Read berom Nusu 5 Bible Online

Nusu 5 - berom bible

Nusu 5

¹Ano kwong, Mose na Aharon ba wɔ́ na Farawo, ba ye, “Dagwi Darwey, Dagwi wo BeIsrayel, a ye: Hala bemat hom be kyè, na be wɔ̀ ra a me nzem e hey.”

²Ko Farawo a ye, “Dagwi Darwey, yɛ à wà, de mê wok ha mɛ, na me hàla BeIsrayɛl be kyè arɛt? Ma tɔk ɛ wɛt, ko mê tik BeIsrayɛl be kyè wɛt!”

³Mose na Aharon ba ye, “Dagwi wo BeIbrani a ga dura tó mɛ na wot. Simo a wot, na hwo tik ot, wot kyè kwɛngɛl pɔlɔ tat wɔ e hey, na wot wɔ̀ nása a Dagwi Darwey, de a sé Dagwi mot nenɔrɔ̂ yas, yaga na a kwon wey na wot na tumbang kɛ na como wɛt.”

⁴Ko Farawo a yâng Mose na Aharon, “Yaga sɛ́ de yin e simo dul bemat nà ra fwom mɛn arɛt? Ra in pyɛ de ya sé myin!

⁵Nepyak min na ga dal ne BeMisra,[2] ko a remo yin e simo yɛn a tumal nà ra fwom a!”

⁶E tuk hining o, gbɔng gwɔ̀m a nɔ̂ng bemât nuyêl BeMisra de ba tá BeIsrayɛl e yel, tanga BeIsrayɛl vê bɛrɛng fwôm bemɛn redu, a ye,

⁷“Yin to nɔngɔs hɛn cugul, na be dak mɛ̀ bagat bwos wɛt! E ngamo nuyel, tik na yɛn a wɔ̀ tula cugul o pyɛ mɛn!

⁸Ko nepyak bagat bwos de be dak kahɛ tuk, nê sè tyɛng ano, yin tɛt nɛ ko tyɔng wɛt. Yɛn a sé beriri zɔng; yaga ano de be tosho wɔgɔ, me tik ɛn, na be wɔ̀ nása nenɔrɔ̂ yas vɔk na Dagwi mɛn.

⁹Gwɛ̌ hin a yɛn nedirîk fwom, tik ɛn be ku ɛn ɛ, ko yin tɛ̀ betong na neha bɔs wɛt.”

¹⁰Ano de BeMisra de ba ta BeIsrayɛl e yel, tanga BeIsrayɛl de yɛn a sé bɛrɛng fwôm bemɛn o ba kyè wɔ̀ ha a BeIsrayɛl, ba ye, “Wok in pyɛ de gbɔng gwɔ̀m a ye: Ba rɔda nɔng in cugul ko tyɔng wɛt.

¹¹Yin wɔ̀ jāma a tó min cugul kagwa de yin a tɔk sɛ̀ yɛ, ko vit a pyɛ de bê tɛt ɛ e ra nepyak fwom de yin a kana ragas.”

¹²Ano, BeIsrayɛl ba shara hɛn e mwa sevwêl Misra, na be wɔ̀ tula rúrùk sɔng e to cugul.

¹³Ko BeMisra de ba ta ɛn e yel, ba midra a BeIsrayɛl, ba yang ɛn, “Ra in nepyak fwom tyɛng sede jeng de bá kana nɔngɔs hin cugul.”

¹⁴BeMisra mo ba dak BeIsrayɛl vemo de Farawo a tɛ̀, na be bɛrɛng fwôm bemɛn, ko yɛn a rangal hɛn, “Yaga sɛ́ de yin a sila nepyak bagat bwos de ba ha a yin wɛt ɛ? A sè nayos ano, ko yunung a to sé ano arɔng.”

¹⁵E bama mo, bemât nuyêl bɛɛ̀ fwôm BeIsrayɛl ba wɔ́ na Farawo, ba tosho a yɛ, ba ye, “Yaga sɛ́ de hwà ra ano na bemât fwom mō arɛt?

¹⁶Vit, be to sɛlɛ hot na cugul wɛt, ko mwa ano be simo, wot dak bagat bwos! Ko di, be dakas hot, ko nɛn o ha sé mot wɛt, e hê bemat mō!”

¹⁷Farawo a toyo a yɛn, a ye, “Yin a sé beriri, yin e simo ra fwom wɛt! Pyɛ ma yane de ya tɛ̀, yin e tē, me hàla hin, na yin wɔ̀ nása nenɔrɔ̂ yas vɔk na Dagwi Darwey.

¹⁸Remo, to in vɔk e kwɔ̂n fwom min! Bê nɔng in cugul wɛt, ko yin a rɔda dak nepyak bagat bwos de ba ga kana yɛrɛ a yin!”

¹⁹Jeng a yane de bemât nuyêl BeIsrayɛl ba yel e reyɔm, yaga redu de ba yang ɛn, yɛn a tɛt nepyak bagat bwos de be ragas kahɛ tuk wɛt.

²⁰Jeng de yɛn a tik lɔ Farawo, ba wɔ̀ sɛ̀ Mose na Aharon, ba sè gyeng ɛn.

²¹Ko yɛn a yâng Mose na Aharon o, “Tik na Dagwi Darwey a di pyɛ de yin a ra, na a tabak hin. Yin a ga tɛ̀ a wot nemi neves na Farawo na bemât badu mɛ. Yi ano, yin a ga nɔng ɛn gwong, na be wey na wot.”

²²Mose a doyo vɔk na Dagwi Darwey, a ye, “À Darwey hom, yaga sɛ́ de hwà vey na reyɔm remo e ra bemat mo arɛt? Yaga sɛ́ de hwà ká hwo tomo me ɛ?

²³Yimo jeng de ma vey na Farawo, na me ha na yɛ e ji reza mō, a ga gwɛ̌ dura a bemat vemo neves zɔng, ko hwà ga ka sey bemat mō mo wɛt!”