Read berom Nusu 7 Bible Online

Nusu 7 - berom bible

Nusu 7

¹Ko Dagwi Darwey a yang ɛ, “Di, ma ga tɛ̀ o sede Dagwi na Farawo, ko Aharon, gwà mō, a rɔda sè mwât ha mō.

²Hwà rɔda ha a yɛ mwa pyɛ́ de ma nɔng o nu e ra yɛ̄, ko Aharon ê ha a Farawo, na a hàla BeIsrayɛl be nusu yi e sevwel mɛ.

³Ko ma rɔda tɛ̀ yey mɛ kashalang, na me bin gwɛ̌ dura reto hom yi na pyɛ̂ bes detidetu e sevwêl Misra.

⁴Farawo a rɔda wok in wɛt. Ano kwong, BeMisra bê man na me, ma rɔda tabak hɛn hyiw, na me pat regyɛng BeIsrayɛl, bemat hom, yi e Misra.

⁵Jeng de ma rɔda nára vwɔ hom gwô gap e ra Misra mo, na me nusu na BeIsrayɛl yi e tē mɛn, BeMisra mo ba rɔda tɔk, me wɛ a Dagwi Darwey.”

⁶Mose na Aharon ba ra tyɛng na pyɛ de Dagwi Darwey a nɔng ɛn nu.

⁷E jeng de yɛn a ha na Farawo, Mose a vɔk neshey kuru rwit (80), ko Aharon a vɔk nɛ kuru rwit na nɛ netat (83).

⁸Dagwi Darwey a yâng Mose na Aharon,

⁹“Ka sede Farawo a yang in, yin ra pyɛ bes de ya dura, yin a vɔk reto, ko hwo, Mose, hwo yâng Aharon a jut gwele mɛ, na a barak gwɛ e vwel e nuyêl Farawo, ko gwô tɛ́ ɛ gwɔ̄m.”

¹⁰Ano kwong, Mose tanga Aharon ba kyè vɔk na Farawo, ba ra tyɛng na pyɛ de Dagwi Darwey a nɔng ɛn nu. Aharon a hwo barak gwele mɛ e nuyêl Farawo na bemât badu mɛ, ko gwa tɛ́ ɛ gwɔ̄m.

¹¹Farawo kwong a tomo, be vey na bemât netsitsɛng na bevwoshon, ko bemât tô bes vê Misra mo, ba ra tyɛng ano na retô bes mɛn arɔng.

¹²Kawɛ e ji mɛn a barak gwele mɛ, ko bà tɛ́ ɛn begwɔ̄m. Ko gwelê Aharon gwa wɔlɔk begele mɛn o mwa pyɛt.

¹³Mwa ano, Farawo a tɛ̀ yey mɛ kashalang, a kyɛ́ ɛ nà wok ha mɛn, sede remo de Dagwi Darwey a ga kana ha.

¹⁴Dagwi Darwey a yâng Mose, “Farawo a sé gbàrak, a kyɛ́ ɛ nà hàla bemat o.

¹⁵Kyè vɔk na yɛ nagasi, tyɛng jeng de e nunus vɔk e Gwɔrɔt Nil. Vɔk ɛ gwele mō, gwomo de gwa kana tɛ́ ɛ gwɔ̄m. Gyéng ɛ, na hwo man na yɛ e nû kwogom,

¹⁶ko ha a yɛ, ‘Dagwi wo BeIbrani, a tomo me, na me ha a hwo, na hwo, hàla bemat mɛ be kyè, na be bin wɔ̀ re a yɛ fongol e hey. Ko hwà sé ra retek pere vey e remo.’

¹⁷Ko di, à darwey, Dagwi Darwey a ye, hwà rɔda tɔk yerê mwat de yɛ a sé yi na pyɛ de a rɔda ra. Di, ma rɔda fala nshî Gwɔrɔt Nil na gwele de gwa sé e vwɔ hom, ko nà rɔda doyo, ne tɛ́ ɛn nemi.

¹⁸Betɔk ba rɔda kushu, ko nshî gwɔrɔt o nê tɛ̀ nesang hwoolol de BeMisra bê tɔk sɔ nɛ wɛt!”

¹⁹Dagwi Darwey a to yâng Mose, “Yâng Aharon, a jut gwele mɛ, na a nára gwɛ e ra nshî mwa e sevwêl Misra, nshi nè nerɔt, na ne bakang, na ne bekadung tanga mwa bwang nekwɔn sɛ̂ nshi mɛn, yaga na ne bin tɛ́ ɛn nemi. Ko nemi nê sè e kagwa e ji sevwêl Misra mwa e ji bakwo tanga betsung.”

²⁰Mose tanga Aharon ba ra tyɛng sede remo de Dagwi Darwey a nɔng ɛn nu. E nuyêl Farawo na bemât badu mɛ, Aharon a jut gwele mɛ e rak o, a fala mɛ nshî Gwɔrɔt Nil, ko mwa nshi mo na tɛ́ ɛn nemi.

²¹Betɔk mwa ba kushu, nshi na tɛ̀ nesang hwoolol, ko bemat ba tɔk sɔ nɛ wɛt. Nshî mwa sevwêl Misra na tɛ́ ɛn nemi.

²²Ko bemât tô bes vê Misra arɔng ba ra tyɛng ano na tô bes mɛn. Mwa ano, Farawo a tɛ̀ yey mɛ kashalang, a kyɛ́ ɛ nà wok Mose na Aharon, sede remo de Dagwi Darwey a ga kana ha.

²³A doyo, ko a toyo vɔk e lɔ mɛ, vit nà ka bare na pyɛ de ya té wɛt.

²⁴BeMisra mwa ba kyě kas bavɔng e rwa kwogôm Gwɔrɔt Nil, na be sɛ̀ nshî sɔ, yaga yɛn a tɔk sɔ nshî gwɔrɔt o wɛt.

²⁵Nepɔlɔ netaama na kwey e bama de Dagwi Darwey a ga kana fala nshî Nil o.