Read berom Nusu 9 Bible Online

Nusu 9 - berom bible

Nusu 9

¹Dagwi Darwey a yâng Mose, “Ci na Farawo, ko hwo yang ɛ, me, Dagwi wo BeIbrani, ma ye ngan: ‘Hàla a bemat hom, be kyè wɔ̀ re a me fongol.

²Ka sede hwà kyɛ́ o nà hàla hɛn, hwà ro na yɛn gbak,

³ko ma rɔda tomo na tumbang vwes e ra yas mō, e ra bedwa na bemadung, na bemaryat, na berɔndɔng tanga vyēl.

⁴Ma rɔda gas e tê yas BeIsrayɛl na ye BeMisra, vit a pyɛ cak de ya rɔda ku de ya sé ye BeIsrayɛl.

⁵Nahwol a jeng de me, Dagwi Darwey, ma ga yɛrɛ, na me ra pyɛ yemo e ji sevwel o.’ ”

⁶Nusû hwol o, Dagwi Darwey a ra pyɛ mo. Mwa yas BeMisra ya kushu, ko e ji ye BeIsrayɛl vit a jining de ya ku.

⁷Farawo a tomo, na be wɔ̀ rangsal a yɛ, ko mwin, ba sɛ̀ vit a yas jining de ya ku e ji ye BeIsrayɛl. Mwa ano, a nàra gbarak, a kyɛ́ ɛ nà ha a bemat o.

⁸Dagwi Darwey a yâng Mose tanga Aharon, “Sila hin vɔ min na fongôl vu-kyâ fwam-ju, ko tik Mose a waram gwɛ e larwak e nuyêl Farawo.

⁹Fongol o gwô tɛ́ ɛ búm mwa e sevwêl Misra. Gwô tɛ̀ benot, de bê tɛ́ ɛn bweykanang, ko bê hwo e ra bemasi tanga ngyāma e mwa sevwel o.”

¹⁰Ano yɛn a jut fongôl vu-kyâ fwam-ju, ba tumal e nuyêl Farawo, ko Mose a wamta gwɛ e larwak. Gwa tɛ̀ benot ba tow bemasi tanga ngyāma, ko ba tɛ́ ɛn bweykanang.

¹¹Bemât tô bes ba tɔ̀k tumal e nuyêl Mose wɛt, yaga benot o ba ga tow ɛn tanga mwa bwang BeMisra.

¹²Ko Dagwi Darwey a tɛ̀ yêy Farawo kashalang, a kyɛ́ ɛ nà wok hâ Mose tanga Aharon, sede remo de Dagwi Darwey a ga kana ha a Mose.

¹³Dagwi Darwey a yâng Mose, “Sogo bop nagasi, na hwo wɔ́ na Farawo, yang ɛ, me, Dagwi wo BeIbrani, ma ye ngan: ‘Hàla a bemat hom, be kyè wɔ̀ re a me fongol.

¹⁴Ka ano wɛt, e jeng yemo ma sé kyè wɔ̀ vey a hwo pyɛ mō, na bemât badu mō tanga mwa bemat mō na betumbang, na hwo bin tɔk, vit a hwak sede me e jey mwa!

¹⁵Ka ma ga yâng nára vwɔ̂ gap hom, na me rusu hwo tanga bemat mō na tumbang vwes, ka wa ga wey na yin pyɛt e jey.

¹⁶Ko ma tik o kwen, na me dura a hwo reto hom, yaga na be shara reza hom e jey mwa.

¹⁷Ko mwa ano, hwó bare hwó tɔk ra pyɛ de hwà simo na bemat hom, hwà kyɛ́ o nà ha a yɛn!

¹⁸Ko di, nahwol, tyɛng jeng yemo, ma rɔda tɛ̀ fwala vwes gwo gyirik e ra vwel yerê gwinde ba ga sang di wɛt yimo de ba pɛrɛ Misra vey e remo.

¹⁹Yaga ano, nɔng nu, na be vey na yas mō na mwa pyɛ́ mō de ya sé e hey, na be tik yɛ̄ e kwɔn de yê dal ɛ. Fwala mo gwa rɔda gabsa e ra mwa bemat na ngyāma de ya rɔngɔl e hey, yemo de ba ga vey mɛ e lɔ wɛt, ya rɔda wey jeng de fwala gwa hwo e ra yɛ.’ ”

²⁰Behak e ji bemât badu Farawo ba tɛ̀ bengyip e ra pyɛ de Dagwi Darwey a ha, ba vey na besam mɛn tanga yas mɛn e lɔ.

²¹Ko vinde ba wet betong na pyɛ de Dagwi Darwey a ha wɛt, ba tik besam mɛn tanga yas mɛn e hey.

²²Dagwi Darwey a yâng Mose, “Nára vwɔ mō e lagwi, yaga na fwala gwo gabsa e ra mwa neyɛnɛ̂ sevwêl Misra, e ra mwasi na ngyama, tanga e ra mwa pyɛ́ de ya tabas e vwel o.”

²³Mose kwong, a nára gwele mɛ vɔk e lagwi, ko Dagwi Darwey a tomo na gbara na fwala. Nedɛbɛt na tē bwerep e ra vwel, ko a shusha fwala e ra sevwêl Misra.

²⁴Gbara wa tē dɛbɛt, fwala gwa gabsa ding-ding, gwa sè vwes o yerê gwinde gwa ga sang gaba wɛt yimo jeng de ba pɛrɛ sevwêl Misra.

²⁵Fwala mo gwa wey na kayɛ pyɛ de ya sé e jey, mwasi na ngyama. Gwa to wey na kayɛ pyɛ de ya tabas e vwel, ko gwa kwɛrɛng cɔ́gɔt mwa hywiri.

²⁶Sɛ̌ e bak vwêl Gɔshɛn zɔng de bemât Israyɛl ba sangal ɛ, de vit à fwala.

²⁷Farawo a tomo, be vey na Mose tanga Aharon, a yang ɛn, “A remo, ma tɔk, ma ga buru. Dagwi Darwey a ra tyɛng, ko me tanga bemat hom wot a buru.

²⁸Ra won na Dagwi Darwey, yaga na a tɛ̀ kwɔ̂k gbara na fwala mo. Me kwong ma rɔda tik in, yin kyè; a sé gbing-gbing, na yin to re nuyel na sangal e ngamo wɛt.”

²⁹Mose a yang ɛ, “Sede ma nusu yi e ji pomo, mê nára vɔ hom vɔk na Dagwi Darwey e ji won. Gbara wa rɔda tumal, ko fwala arɔng gwô to sè wɛt. Yi ano, hwô tɔk, jey ya sé yê Dagwi Darwey.

³⁰Ko di, ma tɔk, hwo na bemât badu mō, yin a vɔk bengyip mɛ e ngyen wɛt.”

³¹Hirî yerê rama mɛn na yerê alkama de be tâng wɛ a baale ya ga wey, yaga baale wa ga kana vo yeneng, ko batîn rama ba ga kana paa bejamuk.

³²Ko bwang yere bya ye alkama ya lashe hɛ wɛt, yaga ba tus yɛ e bama.

³³Mose a nusu e repomo yi na Farawo, a nára vɔ mɛ vɔk na Dagwi Darwey e ji won, ko gbara na fwala ba tala hɛn, rwak arɔng wa ye wang.

³⁴Jeng de Farawo a di, rwak na gbara tanga fwala ba ga ye wang, a to ra nɛ̂n negbarak, yɛ tanga bemât badu mɛ.

³⁵Ano de Farawo a tɛ̀ yey mɛ kashalang, a kyɛ́ ɛ nà hàla BeIsrayɛl, sede remo de Dagwi Darwey a ga kana ha yi na Mose.