Read berom Nusu 40 Bible Online

Nusu 40 - berom bible

Nusu 40

¹Dagwi Darwey a yâng Mose,

²“E tuk hê mɛsɛng hê pwɛl gwô susu mo, hwà rɔda tɛ̀ bûk sangal hom.

³Tɛ̀ Kundung Wuna-na-Sira, ko hwo gana ɛ gworugû dul e nuyêl gwɛ.

⁴Yel na tebut, ko hwo tɛ̀ mwa pyɛ́ de ya sé yaga nása pyɛ̂ sɔ vɔk na Dagwi, yel na pyɛ tikîs bekywa-kya, na hwo tik ɛ bekywa-kya mo e ra yɛ.

⁵Tɛ̀ gàgbang rangas wo dyam shinang wo rangâs pyɛ̂ nesang hyɔɔlɔl e nuyêl Kundung Wuna-na-Sira mo ko hwo tɛ̀ gworugû bâng rwi mo, e kwɔn yel e buk o.

⁶“Tɛ̀ gàgbang rangâs yas e nuyêl rwi buk o,

⁷tɛ̀ gwopey kûs vɔ e tê buk o na gàgbang rangâs yas o, ko hwo sila ɛ nshi.

⁸Tɛ̀ pyɛ rɔnɔ̂ bûk sangal hom, ko hwo tɛ̀ gworugû bâng gwông yel vɔk e lalâ buk o arɔng.

⁹“E bama mo, jut něy shushu, ko hwo zagat mɛ buk o na mwa pyɛ́ de ya sé e ji mo. To zagat něy o e gàgbang rangâs yas tanga mwa pyɛ̂ wɛ tanga gwopey kûs vɔ na pyɛ tikîs gwɛ. Gwong a gwomo de hwô tɛ̀ buk o na mwa pyɛ̂ gwɛ, jaram yaga me, na ye bin sè jɛrɛ. Ko e ji ra ano mo, gàgbang rangâs yas wô dal mwa na nejɛrɛ.

¹²“E bama mo, hwo vey na Aharon tanga nèy mɛ bewen o e nuyêl rwi bûk sangâl hom, ko hwo kus ɛn na nshi.

¹³Tɛ̀ a Aharon berugû jɛrɛ, shushu hɛ na něy, ko hwo tik ɛ jaram, yaga na a ra a me fwôm bepiris hom.

¹⁴Yâng nèy mɛ bewen o be vey bagat, ko hwo tɛ̀ a yɛn berugu.

¹⁵Shushu hɛn na něy sede remo de hwà ga ra a da mɛn, yaga na be ra a me fwôm bepiris hom. Yi na shushû něy o, yɛn na yére mɛn bê tɛ́ ɛn bepiris hom yaga bezamang mɛn vɔk e nuyel.”

¹⁶Ano kwong, Mose a ra mwa pyɛ́ mo, tyɛng sede remo de Dagwi Darwey a nɔng ɛ nu.

¹⁷Ba tɛ̀ buk o e tuk hê mɛsɛng hê pwɛ̂l mɛsɛng gwô shey he neba, e bamâ nusu mɛn yi e Misra.

¹⁸Mose a ngyɛrɛ pyɛ̂ gyisa mo, ko a tɛ̀ cɔ́gɔt gacik e ji yɛ, a wuna yɛ̄ na cɔ́gɔt gabeneng, ko a tɛ̀ sesek o e nekwɔn vɛ.

¹⁹A lasha gworugû bang e ra buk o, a kyiri gwɛ na pyɛ kyiri mo, sede remo de Dagwi Darwey a ga kana nɔng ɛ nu.

²⁰E bama mo, Mose a jut beta bagasak de ba jɛk ɛ badu Dagwi, a tɛ̀ vɛ e ji kundung o, a tɛ̀ begelê gwɛ, ko a bang na pyɛ bang o.

²¹A vey na Kundung Wuna-na-Sira mo e ji buk o, ko a gana gworugû dul o, sede remo de Dagwi Darwey a ga kana nɔng ɛ nu.

²²A tɛ̀ tebut e ji buk o e nuyêl gworugû dul o e bak yege.

²³A tik ɛ kpam-tuk de be nása yaga Dagwi e ra wɛ, sede remo de Dagwi Darwey a ga kana nɔng ɛ nu.

²⁴A tɛ̀ pyɛ tikîs bekywa-kya e ji buk o, ye bɛrɛng tebut o, e bak mwɛlɛng,

²⁵ko a tɛ̀ kya e bekywa-kya mo e nuyêl Dagwi Darwey, sede remo de a ga kana nɔng ɛ nu.

²⁶A tɛ̀ gàgbang rangas wo dyam shinang e ji buk o, e nuyêl gworugû dûl gwɛ.

²⁷Ko a rangas ɛ pyɛ̂ nesang hyɔɔlɔl, sede remo de Dagwi Darwey a ga kana nɔng ɛ nu.

²⁸A gana gworugû bâng rwi buk o.

²⁹E nuyêl gwɛ a tik ɛ gàgbang rangâs yas, ko a nára nɔrɔ̂ yas de be rangas burang tanga nɔrɔ̂ pyɛ̂ re, sede remo de Dagwi Darwey a ga kana nɔng ɛ nu.

³⁰A tɛ̀ gwopey kûs vɔ e tê buk o na gàgbang rangâs yas o, ko a shusha ɛ nshi yaga kurus hɛn.

³¹A sé yi e ji gwopey o de Mose, na Aharon tanga nèy mɛ be kurus ɛ vɔ tanga bol mɛn,

³²yɛn e ragas ano, jeng de bē yel e buk o, na jeng de bē wɔ bagat na gàgbang rangâs yas, sede remo de Dagwi Darwey a ga kana nɔng nu.

³³E bama mo, Mose a tɛ̀ pyɛ rɔnɔ̂ buk tanga gàgbang rangâs yas o, ko a gana gworugû bâng gwông yel vɔk e lala mo. Ano de a tala fwom o.

³⁴Ko rele ra ye ship a bûk sangâl Dagwi, ko nedyɛt gbɔng nerât Dagwi Darwey na sila gwɛ,

³⁵ko Mose a tɔk yel e buk o wɛt.

³⁶E mwa kwɛngɛl BeIsrayɛl, yɛn a bɛrɛng rele mo e ra buk o. Ka sede ra nàra e ra gwɛ, yɛn e sangal e kwɔ̂n ye ngyɔk zɔng. Ko ka sede rele mo ra sogo, ko yɛn e kaba kwɛngɛl. E jeng de yɛn e sè sangal e kwɔ̂n ye ngyɔk, be bɛrɛng relê Dagwi Darwey e ra buk o nagwi, ko naturuk kya he sè e ji rɛ.