Read berom Nusu 39 Bible Online

Nusu 39 - berom bible

Nusu 39

¹Bɛzalɛl na Oholiyap ba lɔk a Aharon berugu zɛɛt, sede remo de Dagwi Darwey a kana nɔ̂ng Mose nu. Ba lɔk rugû fwom o na nzem na shwey de ha sé wilwil, na sinang tanga hemo de ha sé zwey, na shwêy linen puruk tanga shwêy dyam shinang.

³Ba táng dyam shinang, ko ba wɔrɔ yɛ wishishish, na be ra mɛ fwôm tɔrɔ tanga bwang neshwey o.

⁴Kegyindî rugu mo, ba lɔk kɛ na nzem na pyɛ́ yane mo, ba wuna kɛ na rugû fwom o. Ba lɔk pyɛ̂ ye làp bya de ba wuna mɛ rugu mo e nuyel na e bamâ batô vɔ, sede remo de Dagwi Darwey a kana nɔ̂ng Mose nu.

⁶Ba yong dyéngere ryat bya yê onis, ko ba jining e ra yɛ̄ bazâ nèy Yakɔp kuru na nɛ neba, ko ba yong nekwɔn de nê vɔk yɛ na dyam shinang.

⁷Ba tɛ̀ yɛ bya, ba man yɛ na pyɛ̂ ye làp o e batô vɔ rugû fwom o, na ye sè e tô yére BeIsrayɛl, sede remo de Dagwi Darwey a kana nɔ̂ng Mose nu.

⁸Ba lɔk radîng gèy wo darwêy bepiris o na pyɛ jining o, na tɔrɔ sede rugû fwom.

⁹Ba gunung rugu mo befap beba, ko nelis o na negbey o nè sè sede negbêy tas vwɔ ba.

¹⁰E nuyêl rading o, ba manas ɛ̀ dyéngere ryat kuru na yɛ bya yemo de ba ga tɛ̀ e nekwɔn vɔk o ne dyam shinang. Ba manas yɛ̄ e begwong o benaas. E gwong gwô mɛsɛng o ba ngyɛrɛ ɛ dyéngere ryat de be tâng yɛ a karnelyan, na topas tanga ɛmɛral; e gwong o gwo neba turkɔs, na safaya tanga dayamɔn; e gwong o gwo netat yakinta, na agat tanga ametis; ko e gwong o gwô tala mo beril, na onis tanga yaspa.

¹⁴Ba jining bazâ yére BeIsrayɛl kuru na yɛ bya e ra dyéngere mo, za hining e ra kayɛ mo.

¹⁵Ba yong nerwěy neba ne dyam shinang, na be tɛ̀ nɛ e bato-kwɔng rak o vê radîng gèy. Ba wuna ngyâng celes dyam shinang bya de ba ga man yɛ na nekwɔn kabsa e ra pyɛ̂ ye làp na nerwěy rading o.

¹⁹Ba to yong nerwěy neba ne dyam shinang, ko ba tɛ̀ nɛ e bato-kwɔng tîn radîng gèy o e nɛn o.

²⁰Ba to yong nerwěy o nehak neba ne dyam shinang, ko ba tɛ̀ nɛ e ra pyɛ̂ ye làp bagat wɔ̀ sɛ̀ gyindî rugû fwom o.

²¹Ba rɔgɔs nerwěy radîng gèy o tanga ne rugû fwom o na rwik de gwa sé wilwil. Ano de rading o wô sangal gak e ra kegyindi mo, sana hàla kwɔ̂n sangal wɛ, sede remo de Dagwi Darwey a kana nɔ̂ng Mose nu.

²²Ba lɔk gworugû rak o gwolwis o na shwey de ha sé wilwil, zɔgɔ̂ gwɛ.

²³Ba tɛ̀ a gwɛ fwɔ de to hê yel ɛ, ba tak shwey kpadarak, ba tolo hɛ, ko ba gwɔrɔ mɛ fwɔ̂ rugu mo, yaga gwô kwon hama hɛ.

²⁴Ko tîn gworugu mo, ba tɔrɔ na nèy cɔgɔ̂t pomigiranet de ba yong na shwey de ha sé wilwil, na sinang tanga hemo de ha sé zwey.

²⁵Ba to yong ɛ begyɛngɛrɛng vê celes dyam shinang, ko ba sɔksɔl vɛ na nèy cɔgɔ̂t pomigiranet, ba gwɔrɔ mɛ mwa tîn gworugu mo. A sé e gwɛ a gworugû darwêy bepiris, sede remo de Dagwi Darwey a kana nɔ̂ng Mose nu.

²⁷Ba to lɔk berugû ji mo belis o yaga Aharon tanga nèy mɛ bewen o,

²⁸na betorô kpin tanga bebong, na tacuru byit; ba lɔk mwa yɛ na shwêy linen puruk.

²⁹Ano arɔng ba lɔk gyindi de ba tɔrɔ wɛ na nzem, sede remo de Dagwi Darwey a kana nɔ̂ng Mose nu.

³⁰Ba yong kebworô celes dyam shinang, de Aharon ê tɛ̀sɛ e tili mɛ, ko ba jining ɛ jɛk sede hê tô gwɔ̀m ngan: JƐRƐ YAGA DAGWI DARWEY.

³¹Ba wuna kɛ e nuyêl torô kpin na kerik de ka sé wilwil, sede remo de Dagwi Darwey a kana nɔ̂ng Mose nu.

³²Ano de ba tala mwa fwôm bûk sangâl Dagwi. BeIsrayɛl ba ra pyɛ̂ mwa tyɛng sede remo de Dagwi Darwey a kana nɔ̂ng Mose nu.

³³Yɛn a vey a Mose na pyɛ̂ mwa ye kwɔ̂n re a Dagwi fongol, yɛ a yemo ngan: — buk o na mwa pyɛ̂ gwɛ, begúk, na cɔ́gɔt gacik, na cɔ́gɔt yê gabeneng, na sesek tanga pyɛ̂ gyisa mo,

³⁴— pyɛ̂ bang o yê bahwô beturuk de ba ga tɛ̀ a vɛ būm swinang, na pyɛ̂ bang o yê bahwô pyɛ̂-nshi, tanga gworugû dûl Duk Jɛrɛ Wo Jɛrɛ,

³⁵— Kundung Wuna-na-Sira tanga begelê gwɛ, na pyɛ bang o;

³⁶— tebut tanga mwa pyɛ̂ wɛ tanga kpam-tuk de ba nára yaga Dagwi;

³⁷— pyɛ tikîs bekywa-kya de ba yong na celes dyam shinang, na bekywa-kya mo, na mwa pyɛ̂ yɛ, tanga něy o,

³⁸— kwɔ̂n rangas hê dyam shinang, na pyɛ̂ nesang hyɔɔlɔl yaga rangas, tanga něy shushu, — gworugû bâng rwi buk o,

³⁹— gàgbang rangâs yas wo dyam pama, na pyɛ zělzel, na sesêk hɛ, tanga mwa pyɛ̂ hɛ, — gwopey kûs vɔ tanga pyɛ tikîs gwɛ,

⁴⁰— pyɛ̂ rɔnɔ̂ buk o, na sesek o tanga pyɛ̂ gyisa vɛ, na gworugû bâng gwông yel o, na rǐk tanga bekwagam gwɛ, — mwa pyɛ̂ fwôm buk o,

⁴¹— berugu de ba tɔrɔ vɛ yaga fwôm bepiris e kwɔ̂n sangâl Dagwi, vɛ̀ a berugû jɛrɛ ve Aharon na nèy mɛ.

⁴²BeIsrayɛl ba ra mwa fwom o, tyɛng na pyɛ de Dagwi Darwey a kana nɔ̂ng Mose nu.

⁴³Mose a bɛrɛng mwa fwom de yɛn a ra, a di, ba ra gwɛ tyɛng sede remo de Dagwi Darwey a kana nɔng nu, ko a feng a yɛn, a ye, “Dagwi a gwɛ̌ a yin nerat.”