Read berom Nusu 6 Bible Online

Nusu 6 - berom bible

Nusu 6

¹Dagwi Darwey a yâng Mose, “Ê ros wɛt, hwà rɔda di pyɛ de mê ra a Farawo. Ma sé kyè wɔ̀ tɛ̀ ɛ gbing-gbing, na a tik BeIsrayɛl be nusu. Mwin, mê tɛ̀ ɛ gbing-gbing, a ró ɛn yi e sevwel mɛ.”

²Dagwi a ha na Mose, a ye, “Ma sé Dagwi Darwey.

³Ma kana dura tó hom na Abraham, na Yishak tanga Yakɔp na rezâ Dagwi Wo Reto Mwa, ko ma ha a yɛn reza de ra sé renang wɛt, rɛ a Dagwi Darwey.

⁴Ma to wuna sira na yɛn, na me nɔng ɛn sevwêl Kanaan, sevwel de yɛn a kana sangal ɛ sangâl rekyɛn.

⁵Ko di, ma ga wok sesîn BeIsrayɛl yaga BeMisra ba vɔk ɛn e ji sesam, ko ma bare na wuna-na-sira hom.

⁶Yaga ano, há a BeIsrayɛl e to hom: ‘Ma sé Dagwi Darwey, ma rɔda nusu na yin yi e fwôm sesam BeMisra, na me tɛ̀ in washak. Ma rɔda sey in na vwɔ hom gwô gap, ko bemat de ba tak a yin, ma rɔda tabak hɛn hyiw.

⁷Ma rɔda jut in, na yin sè bemat hom, ko mê sè Dagwi min. Yin a rɔda tɔk, me Dagwi Darwey ma sé Dagwi min de a nusu na yin e sesam BeMisra.

⁸Ma rɔda vɔk na yin e sevwel de ma kana sira, mê nɔ̂ng Abraham, na Yishak tanga Yakɔp, ko ma rɔda nɔng in hɛ pyɛ nedanelɔ min. Me wɛ a Dagwi Darwey.’ ”

⁹Jeng de Mose a ha a BeIsrayɛl pyɛ́ yane, ko ba wok ɛ wɛt, yaga neyey mɛn na ga beseng na neves fwôm sesam de ba ga di.

¹⁰Ko Dagwi Darwey a ha na Mose, a ye,

¹¹“Ci wɔ̀ ha a Farawo, gbɔng gwɔ̀m Misra, na a hàla BeIsrayɛl be nusu yi e sevwel mɛ.”

¹²Ko Mose a toyo a Dagwi Darwey, a yang ɛ, “BeIsrayɛl ba ka wok me wɛt, ko e rɛ̌ de Farawo ê wok me ɛ? Me de ma vɔk nu sɔgɔlɔk ɛ?”

¹³Mwa ano, Dagwi Darwey a ha na Mose tanga Aharon e ra rehâ BeIsrayɛl na Farawo, a nɔng ɛn nu, na yɛn a pat BeIsrayɛl yi e sevwêl Misra.

¹⁴Rubɛn, hwêy negel Yakɔp,[3] á vɔk nèy bewen nenaas, nɛ à Ɛnɔk, na Palu, na Hɛzrɔn tanga Karmi. Yɛn vɛ a bedanelɔ rùhup mɛn.

¹⁵Nèy bewen ne Simɛyɔn à Yɛmwɛl, na Yamin, na Ohat, na Yakin, na Zohar tanga Saul, hwêy hwā wo BeKanaan. Yɛn vɛ a bedanelɔ rùhup mɛn.

¹⁶Nèy bewen ne Levi à Gɛrshɔn, na Kohat tanga Mɛrari. Yɛn vɛ a bedanelɔ rùhup mɛn. Neyɛnɛ̂ neshey Levi mwa ná sè naga na kuru batat na nɛ netaama (137).

¹⁷Nèy bewen ne Gɛrshɔn à Libni tanga Shimei; yɛn vɛ a bedanelɔ nelala mɛn.

¹⁸Nèy bewen ne Kohat à Amram, na Yizhar, na Hɛbrɔn tanga Uziyɛl; neyɛnɛ̂ neshey Kohat mwa ná sè naga na kuru batat na nɛ netat (133).

¹⁹Nèy bewen ne Mɛrari a Mali tanga Mushi. Vemo vɛ a nelɔ BeLevi e yére mɛn.

²⁰Amram a ra wenêng Yɔkɛbɛt, gwà da mɛ, ko a tɔ a yɛ Aharon tanga Mose. Neyɛnɛ̂ neshey Amram mwa ná sè naga na kuru batat na nɛ netaama (137).

²¹Nèy bewen ne Yizhar à Kora, na Nɛfɛk tanga Zikiri.

²²Nèy bewen ne Uziyɛl à Mishayɛl, na Ɛltsafan tanga Sitiri.

²³Aharon a vo Ɛlishɛba, hwông Aminadap, gwà Nashon hwong o, ko a tɔ a yɛ Nadap, na Abihu, na Ɛlɛyazar tanga Itamar.

²⁴Nèy bewen ne Kora à Asir, na Ɛlkana tanga Abiyasaf; yɛn vɛ a bedanelɔ nelala ne ruhûp Kora.

²⁵Ɛlɛyazar, hwêy Aharon, a vo hwā e ji behwông Putiyɛl, ko a tɔ a yɛ Pinehas. Vane vɛ a bedanelɔ vê yére Levi e nelɔ na rùhup tanga nelala mɛn.

²⁶A sé e Aharon tanga Mose mo de Dagwi Darwey a yang ɛn, be pat BeIsrayɛl yi e sevwêl Misra bagyɛng o bagyɛng o.

²⁷E yɛn vɛ de ba ha na Farawo, na a hàla BeIsrayɛl yi e sevwêl Misra.

²⁸Jeng de Dagwi Darwey a ha na Mose e sevwêl Misra,

²⁹a yang ɛ, “Ma sé Dagwi Darwey! Há a Farawo, gbɔng gwɔ̀m Misra, mwa pyɛ́ de mê ha a hwo.”

³⁰Ko Mose a toyo a yɛ, a ye, “Di, ma sé mwât nu sɔgɔlɔk. E rɛ̌ de Farawo ê wok me ɛ?”