Read berom Nusu 37 Bible Online

Nusu 37 - berom bible

Nusu 37

¹Bɛzalɛl a yong Kundung Wuna-na-Sira na cɔ́gɔt tîn rɔgɔ, nelis gwɛ mita gwining na besɛntimita kuru, netes o na negarang o besɛntimita kuru bataama.

²Ba dak gwɛ na celes dyam shinang, ji mo na bama mo, ko ba gwɔrɔ gwɛ na tɔrɔ e bakwɔng o na dyam shinang.

³A yong a gwɛ nerwěy nenaas ne dyam shinang, a tɛ̀ nɛ e tîn kundung o e bahagat, neba yaga kahɛ hagat o.

⁴A yong begele na cɔ́gɔt tîn rɔgɔ, ko ba dak vɛ na dyam shinang.

⁵Ba gyira vɛ e ji nerwěy o, e kahɛ hagât kundung o yaga jurûs gwɛ.

⁶A yong pyɛ bâng kundung o na celes dyam shinang, nelis o mita gwining, na besɛntimita kuru, ko netes o besɛntimita kuru bataama.

⁷Ba yong bekɛrup beba vê dyam shinang, de ba táng yɛ. Ba yong vɛ na bafabak. Ba tɛ̀ kɛrup o gwining e hagât pyɛ bang o hemo, ko gwining e hagat o here. Ba yong vɛ na pyɛ jining ye bâng bahagat baba mo.

⁹Bafabâk bekɛrup o ba sè vɔk e rak o, ko ba tɛ̀ a pyɛ bang o necam. Bekɛrup o be bɛrɛng bemɛn, ko mwa vɛ be bɛrɛng pyɛ bang o.

¹⁰Bɛzalɛl a yong tebut na cɔ́gɔt tîn rɔgɔ, nelis wɛ besɛntimita kuru shabatat, netes o besɛntimita kuru batungun, na negarang o besɛntimita kuru bataama.

¹¹A dak wɛ na celes dyam shinang, ko a tɔrɔ wɛ, a gwɔrɔ bakwɔng o na dyam shinang.

¹²A gwɛ̌ negarang bakwɔng o na netes de na sé sede tas vwɔ, a to tɔrɔ wɛ, a gwɔrɔ mɛ mwa bakwɔng o na dyam shinang.

¹³A yong nerwěy nenaas ne dyam shinang, ko a tɛ̀ a bol naas o hihining.

¹⁴A tɛ̀ nɛ bagat na kwɔn de a gwɛ̌ negarang bakwɔng o. Fwôm nerwěy o gwɛ a vɔ̂k begele gak jeng jurûs tebut o.

¹⁵A yong begele mo na cɔ́gɔt tîn rɔgɔ, a dak vɛ na dyam shinang.

¹⁶A yong nepěy, na begance, na netsung tanga neshǐ yaga nása pyɛ̂ sɔ vɔk na Dagwi. A yong yɛ̄ mwa na celes dyam shinang.

¹⁷Bɛzalɛl a to yong pyɛ tikîs bekywa-kya na celes dyam shinang de ba táng yɛ naka, mwa na tin o na kwɔ̂n kaba mo de ha vɔk nelang, tanga nekwɔn tɛ́sɛ kya mo, a yong yɛ mwa na pyɛ jining.

¹⁸Pyɛ tikîs bekywa-kya mo ya vɔk nelang netyiimin e bahagat yɛ, nelang netat e kahɛ hagat.

¹⁹Kahɛ lang ha vɔk ɛ neshǐ nesɛl o netat de ba yong nɛ sede cuyû almɔn de ya sé wunta hɛ mwa na bakparâk yɛ na berang yɛ. Cúyu mo tyat ya sé e ra lang de he raa, ko ya raa ano e ra kahɛ e ji nelang netyiimin o, ko mwa yɛ ya yi e pyɛ tikîs bekywa-kya mo.

²⁰Ko kwɔ̂n kaba bekywa-kya mo ha vɔk ɛ neshǐ nesɛl o nenaas de a yong nɛ sede cuyû almɔn de ya sé wunta hɛ, mwa na bakparak yɛ na berang yɛ.

²¹Rekparâk cuyû almɔn o rining ra sè e tê kanɛ nelang neba.

²²Mwa pyɛ́ tikîs bekywa-kya mo ba táng yɛ na celes dyam shinang, na ye sè tyɛng na bwang pyɛ́ mo.

²³A yong bekywa-kya betaama, na bekabra, tanga bèkywa-kya mo na celes dyam shinang.

²⁴A yong pyɛ tikîs bekywa-kya mo na mwa pyɛ̂ wɛ na celes dyam shinang de nedirik o na sé sede kilo kuru batat na vɛ betungun.

²⁵Bɛzalɛl a yong gàgbang rangâs pyɛ̂ nesang hyɔɔlɔl na cɔ́gɔt tîn rɔgɔ, nelis o rebit mita, ko negbey o ano arɔng, negarang o mita gwining, ko ba yong badúk hɛ na pyɛ jining na gàgbang rangas o.

²⁶A dak hɛ na celes dyam shinang e ra rak o, na mwa bebak o na badúk o, ko a gwɔrɔ hɛ na tɔrɔ na dyam shinang.

²⁷A yong nerwěy neba ne dyam shinang, a tɛ̀ nɛ wɔ̀ gyirik na kwɔn de ba gwɔrɔ na tɔrɔ e bebak de be bɛrɛng bemɛn, ko ba sè yaga gyisâ begelê jurûs kwɔn o.

²⁸A yong vɛ na cɔ́gɔt tîn rɔgɔ, ko a dak vɛ na dyam shinang.

²⁹A tɛ̀ bemât tɔ̂k wunsa něy be yong něy shushu de ba ra mɛ fwom e jeng tɛsɛ bepiris. Ba to yong pyɛ̂ rangas yê nesang hyɔɔlɔl arɔng.