Read berom Iyɔp 1 Bible Online

Iyɔp 1 - berom bible

Iyɔp 1

¹À raane, mwat hwak á sè e vwel hak de bá tang hɛ à Us. Bá yila hɛ, à Iyɔp. Á sila gyat, á sè cik, ko á sap Dagwi, á kyɛ́ ɛ râ pyɛ́ vyes.

²A vɔk nèy bewen netaama na behwong betat.

³A vɔk vyēl gu bataama (7,000), na bemaryat gu batat (3,000), na berɔndɔng gu rining (1,000) vê fwom tanga shêp madung naga betungun (500). A to vɔk bemât fwom yɔkyɔk. A vɔk nedanerey a dal mɛ bemat mwa de bá sè e rwa rak sevwêl Israyɛl.

⁴Nèy mɛ bewen o ba ragas nzem rê pyɛ́, ba raa mɛ nelɔ bemɛn e jeng de ba tɛ̀, e hwomo be tula hɛn ɛ, be rini begwa mɛn behwong o.

⁵Ko jeng de ba tala nzem o, Iyɔp e sogo bop nagasi, e tomo be yila hɛn. E yong ɛn yaga nára nɔrɔ̂ rangas, ko e nára nɔrɔ̂ yas burang yaga kawɛ mɛn. E ra ano, yaga e bare, gyeng hwak e ji mɛn a ga pere buru, a ga ra a Dagwi yey. Ano de Iyɔp a ragas kayɛ jeng.

⁶Tuhak, bemat-lagwi na wɔ̀ dura to mɛn e nuyel Dagwi Darwey, ko mwât tɛ́sɛ sekun, yɛ Shetan, a vey e ji mɛn arɔng.

⁷Dagwi Darwey a yang ɛ, “Hwà ga ra sɛ́ ɛ?” Mwât tɛsɛ sekun a hanat a ye, “Ma sé kyě rini e de jàma e jey mwa.”

⁸Dagwi Darwey a yang ɛ, “Hwà kyɛ́ hwo di mwât fwom hom Iyɔp bɛ? Vit a mwat sede yɛ e jey. A sila gyat, a sé cik, e sap me, ko e kyɛ́ ɛ râ pyɛ́ vyes!”

⁹Mwât tɛsɛ sekun a hanat a ye, “E zɔng de Iyɔp e sap o wɛt!

¹⁰A sé yaga hwo, hwà sé sede yép de ba ta, ba gwɔrɔ hɛ, yɛ tanga belɔ mɛ mwa na pyɛ́ de a vɔk. Hwà ga tɛ̀ a yɛ nerat e ra kayɛ pyɛ de e ra, ko yas mɛ ya ga karak, ya ga ye pɔk a vwel o mwa.

¹¹Ko di, nára vwɔ mō, na hwo wey na kayɛ pyɛ de a vɔk, ê dusa hwo jɛ̄ng.”

¹²Dagwi Darwey a yang ɛ, “Yàa! Hwo ra pyɛ de hwà simo na kayɛ pyɛ de a vɔk, ko hwo kwon ra vwɔ e ra yɛ pyɛ mɛ wɛt.” Ano de mwât tɛsɛ sekun a gas ɛ yi e nuyel Dagwi Darwey.

¹³Tuhak, jeng de nèy Iyɔp na sè nzem rê pyɛ́ e lɔ gwà mɛn kunat,

¹⁴mwât fwom hwak a vey na Iyɔp na tele, a yang ɛ, “Jeng de wot á sè how cap na berɔndɔng, ko shêp madung yá sè e de rê sehwey bagat,

¹⁵BeSaba behak ba pere hwo e ra wot. Ba sey ɛ yas o, ko ba wey na bwang bemât fwom mō. Me nju hom zɔng de ma hywit me, na me vey ha a hwo.”

¹⁶Womo a sé rɔngɔl nà man nu, hwak à mwât fwom o a to yi, a ye, “Dagwi a tɛ̀ kya he hwo yi e lagwi, ha re vyēl na bwang bemât gyeng yɛ mwa. Me nju hom zɔng de ma nusu me gyat, na me vey ha a hwo.”

¹⁷Womo a sé rɔngɔl nà man nu, hwak à mwât fwom o a to yi, a ye, “Bagyɛng batat vê BeKaldiya ba hwo ot na jugu, ba sey ɛ bemaryat mwa, ko ba wey na bwang bemât fwom mō. Me nju hom zɔng de ma hywit me, na me vey ha a hwo.”

¹⁸Womo a sé rɔngɔl nà man nu, hwak à mwât fwom o a to yi, a ye, “Nèy mō na sé e ji rê pyɛ́ na sɔ̂ nshî anap e lɔ gwà mɛn kunat.

¹⁹Ko sombabos wa pere hwo pɛsɛl yi e hêy gbingiring, wa gangas lɔ mo mwa, ha gaba e ra bebot bemat o, ha wey na yɛn. Me nju hom zɔng de ma hywit me, na me vey ha a hwo.”

²⁰Ano kwong, Iyɔp a sogo, a hamta gwogbɔng gworugu mɛ, a wula to mɛ, ko a ye guduruk, a re a Dagwi fongol,

²¹a ye, “Ma vey vɔ pɛng e jey, ko mê ba kyè na vɔ pɛng. Dagwi Darwey a nɔng, ko yɛ a ga to jut. Tik be somo Dagwi Darwey.”

²²E ji pyɛ́ yemo mwa, Iyɔp a ra renɛn kɛ a gang a Dagwi Darwey nɛn o wɛt.