Read berom Iyɔp 10 Bible Online

Iyɔp 10 - berom bible

Iyɔp 10

¹“A ga yang me sha na sangal, bē tik me na reyɔm hom zɔng; me ha ha na yey sit.

²Mê yang Dagwi, hwo kwon wey na me wɛt, ha a me, ma buru a hwo de hwó ngyɛgɛt me a?

³A sé tyɛng na hwo ra yapyi na fwôm vwɔ mo a? Hwó byɛs gwɛ, ko hwó feng na fwôm bemat beves e negya a?

⁴Bayis mo ba sé vê namâ rebek a? Gwong de bemat be bɛrɛng e gwɛ de hwo bɛrɛng arɔng a?

⁵Nepɔlɔ mo na sé sede ne mwasi a? Neshey mo sede nepɔlɔ̂ neken mwasi arɛt?

⁶Ka ano wɛt e sé ya tɛ̀ hwó raa bol hom, hwó ngyɛgɛt renɛn hom ɛ?

⁷Hwà tɔk vit a me na nɛn, hwà to tɔk vit a mwat de ê sey me yi e vwɔ mo.

⁸Hwo de hwà yong me, hwà manas nedem rebek hom, ko remo, hwà sé wey na me.

⁹À Dagwi, bare e hwo de hwà yong me, hwà yong me na fongol, hwà to toyo na me e fongol.

¹⁰E hwo de hwà shusha me sede nevasal, hwà tɛ̀ ma ga té me kwangarang sede vut de ba gyit e rapyam.

¹¹Hwà bang rebek hom na nama tanga hwó, hwà wunsa me na bekup tanga berinis.

¹²Hwà nɔng me neken hwà dura a me nerat, gyenges mo hɛ he gyeng sangal hom.

¹³Pyɛ́ yemo ya sé e lɛrɛ na hwo e yey mo; ma tɔk hwà vɔk pyɛ́ yemo e bare mo.

¹⁴Hwó gyeng na hwo di kɛ me ra nɛn, na hwo bin kyɛ́ o nà tɛ̀ me washak.

¹⁵Ka sede ma sé mwat vwes, gawey e ra me! Ko ka vit a me na nɛn, mê tos to wɛt; kyen ha ga kyiri me, ma sé sɔ zɔt.

¹⁶Ka ma tos to, hwó ra jàma hom sede gukum; ko hwó to dura to mo pyɛ sap na me.

¹⁷Hwó yongos na hwo hwosom me e jeng e jeng, shom mo ye gwɛsɛ hɛ vey sɛ̀ me. Gwarwang regyɛng bemat mo be bɛɛ me ves.

¹⁸Yaga sɛ́ de hwà nusu na me yi e jim ɛ? Ka ma yang ku gyam mwat hwak a ta yis e me.

¹⁹Ka a ye sé pyɛ, ka ba kwey na me vɔk e sak yi e ji jim neng hom, a yang dal a me na nerat e ra yere sangal de ma sé ɛ.

²⁰Nepɔlɔ hom na sé hyet zɔng, tik bɛ́ɛ me mùu, na me to vɔk yey pyɛng,

²¹gyam na me kyè, me to me ba toyo wɛt, me kyè wɔ e vwel de ha sé tsak mwangalang.

²²E vwel de negbêy hɛ à lwil mwangalang, ha sé kpɛɛ vit a gyeng redu, e hwomo vit a newɛshɛrɛk, negbey ne à lwil.”