Read berom Iyɔp 11 Bible Online

Iyɔp 11 - berom bible

Iyɔp 11

¹Zofar wo Naama a hanat a ye,

²“Mwa nepyak neha mo hwó tɛ̀, be tɔk toyo na ha wɛt a? Mwât tâng nu ba tik nà sɛ̀ ɛ na nɛn bɛ?

³À Iyɔp, hwó dak kaa bemat be sǎ yuu nà toyo na ha ɛ, hwó haras yaga vit a mwat de e tɛ̀ a hwo rekyen rē?

⁴Hwà jut wɔgɔ, begwong mo ba sé tyɛng, ko hwà to sé vit à nɛn e nuyel Dagwi.

⁵Ka a sé pyɛ de Dagwi ê hanat, na a wunta nu me a ha na hwo pyɛ mɛ.

⁶Ê kulu a hwo pyɛ́ de ya sé e lɛrɛ e ji netsitsɛng, pyɛ́ ya sé pyak de ya dal gap tɔk mwasi, tɔk, Dagwi a bang bayis mɛ e ra banɛn mo bahak.

⁷Hwô tɔk misang pyɛ̂ Dagwi a! Hwô kyɛm hwo tɔk neyɛnɛ̂ Dagwi Wo Reto Mwa arɛt?

⁸Nà dal lagwi e rak o, hwô ra e rɛ ɛ?

⁹Neyikyik rɛ na dal jey na nerey, nà dal gworep na netes arɔng.

¹⁰Ka sede Dagwi a vo o, a nára hwo e vwɔ̂ shɔt, wa ê ró ɛ mɛ arɛt?

¹¹Yɛ a tɔk bemat de ba sé yapyi, sede e di pyɛ́ vyes e bare e ra yɛ.

¹²Tɔ́n e tɔk sɛ̀ tɔk, hwêy madung hey, be tɔk bene hɛ e lɔ.

¹³À Iyɔp, sege bare mō, ra won na Dagwi.

¹⁴Sede hwà vɔk nɛn, gas o mɛ, hwo tik neves ne yel e ji lɔ mō wɛt.

¹⁵Ano kwong hwô sè washak yi e nɛn, hwô tɔk wɔ e nuyêl Dagwi na yey ting.

¹⁶Hwô ye bam na reyɔm mō; hwô bare mɛ sede nshî rwak de na ga tele.

¹⁷Neken mō nê sè a hwo wɛshɛrɛk ne dal negbêy nagwi hwô nɛp sede nusû zang-gwi.

¹⁸Hwô sǎ tyang, yaga hwà vɔk sɛ̂t yey; hwô pɔng, hwô wɔ̄ nevwa na yey mo e dyɛngɛ, yaga e Dagwi de e gyenges neken mō.

¹⁹Hwô dyɛng vit à pyɛ de yê nɔng o bengyip, ey, bemat pyak bê sɛ̀ nerat yi na hwo.

²⁰Bemat beves bê to di jey wɛt, vit à hɛn nà gwong hywit ɛn, sɛ̌ be gyeng reku mɛn zɔng.”