Read berom Iyɔp 12 Bible Online

Iyɔp 12 - berom bible

Iyɔp 12

¹Iyɔp a hanat a ye,

²“Vit a tô yey e yin vɛ a bemat tɔk, hwo na netsitsɛng o mwa yin ê ku.

³Ko me, tyɛng sede hwo, ma vɔk sɛ́ng, ma di gwong de hwà dal me wɛt, e wa de a dun pyɛ́ yemo de hwà ha arɛt?

⁴Me de ma ra won na Dagwi ko a hanat a me, ma sé tɛk, vit a me na nɛn, a remo ma ga tɛ́ me pyɛ́ shɛgɛsh.

⁵Bemat de ba sé e ji reyɔm wɛt ba sé bes a hɛn, be byɛs mwat de gawey ha sɛ̀ ɛ, a tɛt ɛ be ganta hɛ na a pere wey.

⁶Bemat de be paa neves, ko kayɛ pyɛ ye kyè a yɛn na nerat, vemo de be woros Dagwi ba sé sangal tyang e de mɛn.

⁷Rangâl ngyāma yê basa a hwo, nenon lagwi nê ha a hwo arɔng,

⁸kɛ pyɛ́ cen da ya sé e jey, yê basa a hwo, kɛ betɔk ji berep bê ha a hwo.

⁹E yɛ̌ mo ya dun, e Dagwi Darwey de a yong yɛ ɛ?

¹⁰Neken pyɛ́ cen mwa na sé e vwɔ mɛ, na nesong bemasi mwa arɔng.

¹¹Fwong gwo mara neha wɛt a? Sede nu de he wok neta pyɛ̂ re.

¹²Netsitsɛng na sé na bemakuk de ba ga vey ɛ, tɔk na mwat de a ga vɛ neshey:

¹³Ko na Dagwi, netsitsɛng na reto na sɛ, na yɛ vô redu na tɔk ha sɛ.

¹⁴Pyɛ de a gangas vit a gwong na be to lɔk, e bang mwat, vit a gwong wunta.

¹⁵E ro na rwak ko jey ye tɛ̀ nehwogot, sede a tomo na wɛ ko tɛmɛ-nshi kagwa.

¹⁶Reto na tɔ́k mwin ha sé na yɛ, mwat de e mɔt na womo de be mɔt, mwa yɛn ba sé bemɛ.

¹⁷E dɔnɔ bemât vos badu, e tɛ̀ bemât shɔt be tɛ́ ɛn betɔn.

¹⁸E lol begbɔng begwɔ̀m e beta sangal mɛn, ko a rɔgɔs a yɛn wit na gyindi.

¹⁹E tɛ̀ bepiris be kyè ferem, ko vemo de ba vɔk reto e tɛ̀ be gaba.

²⁰E bang nenu vemo de be tɛ̀ gap e ra yɛn, ko e gang tɔ̂k bemakuk e bama.

²¹Dagwi e tɛ̀sɛ nèy lɔ gwɔ̀m ne vos rekyen, ko e ro mɛ a bemât re negwɔm na reto.

²²E kulsa pyɛ́ de ya sé e lɛrɛ e ji lwil, ko e dura wɛshɛrɛk pyɛ́ de ya sé e lwil mwangalang.

²³E tɛ̀ yerê bemat jey be karak, ko a to wey na yɛn. E gwɛ̌ hɛn pyak, ko a to shara hɛn.

²⁴E seres ɛ tɔk yi na begbɔng begwɔ̀m bemat jey, ko a tɛ̀ ɛn be kyě gǎ e hey gbingiring de vit a gwong.

²⁵Be kyè mɔgɔm e ji lwil, be ra dedandat, sede mwat de a ga feng siring.”