeIsrayɛl ba ga kana tula na yɛ yaga fwôm kwɔ̂n re a Dagwi fongol. Ko mwa ano BeIsrayɛl ba re nuyel na vɛsɛ na nenɔrɔ kahɛ tuk.

⁴Ano, Bɛzalɛl na Oholiyap tanga mwa bemât fwom o ba wɔ́ na Mose,

⁵ba yang ɛ, “Bemat ba sé vɛ̀sɛ na nenɔrɔ de na ga dal pyɛ de be simo yaga fwom de Dagwi Darwey a kana nɔng nu be ra.”

⁶Mose kwong a tɛ̀, be ha a bemât mwa e kwɔ̂n ye ngyɔk, mwat hwak a to wɔ́ na nɔrɔ wɛt. Ano de ba tik nɔngɔ̂s nenɔrɔ mo;

⁷pyɛ́ de ba ga nɔng, ya ga vey, ya ga pere wɔ̀ dal gâp fwom o.

⁸Bemât de ba dal na sekwɛl ba yong gworugû bâng bûk sangâl Dagwi. Ba yong gwɛ neshǐ neshǐ mo kuru. Ba lɔk nɛ na shwêy linen puruk de ha sé wilwil, na sinang tanga hemo de ha sé zwey. E ji nɛ, ba lɔk ɛ bazinâ bekɛrup.

⁹Nelîs kahɛ shǐ na sè mita kuru na vɛ beba na rebit o, ko negbey o mita beba; mwa nɛ na sè tyɛng.

¹⁰Ba wuna neshǐ mo netungun na tolo, na be sɛ̀ mɛ negbêy gwining. Ano de ba ra na bwang netungun o.

¹¹Ba tɛ̀ a kagwɛ mo e hagât nelis o pyól kuru batungun na wuulu de wa sé wilwil, na be wuna bebak rugu beba vane mo. Ba yong pyól o, na ye bɛrɛng bemɛn yê hagat o here.

¹³E bama mo, ba yong yɔ̄bɔ na dyam shinang kuru batungun, ba manas mɛ pyôl berugu mo, na buk o gwo sè pyɛ jining.

¹⁴Ba to lɔk neshǐ berugu mo nehak kuru na hɛ hining na setôt vyēl shi yaga bâng buk o.

¹⁵Nelîs kahɛ mo na sè mita kuru na vɛ betat na rebit o, ko negbey o mita beba, mwa nɛ ne sè tyɛng.

¹⁶Ba wuna netungun na tolo, ko bwâng netyiimin o ba wuna na tolo arɔng.

¹⁷Ba tɛ̀ pyól kuru batungun e hagât bak o gwining, ba ra ano na hagat o here arɔng, na ye bɛrɛng bemɛn.

¹⁸E bama mo, ba yong yɔ̄bɔ dyam pama kuru batungun, na be gyira yɛ e ji pyól o, yaga na berugu beba mo be bin sè gwining.

¹⁹Ba yong pyɛ kyiri ye setôt vyēl yaga buk o, na pyɛ kyiri mo cak ye rak o na bahwô pyɛ̂ nshi.

²⁰Ba yɛt cɔ́gɔt tîn rɔgɔ, ba yong mɛ sesêk ri duk de ba tɛ̀ vɛ cik.

²¹Nelîs kagwɛ mo mita benaas na rebit o, ko netes o besɛntimita kuru bataama.

²²Kagwɛ mo gwa vɔk nenu de na sé myol neba de na sé tyɛng, na ne kaba ri duk o.

²³Ba yong cɔ́gɔt buk o kuru baba yaga rwa batin,

²⁴na pyɛ̂ gyisa kuru banaas yê dyam pyɛng, bya yaga kayɛ cɔgɔt, jining e kahɛ nû myol o,

²⁵Ba yong yɛ tyɛng ano yaga rwa batô buk o arɔng.

²⁷Ko yaga mâ buk o hê rwa ta, ba yong cɔ́gɔt tyiimin;

²⁸Ba to yong cɔ́gɔt bya zɛɛt yaga bato-kwɔng vê bamâ buk o.[18]

³⁰Ano, ba vɔk cɔ́gɔt rwit na pyɛ̂ gyisâ yɛ yê dyam pyɛng kuru na yɛ tyiimin, bya yaga kayɛ cɔgɔt o.

³¹Ba yong cɔ́gɔt yê gabeneng kuru na yɛ tyungun yê tîn rɔgɔ de yê kaba cɔ́gɔt yê gacik. Ba tɛ̀ tyungun e hagat hining hê bûk o,

³²tyungun e hagat here, na tyungun e hagât bamâ buk o hê rwa ta arɔng.

³³E ji cɔ́gɔt yê gabeneng o, tyat ya sé yaga tɛ́ e tê bahagât buk o batat, ba yɛrɛ yɛ wɛt, ko ba tɛ̀ yɛ burang.

³⁴Ba dak cɔ́gɔt yê gacik tanga yê gabeneng na dyam shinang, ko ba yong nerwěy ne dyam shinang na ne sè pyɛ̂ kabsa mo.

³⁵Ba lɔk gworugû bâng rwi buk o na shwêy linen puruk. E ji gwɛ ba lɔk ɛ bazinâ bekɛrup na shwey de ha sé wilwil, na sinang tanga hemo de ha sé zwey.

³⁶Ba yong sesêk cɔ́gɔt tîn rɔgɔ naas de ba dak vɛ na dyam shinang, ba to vɔk ɛ begúk vê dyam shinang, ko ba gyisa yɛ cik e pyɛ̂ gyisa yê dyam pyɛng.

³⁷Yaga kwɔ̂n yel e buk o, ba to lɔk gworugu na shwêy linen puruk tanga shwey de ha sé wilwil, na sinang tanga hemo de ha sé zwey. Ba tɔrɔ gwɛ na nzem.

³⁸Ba yong sesêk cɔ́gɔt tungun de ba vɔk ɛ begúk yaga ganâ gworugu mo. Ba dak batô vɛ tanga bewɔ́rɔ vɛ na dyam shinang, ko pyɛ̂ gyisa mo ba yong na dyam pama.