Read berom Nusu 8 Bible Online

Nusu 8 - berom bible

Nusu 8

¹Dagwi Darwey a to yâng Mose, “Ci na Farawo, na hwo yang ɛ, Dagwi Darwey a ye ngan: ‘Hàla bemat hom, be kyè wɔ̀ re a me fongol.

²Ka sede hwà simo wɛt, ko ma rɔda tomo na tumbâng bebot e sevwel o mwa.

³Gwɔrɔt Nil gwô sila na vɛ, ba rɔda dɔng, bê yel e ji lɔ mō wɔ̀ sɛ̀ duk pɔlɔ mō na e ra gwat mō, Bê yel e nelɔ bemât badu mō tanga mwa bemat mō arɔng, bê sè e bapik na e ji neshǐ yông pyɛ́ mo.

⁴Bebot o bê turus e ra hwo na mwa bemat mō berey na bepɛng arɔng.’ ”

⁵Dagwi Darwey a to yâng Mose, “Há a Aharon, a nára vwɔ mɛ na gwele mɛ e ra nerɔt, na bakang tanga bekadung, yaga na bebot be nusu e ra sevwêl Misra.”

⁶Aharon kwong a nára vwɔ mɛ e ra nshî Misra, ko bebot ba nusu, ba kyiri sevwel.

⁷Ko bemât tô bes arɔng ba tɛ̀, bebot ba nusu e vwel yi na bes mɛn.

⁸Farawo a tomo, be vey na Mose tanga Aharon, a yang ɛn, “Ra in won na Dagwi Darwey, na a pat bebot yi e kwɔn hom na kwɔ̂n bemat hom, ko ma rɔda hàla bemat min, na be kyè wɔ̀ nára a Dagwi Darwey nɔrɔ̂ yas.”

⁹Mose a hwo yâng Farawo, “A sé na hwo, na hwo tɛ̀ a me jeng de hwó simo, na me ra won yaga hwo, na bemât badu mō tanga mwa bemat mō. Mê ra won, yaga na bebot o be hàla nelɔ min sɛ̌ vê ji Gwɔrɔt Nil zɔng de bê tik vɛ.”

¹⁰Farawo a toyo a Mose, a ye, “Nahwol.” Ko Mose a ye, “Tala mo, ê sè tyɛng sede remo de hwà ha, ko hwà rɔda tɔk, vit a mwat de a sé sede Dagwi Darwey, yɛ Dagwi mot.

¹¹Bebot o bê nunus hɛn yi na hwo na bemat mō mwa, sɛ̌ vê Gwɔrɔt Nil zɔng de bê nàra.”

¹²Ano kwong, Mose tanga Aharon ba nusu hɛn yi na Farawo, ko Mose a ra won na Dagwi Darwey e ra hâ bebot o, vemo de a ga tak a Farawo na vɛ.

¹³Dagwi Darwey a sey wôn Mose, ko bebot de bá sè e ji nelɔ na nelala tanga e hiri ba wey mwa pyɛt.

¹⁴Ko ba tula vɛ bagwɔt o bagwɔt o, ko vwel o ha rugus na nesang hwoolol.

¹⁵Sede Farawo a di, ba ga nɔt ɛ nesong, a to tɛ̀ yey mɛ kashalang, a kyɛ́ ɛ nà wok Mose tanga Aharon, sede remo de Dagwi Darwey a ga kana ha.

¹⁶Dagwi Darwey a yâng Mose, “Há a Aharon, yɛ a nára gwele mɛ, na a fala mɛ fongôl vwel, na gwo tɛ́ ɛ ngyána e ji sevwêl Misra mwa.”

¹⁷Aharon kwong a jut gwele mɛ, a fala mɛ fongôl vwel o, ko ngyána ya nusu, ya kaba bemasi tanga ngyāma. Mwa fongôl vwêl Misra gwa tɛ́ ɛ ngyána.

¹⁸Bemât tô bes ba ra, na be tɛ̀ ngyána ye nusu yi na bes mɛn arɔng, ko ba kyɛm wɛt. Ngyána mo ya sè e ra bemasi tanga ngyāma.

¹⁹Ko yɛn a yâng Farawo, “E fwôm Dagwi a gwomo!” Mwa ano, Farawo a tɛ̀ yey mɛ kashalang, a kyɛ́ ɛ nà wok Mose tanga Aharon, sede remo de Dagwi Darwey a ga kana ha.

²⁰Dagwi Darwey a yâng Mose, “Sogo bop nagasi, na hwo wɔ̀ man na Farawo tyɛng jeng de e nunus vɔk e gwɔrɔt. Yang ɛ, Dagwi Darwey a ye ngan: ‘Hàla bemat hom, be kyè wɔ̀ re a me fongol.

²¹Ko ka hwà kyɛ́ o nà hàla hɛn, ko ma rɔda gáng a hwo gwakû cíng, hwo na bemât badu mō, na bemat mō mwa. Nelɔ BeMisra tanga mwa vwel o ha rɔda sila na cíng o.

²²Ko e tuk hane mo, mê tik bak vwêl Gɔshɛn, kwɔn de bemat hom ba sé sangal ɛ, vit a cíng. Yi ano, hwà rɔda tɔk, me Dagwi Darwey ma sé dura reto hom e ji vwel hemo.

²³Ma rɔda ra a bemat hom detu na bemo. Nahwol wɛ de pyɛ bes yemo yê té.’ ”

²⁴Ko Dagwi Darwey a ra ano. Bàkû cíng pyak ba vey yel e ji lɔ Farawo na nelɔ bemât badu mɛ. Cíng o ya tak a sevwêl Misra mwa sizɔng.

²⁵Ko Farawo a tɛ̀, ba vey na Mose tanga Aharon, a yang ɛn, “Kyè in wɔ̀ nára nɔrɔ̂ yas vɔk na Dagwi, ko ra in e ji sevwel o.”

²⁶Ko Mose a ye, “Wot ê tɔk ra ano wɛt. Di, yerê nenɔrɔ̂ yas de wot a rɔda nása a Dagwi Darwey, Dagwi mot, na sé ligis na BeMisra. Ka sede wot a nása yas o, na BeMisra be di, ko ba rɔda tow ot na beta!

²⁷A sé gbing-gbing, wot kyè kwɛngɛl pɔlɔ tat vɔk e hey, na wot wɔ̀ nása a Dagwi Darwey, Dagwi mot, nenɔrɔ, sede remo de a nɔng ot nu.”

²⁸Ko Farawo a ye, “Ma rɔda hàla hin, yin kyè wɔ̀ nára nɔrɔ vɔk na Dagwi Darwey, Dagwi min, e hey, ko yin kyè yikyik wɛt. Ra in won yaga me arɔng.”

²⁹Mose a toyo a yɛ, a ye, “Sede ma nusu yi e nuyel mō, ma rɔda ra won na Dagwi Darwey, ko nahwol, cíng o yê nu ɛ yi e kwɔn mō, na bemât badu mō tanga mwa bemat mō. Ko hwo kē, hwo to kwɛlɛng, na hwo kyɛ́ o nà hàla bemat o, na be wɔ̀ nása a Dagwi Darwey nenɔrɔ wɛt.”

³⁰Ko a nusu yi na Farawo, a ra won na Dagwi Darwey,

³¹ko Dagwi Darwey a ra pyɛ de Mose a ra won o. Cíng o ya nu ɛ yi e kwɔ̂n Farawo, na bemât badu mɛ tanga mwa bemat me, ko kecing kining ka to tɛt ɛ̀ wɛt.

³²Ko mwa ano, Farawo a tɛ̀ yey mɛ gbarak gbak, a hàla bemat o, be kyè wɛt.