Read berom Nusu 4 Bible Online

Nusu 4 - berom bible

Nusu 4

¹Mose a hanat, a ye, “Ko ka ba sey tsak o na me wɛt ɛ? Ka ba wet betong na ha hom wɛt, ko ba ye, e Dagwi Darwey de a dura tó mɛ na mɛ wɛt ɛ?”

²Ko Dagwi Darwey a yang ɛ, “E sɛ́ de hwà vɔk e vwɔ mō ɛ?” Mose a ye, “A sé e gwele.”

³A yang ɛ, “Barak gwɛ e vwel.” Mose a barak gwɛ, gwa vɛ̌ tɛ́ ɛ gwɔ̄m; ko a ye jarak e jey.

⁴Ko Dagwi Darwey a yâng Mose, “Nára vwɔ mō, na hwo kaba wɛ e bak rum o.” Ano de a vo gwɔ̄m o, ko wa to to ɛ gwele e vwɔ mɛ.

⁵Ko Dagwi a yâng Mose, “Ra ano jeng de hwà sé e nuyêl BeIsrayɛl, na be sey tsak o wɔgɔ, a sé e Dagwi Darwey, Dagwi wo bedabeda mɛn Abraham, na Yishak tanga Yakɔp de a ga dura tó mɛ na hwo.”

⁶A to yâng Mose, “Tɛ̀ vwɔ mō e rwa kuhagat mō.” Mose a tɛ̀ vwɔ mɛ, ko jeng de a pat gwɛ, gwa ga vɛ̌ kaba rɔ ves hê rehwo de ha fosok.

⁷Dagwi a to yâng Mose, “To tɛ̀ vwɔ mō e rwa kuhagat mō.” Ano de a to tɛ̀ vwɔ mɛ, ko jeng de a pat gwɛ, gwa ga tɛ́ ɛ ngyɛ́l tyɛng na bwang rebek mɛ.

⁸Dagwi a ye, “Ka sede BeIsrayɛl bê sey tsak o na hwo wɛt, kɛ hwà jut nehywɛ mɛn na pyɛ bes ye susu mo wɛt, ko hwà rɔda to dura a yɛn pyɛ bes o ye neba mo; ano, yane yê tɛ̀ ɛn, be sey ha mo.

⁹Ko ka sede mwa na pyɛ̂ bes yane yɛn a sey tsak o wɛt, ko yɛn a tɛ̀ betong, na be wok arɔng wɛt, hwà rɔda wɔ̀ vo nshî Gwɔrɔt Nil, hwo vey shusha nɛ e vwel, nshi mo na rɔda doyo, ne tɛ́ ɛn nemi.”

¹⁰Ko Mose a ye, “À Darwey hom, ka hwà simo, hwo tomo me wɛt, ma vɔk lêm ha wɛt. Yimo gyam na vey e jeng yemo de hwà sé ha na me, me sam mō, nu hom ha sé dirik, ko relem hom ra sé sɔgɔlɔk arɔng.”

¹¹Ko Dagwi Darwey a yang ɛ, “E wa de a nɔ̂ng mwasi nu arɛt? Wa de a tɛ̀ mwat, na a tɛ́ ɛ kpey kɛ tɔn arɛt? Wa de a nɔng ɛ bɛrɛng kɛ nebǒk arɛt? A sé e me Dagwi Darwey!

¹²A remo, ci, ma rɔda sè tanga hwo jeng de hwà sé ha na yɛn, ma rɔda basa a hwo pyɛ de hwô ha.”

¹³Ko Mose a ye, “À Darwey hom, ka sede hwà simo, ko hwo jāma mwat hwak, na hwo tomo hɛ.”

¹⁴Dagwi Darwey a wok shom sizɔng na yɛ, a ye, “Gwà mō Aharon WoLevi, ma tɔk ɛ, a sé mwat de a tɔk ha naka, a sé kyè vey sey o e gwong, ko jeng de ê di o, a rɔda sila na yey pyɛng.

¹⁵Hwà rɔda ha na yɛ, na hwo tɛ̀ a yɛ ha mō e fwong, ko me ma rɔda sè tanga hwo na yɛ arɔng, ma rɔda basa a yin pyɛ de yin a rɔda ra.

¹⁶Jeng de Aharon a rɔda ha na BeIsrayɛl e reto mō, hemo hê sè sede ha de zarap e yis mɛ̀ yi na Dagwi mɛ.

¹⁷Ko hwo vɔk ɛ̀ gwele gwomo e vwɔ mō, yaga a sé na gwɛ de hwà rɔda dura mɛ̀ pyɛ̂ bes.”

¹⁸E bama mo, Mose a toyo vɔk na Yɛtrɔ tya mɛ, a yang ɛ, “Ka hwà simo, tik me, na me toyo wɔ na belɔ hom e Misra, na me di, kɛ ba rɔngɔl beken arɛt?” Yɛtrɔ a simo a Mose, a tɛ̀ ɛ e gwong, ko a tɛ̀ a yɛ netyang.

¹⁹E jeng de Mose a sè rɔngɔl e Midyan, ko Dagwi Darwey a yang ɛ, “Toyo hwo vɔk e Misra, yaga mwa vemo de ba kana simo be wey na hwo ba ga kushu.”

²⁰Ano de Mose a jut hwā mɛ na nèy o, a tɛ̀ ɛn e ra madung, a kaba gwong vɔk e Misra. Ko a vɔk ɛ gwele gwane de Dagwi a kana ha a yɛ.

²¹Ko Dagwi Darwey a to yâng Mose, “Jeng de hwà toyo e Misra, tɔk, hwà rɔda ra mwa pyɛ̂ bes de ma ga nɔng o reto e ra yɛ e bayîs Farawo. Ko me, ma rɔda tɛ̀ yey mɛ kashalang, a rɔda tik BeIsrayɛl be nusu wɛt.

²²E bama mo, hwô yang ɛ, ha de me, Dagwi Darwey, ma ha à hemo: ‘Israyɛl a sé hwey hom hê mɛsɛng.

²³Ma sé ha a hwo, tik hwey hom, na he kyè wɔ̀ re a me fongol. Ka sede hwà kyɛ́ o, ko mê kyè wɔ̀ wey na hwey wen mō he mɛsɛng o.’ ”

²⁴E kwɔn hak de yɛn a pɔl ɛ̀ e gwong, ko naturuk o Dagwi Darwey a man na Mose, a simo, na a mɔrɔ hɛ.

²⁵Ko Zipora a jut dyengere de ya sé vootot, a yosom mɛ hwey mɛ, a ra mɛ̀ pyɛ̂ Mose na rehwo mo, a ye, “Mwin hwà sé a me rwâs gwel wo nemi!”

²⁶Ko Dagwi Darwey a tik Mose kwen. Zipora a ha ano yaga yosom o.

²⁷Ko Dagwi Darwey a yâng Aharon, “Kyè, na hwo wɔ̀ man na Mose e hey.” Aharon a sogo, a kyè, a wɔ̀ man na Mose e raku de wa sé jaram yaga Dagwi, ko a kula hɛ e gey, yɛn a man ranang.

²⁸Mose a ha a Aharon pyɛ̂ mwa de Dagwi a ga tɛ̀ ɛ, na mwa pyɛ̂ dura de a ga basa a yɛ.

²⁹Ano, Mose na Aharon ba wɔ̀ wul Misra, ba tula hɛn na bemakûk BeIsrayɛl.

³⁰Aharon a misang mwa neha de Dagwi Darwey a kana ha a Mose, ko Mose a ra pyɛ̂ bes e nuyêl BeIsrayɛl.

³¹BeIsrayɛl ba sey tsak o na pyɛ́ mo. Jeng de yɛn a wok, Dagwi Darwey a ga tɔk pyɛ́ de yɛn a sé e ji mo, ko a ga di reyɔm mɛn, ba ye det a bato mɛn, ko ba ye guduruk, na be nɔng ɛ mɛ̀ nerey.