Read berom Nusu 38 Bible Online

Nusu 38 - berom bible

Nusu 38

¹Bɛzalɛl a yong gàgbang rangâs yas vɔk na Dagwi na cɔ́gɔt tîn rɔgɔ de nelis o na netes o na sé tyɛng, na sé mita beba na besɛntimita kuru batat. Negarang o mita gwining na besɛntimita kuru batat.

²A tɛ̀ a hɛ e bato-kwɔng o pyɛ́ de ya sé sede badúk, ko a wuna yɛ̄, na ye sè pyɛ jining na gàgbang rangas o. A dak mwa na dyam pama.

³A yong mwa pyɛ̂ fwom de ya sè yaga kwɔn o na dyam pama, pyɛ́ ma yet: bapey yaga paà fongôl kya, na becebut, na bèkɛt sɛ̂t nemi, na begúk tanga bèkywa-kya.

⁴A to yong a gàgbang rangas o pyɛ zělzel na dyam pama, a tik yɛ e nɛ̂n kwɔgɔt de wa gwɔrɔ kwɔn o wɔ̀ sɛ̀ rwa tē mo.

⁵A yong nerwěy nenaas yaga kahɛ e ji bahagat banaas, yaga na be gyisa ɛ begelê jurus o.

⁶A yong begele beting o yaga gàgbang rangâs yas o na cɔ́gɔt tîn rɔgɔ, ko a dak vɛ na dyam pama.

⁷A gyisa begele mo e ji nerwěy o, na be sè e bahagat o baba e jeng jurûs hɛ. A yong gàgbang rangâs yas o na bebak cɔ́gɔt, na he sè fǒng e tē mo.

⁸A yong gwopey kûs vɔ na dyam pama tanga pyɛ tikîs gwɛ ye dyam pama arɔng. A yong yɛ na bemadobî dyam pama vê beha de be ragas fwom e kwɔ̂n yêl bûk sangâl Dagwi.

⁹Bɛzalɛl a tɛ̀ a buk sangal hom pyɛ rɔnɔ de ba lɔk na shwêy linen puruk. E bak rwa batin a tɛ̀ berugu de nelîs vɛ na wul mita kuru banaas na vɛ betyiimin.

¹⁰Bak o wa vɔk sesêk cɔ́gɔt tîn rɔgɔ kuru baba, na pyɛ̂ gyisa mo kuru baba de ba yong na dyam pama. Ko begúk na bewɔ́rɔ gyisâ berugu mo ba yong vɛ mwa na dyam pyɛng.

¹¹Ba ra tyɛng ano e rwa batô buk o arɔng.

¹²E rwa ta, ba tɛ̀ sesek kuru tanga pyɛ̂ gyisa mo kuru arɔng. Ba tɛ̀ berugu de ba sé mita kuru baba na vɛ betat e ra vɛ. Begúk o na bewɔ́rɔ gyisâ berugu mo ba sé vê dyam pyɛng.

¹³E rwa rak de gwông yel gwa sé ɛ, netês lala mo na sé mita kuru baba na vɛ betat.

¹⁴E kawɛ bak gwông yêl, ba tɛ̀ sesek tat tanga pyɛ̂ gyisa mo tyat arɔng. Ba tɛ̀ berugu de ba sé mita betaama e ra vɛ.

¹⁶Ba lɔk mwa pyɛ̂ rɔnɔ̂ lala mo na shwêy linen puruk.

¹⁷Ba wuna mwa sesek de ba rɔnɔ mɛ lala mo na bewɔ́rɔ dyam pyɛng, ko begúk na batô sesek o ba yong na dyam pyɛng, ko pyɛ̂ gyisa mo ba yong yɛ na dyam pama.

¹⁸Ba tɛ̀ a gwông yel vɔk e lala mo gworugû bang o de nelîs gwɛ na sé mita shabetat, ko negarang o mita beba na besɛntimita kuru batat. Ba lɔk gwɛ na shwêy linen puruk tanga shwey de ha sé wilwil, na sinang tanga hemo de ha sé zwey. Ba tɔrɔ gwɛ na nzem.

¹⁹Ba yong sesek o naas, na pyɛ̂ gyisâ vɛ yê dyam pama. Begûk vɛ̀ na batô sesek o tanga bewɔ́rɔ mo ba yong na dyam pyɛng.

²⁰Mwa bekwagam de ba yong yaga buk o na vê lala mo ba yong vɛ na dyam pama.

²¹Bɛzalɛl Uri Hur wo yerê Yuda tanga Oholiyap Ahisamak wo yerê Dan ba ga yɛnɛ mwa fwôm bûk sangâl Dagwi, kwɔn de ba tik ɛ beta bagasak de ba vɔk ɛ badu Dagwi kuru. Oholiyap a sé mwât tɔ̂k tɛsɛ jɔ̂t batô gwɔ̀m, na tɔ̂k yông bazina, ko a to sè gwɔ̀m lɔk arɔng. Ko Mose a nɔ̂ng Itamar Aharon piris nu, na a yong nepyak dyām de ba wey mɛ yaga fwom o, yɛ tanga BeLevi.

²⁴Nepyak dyam shinang de ba nɔng nɔrɔ yaga yông kwɔ̂n re a Dagwi fongol na wul sede kilo gu rining tyɛng na masâ dyām de be ra mɛ fwom e kwɔ̂n re a Dagwi fongol.

²⁵Mwa rwas de a vɔk neshey kuru baba kɛ a dal ano, ba bara hɛ, ko ba sè ɛn gu naga batyiimin na vɛ batat, na naga betungun, na kuru batungun (603,550). Kawɛ mɛn a nɔng rebît shɛkɛl; ko ya wuna hɛ mwa kilo gu batat na naga benaas na kuru batat (3,430) tyɛng na masâ dyām de be ra mɛ fwom e kwɔ̂n re a Dagwi fongol.

²⁷Ba ra fwom na kilo gu batat na naga benaas (3,400) vê dyam pyɛng yaga pyɛ̂ gyisa naga yê buk o tanga yê gworugu mo, kayɛ mo kilo kuru batat na vɛ benaas (34).

²⁸Ko e ji bwang kilo kuru batat vê dyam pyɛng o ba yong mɛ begûk kabsa sesek o, na pyɛ̂ bâng batô vɛ tanga pyɛ̂ rɔgɔs o.

²⁹Dyam pama de ba nɔng nɔrɔ̂ yɛ ya wul kilo gu baba na naga benaas na kuru baba na vɛ betungun (2,425).

³⁰A sé na yɛ de ba yong mɛ batîn pyɛ̂ gyisa yê gwông yel e buk o, na gàgbang rangâs yas, na pyɛ zělzel o tanga mwa pyɛ́ de ba ra mɛ fwom e gàgbang rangas o,

³¹na pyɛ̂ gyisa yê rɔnɔ̂ lalâ buk o, na yê gwông yel e lala mo, na mwa bekwagam buk o tanga vê pyɛ̂ rɔnɔ mo.